«Զատիկին ձվի դեֆիցիտ չի լինելու, բայց չեմ կարող ասել՝ գինը նույնությամբ կպահպանվի՞, թե՞ ոչ». թռչնաբույծների միության նախագահ

«Ձվի շուկայում քանակական առումով խնդիր չունենք, նորմալ է, մեր հաշվարկով քանակի խնդիր չենք ունենա նաև Զատիկի տոնին, ինչը կար անցած տարի, երբ բոլորս ականատես եղանք ձվի դեֆիցիտի»,- «Մեդիալաբին» ասում է Հայաստանի թռչնաբույծների միության նախագահ Սերգեյ Ստեփանյանը:

Ստեփանյանի խոսքով՝ այլ է պատկերը գնային առումով, որովհետև ամեն օր, ըստ նրա, 1,2%-ով թռչնակերի գինը բարձրանում է:

«Ցորենի, եգիպտացորենի միջին գներն եմ ձեզ ասում, որ ամեն օր բարձրանում են. ցորենը՝ 1,2, եգիպտացորենը՝ 2%-ով: Ահագին մեքենաներ ունենք, որ հիմա Լարսում կանգնած են, մոտ 30 մեքենա, թռչնակերը բարձած, 15 օր կանգնած է»,- ասում է Ստեփանյանը:

Մեքենաները Լարսի ճանապարհին են մնացել ոչ այնքան վատ եղանակի, որքան ներմուծման ընթացակարգում կատարվելիք փոփոխությունների պատճառով:

«Այսօր կամ վաղը վերջնական որոշումը կկայացվի, որ հասկանանք՝ ինչպե՞ս ենք աշխատելու, ո՞նց ենք ներկրելու, ի՞նչ քվոտաներ կան: Դեռ ոչինչ պարզ չէ, ուղղակի կառավարության պատվիրակությունը, որը երկու օր է՝ ՌԴ-ում է, բանակցում է ու հուսադրող բան է ասում, որ լավ է լինելու, կարողանալու ենք ներկրել հատիկաֆուրաժը»,- ասում է Հայաստանի թռչնաբույծների միության նախագահը:

Ներմուծումն այսօր արվում է միայն Ռուսաստանի Դաշնությունից, իսկ Ուկրաինայից արվող ներմուծումները դադարեցվել են: Ներկրման գործընթացում կատարվող փոփոխությունը պայմանավորված է նրանով, որ Ռուսաստանի Դաշնությունը, պարենային անվտանգության խնդրից ելնելով, մինչև օգոստոսի 1-ը հացահատիկային մշակաբույսերի արտահանումը արգելել է ԵԱՏՄ անդամ երկրներ, այդ թվում՝ Հայաստան:

Շուկայում ձվի գնի բարձրացումն էլ կապված է միայն թռչնակերի գնի բարձրացման հետ:

«Ձվի բացթողնման գինն այսօր 60-65-70 դրամ է, բայց ես չեմ կարող ասել՝ մինչև Զատիկ այս գինը կկարողանա՞նք պահել, թե՞ ոչ, դա անշնորհակալ գործ կլինի, որովհետև չգիտենք, թե ի՛նչ զարգացումներ են սպասվում առջևում»,- եզրափակեց Հայաստանի թռչնաբույծների միության նախագահը:

Քրիստինե Աղաբեկյան

MediaLab.am