Բազմաթիվ մարդիկ այսօր ուղեկցեցին Վահե Ավետյանին վերջին հանգրվան՝ բժշկին, որի մահվան պատճառ դարձավ «Հարսնաքար» ռեստորանի ավոտկայանատեղիում անվտանգության աշխատակիցների կողմից գազաբար ծեծը:
33-ամյա Վահեն 12 օր հոսպիտալում անգիտակից վիճակում կյանքի ու մահվան սահամանում, մահկանացուն կնքեց հունիսի 29-ի երեկոյան, երբ ռեստորանում շարունակվում էին խնջույքներն ու հրավառությունը:
Այսօր բազմաթիվ քաղաքացիներ, որոնց համար պատվի հարց է դարձել երիտասարդի մահը, քաղաքական տարբեր կուսակցությունների քաղաքական գործիչներ, հասարակական հայտնի դեպմքեր համախմբվել են հետեւելու Վահե Ավետյանի սգո թափորին, իսկ հետո կրկին իրենց բողոքի ձայնը լսելի դարձնելու եւ պայքարելու արդարության համար:
«Մենք բոլորս պետք է միասին լինենք և չնայենք իշխանություն է, ընդիմություն է, թե քաղաքացիական հասարակության ներկայացուցիչ: Սա այնպիսի աղաղակող դեպք է, որ բոլորս պետք է մեր բողոքի ձայնը բարձրացնենք այս հարցի առնչությամբ»,- ասում է հուղարկավորությանը ներկա ԲՀԿ պատգամավոր Նաիրա Զոհրաբյանը:
ՊՆ պատվոպահակային վաշտը եւս ներկա է հուղարակվորության արարողությանը:
Ինչպես տեղեկացնում է Վահե Ավետյանի հուղարակավորության հանրահային հանձնաժողովը, սգո թափորը հարգանքի տուրք կմատուցի անպատժելիության արատավոր մշակույթին զոհ գնացած հայ սպային` ուղեկցելով նրան մինչև Զեյթունի գերեզմանատուն, իսկ հուղարկավորությունից հետո Դավիթ Անհաղթ-Կոմիտաս-Բաղրամյան-Մաշտոց-Ամիրյան-Հանրապետության հրապարակ երթուղով կշարժվի դեպի ՀՀ գլխավոր դատախազություն:
«Հայաստանի Հանրապետության քաղաքացիներս, ովքեր մտահոգված են տարիներ շարունակ անպատիժ մնացած, հանրությանը բազմիցս ահաբեկած և այս արատավոր համակարգի հետ սերտաճած հանցագործ օլիգարխներին օրենքի իշխանությանը ենթարկելու ու օրենքի ամբողջ ուժով արդարությունը վերականգնելու համար, այլևս չենք հանդուրժելու այդ հանցագործներին հովանավորող պետական իշխանության անգործությունը: Մենք ինքնակազմակերպվելով անհաղթահարելի ուժ ենք դառնալու և մեր հետևողական գործողություններով քայլ առ քայլ հասնելու ենք օրենքի գործադրմանը, հանցավոր համնակարգին սերտաճած Նեմեցին և նրա բուծած ստահակներին օրենքի ամբողջ խստությամբ պատասխանատվության ենթարկմանը, ինչպես նաև նրա բարոյական ու ֆինանսական սնանկացմանը:
Բոլոր մտահոգ մարդկանց, ՀՀ քաղաքացիներին հորդորում ենք միանալ այս ակցիային:
Մենք ենք մեր երկրի տերն ու երաշխավորը»,-նշված է հանձնաժողովի տարածած հայտարարության մեջ:
Հիշեցնենք, որ Վահե Ավետյանի մահը հասարակական բողոքի ալիք է բարձրացրել, հունիսի 30-ին բազմաթիվ սրտացավ քաղաքացիներ մոմավառություն էին կազմակեչպել հանցանքի վայր հանդիսացող «Հարսնաքարում»՝ ռեստորանի պատերին «Հանցաքար», «Սպանդանոց» եւ այլ գրառումներ թողնելով եւ իրենց բողոքի ձայն արտահայտելով:
Իսկ երեկ, բողոքի ալիքը շարունակվել էր նաեւ նախագահական նստավայրի եւ դատախազության առաջ:
© Medialab.am
Տեսանյութը՝ «Մեդիալաբի»
