Քիչ առաջ Գյումրիում ավարտվել են ՏԻՄ թեկնածուների առաջադրումները: Ըստ առաջադրումների, Գյումրու քաղաքապետի աթոռի համար կպայքարի 5, իսկ ավագանու անդամության 21 տեղերի համար` 72 հոգի:
Թեեւ մինչեւ վերջին րոպեն շատերը սպասում էին, որ քաղաքապետ Վարդան Ղուկասյանը, ով տարիներ շարունակ Գյումրու քաղաքապետն էր, կառաջադրի իր թեկնածությունը, այնուամենայնիվ նա չի առաջադրվել:
«Դատելով այն հանգամանքից, որ գործող քաղաքապետ Վարդան Ղուկասյանը մինչեւ վերջին րոպեն չառաջադրվեց ու մինչեւ վերջին րոպեն չհայտարարեց չառաջադրվելու մասին, երեւի մինչեւ վերջ ակնկալիքներ ուներ, թե որեւէ ճանապարհ կբացվի իր առաջադրման: Սակայն երեւի հասկանալի եղավ իրեն եւ իր մերձավորներին, որ Բալասանյանին ՀՀԿ-ական մի քանի աջակցական հայտարարություններից հետո իր առաջադրումը ընկալվելու եւ մեկնաբանվելու է որպես Սերժ Սարգսյանի եւ ՀՀԿ դեմ առաջադրում` խռովություն, դրանից բխած բոլոր հետեւանքներով»,-այս կապակցությամբ գրում http://www.asparez.am -ը:
Դրա փոխարեն ավագանու անդամություն թեկնածություն են առաջադրել գործող քաղաքապետի մերձավորներից մոտ 20 հոգի, այդ թվում գործող ավագանու անդամներից շատերը: Բացի այդ թեկնածություններ են առաջադրել Ս.Բալասանյանի մերձավոր շրջապատից մոտ 20 հոգի, ՀՀԿ-ամերձ շրջանակներից մոտ 10 հոգի` մանկավարժ-դասախոս, մի քանի անհատ թեկնածուներ, եւ «Քաղաքը մերն է» քաղաքացիական նախաձեռնությունից 7 հոգի»:
Հիշեցնենք, որ «Քաղաքը մերն է» քաղաքացիական նախաձեռնությունը ընտրություններին պայքարի դաշտ է մտել ինչպես իրենք են նշել` «արմատական բարեփոխումների և որակյալ տեղական իշխանություն» ձևավորելու նպատակով:
«Մեր վարկանիշը բարձր է: Հաստատ մրցունակ ենք, բայց իրենք (իշխանությունները)տիրապետում են ահռելի վարչական ռեսուրսի, հանձնաժողովները իրենց ձեռքում են, ընտրակաշառքներ, ֆինանսներ, գազելներ, մեքենաներ, որոնցով մարդկանց պետք է տեղափոխեն ընտրատեղամասեր»,- «Մեդիալաբին» ասել է նախաձեռնության հեղինակներից Գյումրու Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը,-Այդուհանդերձ, մեր շանսերը լավ ենք գնահատում»:
© Medialab.am
