Ի պատասխան «Մեդիալաբի» հարցմանը քիչ առաջ տարածված հաղորդագրության վերաբերյալ «Արմավիա» ավիաընկերությունը պարզաբանում է, որ Սփյուռքի նախարարության դիմումով կբացվի շաբաթական 2-րդ չվերթը դեպի Սիրիա, սակայն գների շուրջ ընկերությունը չի շտապում հստակ պատասխան տալ:
Ինչպես նախապես տեղեկացրել էինք, այսօր «Արմավիան» պաշտոնապես հայտարարել էր, որ շաբաթական երկրորդ չվերթը իրականացվելու է ՀՀ կառավարության եւ Սփյուռքի նախարարության աջակցությամբ: Հայտարարության մեջ նշվում էր, որ «ավիատոմսերը կլինեն գրեթե անվճար, ինչպես տարիներ առաջ Լիբանանյան դեպքերի ժամանակ:»
«Ընդհանուր ծրագիրը դեռ մշակման մեջ է եւ ընթանում են բանակցություններ, բայց ես կարող եմ ասել, որ տոմսերի արժեքի մեջ կլինեն փոփոխություններ: Ամենակարեւորը չի հետապնդվի շահույթ, եւ ըստ կառավարության մշակած ծրագրի, ծախսերի առումով կլինեն փոխահատուցումներ»,- «Մեդիալաբին» ասում է «Արմավիա» ավիաընկերության ներկայացուցչությունների բաժնի ղեկավար Իզաբելլա Մուրադյանը:
Հիշեցնենք, որ Սիրիայում սկիզբ առած քաղաքացիական պատերազմի հետեւանքով, հայ համայնքը հայտնվել է դժվարին իրավիճակում: Բազմաթիվ սիրիահայեր փորձում են ապաստան գտնել հայրենիքում, սակայն վերջին ամիսներին «Արմավիան» շեշտակի բարձրացրել է տոմսերի գները, ինչն էլ բուռն քննադատությունների ու բողոքի առիթ է հանդիսացել:
Ըստ երեւույթին, տեղի տալով հասարակական ճնշումներին, փորձ է արվում ինչ որ առումով շտկել ստեղծված իրավիճակը:
Շաբաթական երկրորդ չվերթ բացելու փորձ «Արմավիան» ունեցել են նաեւ 2006-ին Լիբանան-Իսրայել պատերազմի ժամանակ, երբ լիբանանահայերին Հայաստան տեղափոխելու համար կրկին բացվել էր 2-րդ չվերթը:
«Չպետք է մոռանալ նաեւ մի շատ կարեւոր հանգամանք, որ մոտակա մի քանի ամսվա մեջ աշխարհի խոշորագույն ավիաընկերություններ դադարեցրել են իրենց չվերթները դեպի Սիրիա: Չնայած վտանգի բարձր ռիսկայնությանը՝ Եվրոպական տարածաշրջանում միայն «Արմավիան» է, որ իրականացնում է չվերթներ դեպի Սիրիա»,- «Մեդիալաբին» ասել է «Արմավիայի» ներկայացուցիչը:
Լիլիթ Առաքելյան
© Medialab.am
