«Անցյալ տարի ձեռքներս մեկնած փող էինք հավաքում, որ առաջնագիծն ամրացնենք, հիմա հսկայական ծախսեր են անում». Արցախի կառավարության շքեղ ու անզուսպ ծախսերը

«Անցյալ տարի ձեռքներս մեկնած փող էինք հավաքում, որ առաջնագիծն ամրացնենք, հիմա հսկայական ծախսեր են անում». Արցախի կառավարության շքեղ ու անզուսպ ծախսերը
«Անցյալ տարի ձեռքներս մեկնած փող էինք հավաքում, որ առաջնագիծն ամրացնենք, հիմա հսկայական ծախսեր են անում». Արցախի կառավարության շքեղ ու անզուսպ ծախսերը
Հեղինակ MediaLab

Արցախի կառավարությունը 2017-ին 169 միլիոն դրամ (350 հազար դոլար) է հատկացրել ծառայողական շքեղ մեքենաներ ձեռք բերելու համար։ Արցախի «Ազգային վերածնունդ» կուսակցության նախագահ, պատգամավոր Հայկ Խանումյանը դիմել է կառավարությանը՝ պարզելու, թե ինչ մեքենաներ են ձեռք բերել։ «Մեդիալաբի» հետ զրույցում պատգամավորը նշեց, որ ծառայողական մեքենաներից ամենախոշոր գնումը ԱԺ նախագահ Աշոտ Ղուլյանի՝ 34 միլիոն դրամանոց ծառայողական մեքենան է, որը գնվել է «գույքի գնում» հոդվածի տակ։ Մեքենաների մի մասը ձեռք է բերվել պահուստային ֆոնդի հաշվին, մյուսը` արտաբյուջեի հաշվին։

«Դեռ անցյալ տարի մենք ձեռքներս մեկնած փող էինք հավաքում, որ առաջնագիծն ամրացնենք, հիմա հսկայական ծախսեր են անում ավտոմեքենաներ ձեռք բերելու համար, դա ինչպե՞ս հասկանանք»,- նկատում է Հայկ Խանումյանը:

Արցախում ծառայողական մեքենաները կրճատելու անհրաժեշտության մասին Հայկ Խանումյանը բարձրաձայնել էր դեռ 2015-ին: Մեքենաների թիվը թեև սկսել էին կրճատել, սակայն հիմա կրճատված մեքենաները շուկայականից տասնապատիկ էժան վաճառում են տարբեր պաշտոնյաների:

«Հիմա պարզվում է, որ հենց այդ նույն պաշտոնյաների համար երկու տարի հետո նոր ծառայողական մեքենաներ են ձեռք բերում: Սա Արցախում տարածված կոռուպցիայի ձև է: Հեքիաթներ են պատմում, թե Արցախում կոռուպցիա չկա, իրականում կա հստակ և բավականին մեծածավալ և կենտրոնացված կոռուպցիա»,- ասում է պատգամավորը, հավելելով, որ Արցախում մարդիկ կան, որոնց կյանքի գլխավոր նպատակը ծառայողական մեքենա ունենալն է, դրա համար չեն կարողանում զերծ մնալ այս ամենից:

Հայկ Խանումյանը պատմեց, որ վերջերս Արցախի խորհրդարանը մերժել է իր օրինագծերից մեկը, որով առաջարկվում էր եռապատկել 2017-ին գյուղական ճանապարհների վերակառուցմանը հատկացվող գումարները: ԱԺ խորհրդարանական ուժերը, նրա խոսքով, ուղղակի տապալեցին քվեարկությունը: Պատգամավորը եզրակացնում է.

