ՀԱԿ-ի` իշխանությունների հետ երկխոսության պաատվիրակության կազմը հրապարակելուց հետո էլ իշխանությունների կողմից հստակ արձագանքներ չնայած դեռեւս չկան, սակայն երկու կողմերն էլ շարունակում են պնդել իրենց պահանջների մասին:
Իշխող ՀՀԿ մամլո խոսնակ Էդուարդ Շարմազանովը «Մեդիալաբի» հետ զրույցում ասել է, թե իրենք առայժմ չեն քննարկել այն հարցը, թե ովքեր կլինեն իշխանական պատվիրակության կազմում:
Հիշեցնենք, որ հունիսի 2-ին տեղի է ունեցել ՀԱԿ Քաղխորհրդի արտահերթ նիստ, որի ընթացքում հաստատված պատվիրակության կազմում ընդգրվել են Լեւոն Զուրաբյանը, Դավիթ Շահնազարյանը, Վահագն Խաչատրյանը, Ֆելիքս Խաչատրյանը, Սամվել Աբրահամյանը:
«Այդ խնդիրը դեռ չի քննարկվել, երբ որ կքննարկվի նոր կխոսենք»,- ասել է Շարմազանովը:
Երկխոսության թեման թեեւ ամենասպասվածն է ներքաղաքական զարգացումների շարքում, սակայն դժվար է ասել երկու կողմերը կկարողանան վերջնական կոնսենսուսի գալ, թե ոչ:
Խշխանություններն ինչպես նախկինում, այնպես էլ հիմա շեշտում են, որ ընդդիմություն-իշխանություն հնարավոր երկխոսության հիմքում չեն կարող ընդգրկվել արտահերթ ընտրությունների հարցը, ինչի մասին բազմիցս նշել է ընդդիմությունը:
Հիշեցնենք, որ ընդդիմությունն արդեն բազմիցս հայտարարել է, որ երկխոսությունը պատկերացնում է միայն արտահերթ նախագահական ընտրությունների օրակարգով:
Մասնավորապես, մայիսի 31-ին Ազատության հրապարակում տեղի ունեցած հանրահավաքի ժամանակ ընդդիմության առաջնորդ, ՀՀ առաջին նախագահ Լեւոն Տեր-Պետրոսյանը հայտարարել է, որ ընդդիմությունը պատրաստ է իշխանության հետ «ֆորմալ, այսինքն պատվիրակությունների մակարդակով երկխոսության»։
«Կոնգրեսի օրակարգը հայտնի է՝ արտահերթ նախագահական եւ խորհրդարանական ընտրությունների անցկացում»,- ասել է Լեւոն Տեր-Պետրոսյանը։
Հանրահավաքից երկու օր անց Կոնգրեսի մեկ այլ ներկայացուցիչ` համաներմամբ ազատ արձակված Նիկոլ Փաշինյանը լրագրողների հետ զրույցում շեշտել է, որ իշխանությունների հետ բանակցությունների հիմնական օրակարգը արտահերթ ընտրություններն են լինելու:
Փաշինյանը ընդգծել է, որ արտահերթ ընտրությունների անցկացման համար իրենք պայքարելու են մինչեւ վերջ:
Իշխանությունները, սակայն, արտահերթ ընտրությունների օրակարգով երկխոսությունը բացառում են:
«Իշխանությունները ՀԱԿ-ի հետ չի քննարկելու արտահերթ ընտրությունների հարցը: Մենք արտահերթ ընտրությունների հավանականություն չենք տեսնում: Դրա համար ոչ իրավական, ոչ քաղաքական հիմքեր չկան, հետեւաբար որեւէ քաղաքական ուժի հետ արտահերթ ընտրությունների հարցը չենք քննարկելու»,- «Մեդիալաբին» ասում է Շարմազանովը:
Էդուարդ Շարմազանովն ասում է, թե իհարկե, ամեն կողմ իր կարծիքն ունի, եւ դրանք կարող են արտահայտել այդ երկխոսության ժամանակ, սակայն, իշխանությունների օրակարգում չի կարող լինել արտահերթ ընտրություններ անցկացնելու հարց: Փոխարենը, ըստ Շարմազանովի, իշխանությունների օրակարգում կարող են քննարկման այլ հարցեր լինել:
«Մենք պատրաստ ենք քննարկել ներքին քաղաքական, սոցիալ-տնտեսական, արտաքին քաղաքական խնդիրների հետ կապված հարցեր, բայց ոչ արտահերթ ընտրությունների հարցը»,- ասում է Շարմազանովը:
Քրիստինե Խանումյան
© Medialab.am