«Փաստորեն գումար չհատկացրին գյուղական ճանապարհներին, որպեսզի իրենց համար ավտոմեքենաներ գնեն»:

Ի պատասխան «Ազգային անվտանգություն» կուսակցության նախագահ Գառնիկ Իսագուլյանը նշել էր, որ Հայկ Խանումյանը պետության կառավարման այլ պատկերացում ունի, գտնում է, որ ոտքով կամ ավանակով պետք է ման գալ: Հայկ Խանումյանը հակադարձում է Գառնիկ Իսագուլյանին և հիշեցնում, որ սա Ղուլյանի համար ձեռք բերված երկրորդ ծառայողական մեքենան է:

«Աշոտ Ղուլյանի համար երկրորդ ծառայողական մեքենան են գնում, այնպես չէ, որ այդ պաշտոնյաները, որոնց համար ծառայողական մեքենաներ են գնվել, չունեին ծառայողական մեքենաներ, սակայն հիմա ավելի հզոր և ավելի թարմ մեքենաներ են գնում: Ղուլյանի ծառայողական մեքենաներից մեկը կրճատվել էր, և հիմա նոր մեքենա են գնում, այսինքն՝ կրճատվածը սեփականաշնորհվել է, հիմա նորն են գնում: Այնպես չէ, որ այստեղ պաշտոնյաները էշերով էին աշխատանքի գնում, բայց երկրորդ ծառայողական մեքենա նույն պաշտոնյային և այն էլ` նման հսկայական գումարով` սա արդեն լկտիություն է»:

Հայկ Խանումյանի խոսքով` Գառնիկ Իսագուլյանի արդարացումները բնական են. նա Արցախի պաշտոնյա է, ավելին` Արցախի հարկատուների վճարած հարկերից է աշխատավարձ ստանում, նաև Արցախի հարկատուների վճարած հարկերից արցախյան ծառայողական մեքենա ունի դիվանագիտական համարներով, դրա համար էլ միգուցե այդպես արդարացնում է ցանկացած կոռուպցիոն երևույթ և ցանկացած ոչ ժողովրդավարական երևույթ Արցախում:

ԱԺ «Հայրենիք» խմբակցության նախագահ Արթուր Թովմասյանն էլ մեզ հետ զրույցում նշում է, որ այս հարցը խմբակցության ղեկավարի հարցը չէ: Թե ում մեքենան ի՞նչ վիճակում է` իրեն չի հետաքրքրում, իրեն հետաքրքրում են առաջնագիծը, հայ զինվորը, բյուջեի կատարողականը:

«Նախ` պետք է ճշտել, միգուցե նվիրատվությո՞ւն է, մեր բազմաթիվ հայրենակիցներ նվիրատվություն են կատարում: Այս ամենն այնքան երկրորդական է, ես հեծանիվների կողմնակից եմ, ես շռայլության կողմնակից չեմ, բայց չեմ գտնում, որ Ղարաբաղի կառավարությունը կարող է իրեն նման շռայլություն թույլ տալ և մեքենաներ տրամադրել պետական պաշտոնյաների»,- «Մեդիալաբի» հետ զրույցում ասաց Արթուր Թովմասյանը:

«Շատ մոտիկից ճանաչում եմ երկրի ղեկավարին և վարչապետին, նրանց համար առաջնայինը առաջնագիծն է, տնտեսությունը, ժողովրդի անվտանգությունը: 100-ից ավելի սոցիալական ծրագրեր ունեք և պարտք չունենք: Դրանից բացի, սպասում ենք մեծ մուտքեր, մոտ 5,5 միլիարդ հարկային մուտքեր երկրի բյուջե: Մենք ունենք նաև Արցախում դեպքեր, երբ Հայաստանի համապատասխան նախարարությունը մեքենաներ է նվիրել տվյալ նախարարությանը»,- նկատում է Արթուր Թովմասյանը՝

Հայկ Խանումյանի նման հրապարակումները համարելով 2020 թվականին անցկացվելիք խորհրդարանական ընտրություններին նախապատրաստվելու փորձ:

Իր հերթին Հայկ Խանումյանն էլ հակադարձում է.

«Սլաքներն իմ դեմ ուղղելը կամ ինձ մեղադրելը սխալ է։ Իսկ իրե՞նք ինչին են պատրաստվում։ Ի՞նչ են ուզում անել, մեքենաները, տները հավաքում են, թողնեն-գնա՞ն: Եթե ես 20 թվականին եմ պատրաստվում` փախչելու, մեքենան գնում են, որ հաջորդ պատերազմի՞ց փախչեն: Եթե ես 20 թվականին եմ պատրաստվում, ապա ինչի՞ն են պատրաստվում այդ ծառայողական մեքենաներ ստացողները, ինչի՞ են սպասում»:

Մանե Հարությունյան

MediaLab.am