Սիրիահայ Վարդան Պողոսյանն արդեն մեկ ամիս է, ինչ ընտանիքի հետ Սիրիայից գաղթել է ԼՂՀ բնակություն հաստատել Քաշաթաղի շրջանի, Բերձոր քաղաքում:
Շուրջ մեկ տարի ծավալվող Սիրիայի ներքաղաքական պատերազմական թեժ իրավիճակը ստիպել է ոչ միայն նրան, այլեւ եղբորը, կնոջ ծնողներին եւ մյուս հարազատներին բնակություն հաստատել Քաշաթաղի շրջանում:
«Ես միտք էի դրել, որ Ղարաբաղ պետք է գամ: Հայաստանի, Ղարաբաղի ընկերներիս հետ խոսեցի, ճշտեցի ամեն փան ու միանգամից եկա Ղարաբաղ: Մտածեցի կգամ աշխատանք կգտնեմ, կապրեմ»,-ասում է 29-ամյա Վարդանը:
Քաշաթաղի շրջանում վերաբնակեցված 21 սիրահայ ընտանիքները մեծամասամբ գաղթել են Թուրքիայի սահմանի մոտակայքում գտնվող սիրիական Ղամիշլի քաղաքից: Վարդանը նույնպես Ղամիշլիից է:
«Իհարկե այստեղ դժվարությոններ կան, բայց կհարմարվինք, այլ հարցեր չկան: Բերձոր դպրոց կա, էլեկտրականություն կա, ինտերնետ կա, դե փոքր քաղաք է: Միայն առաջին բանը գործ փնտրելն է, ով որ կգա այստեղ: Ես էլ աշխատանք կփնտրիմ»,-«Մեդիալաբին» ասում է Պողոսյանը: Նա ասում է, որ Սիրիայի հայտնի խոշոր բջջային օպերատորներ համարվող ընկերություններից մեկում մինչ պատերազմական իրավիճակը, հաշվապահ է աշխատել:
Վարդանի կինը`Լուսվարդ Վադանյանը, նույնպես մասնագիտությամբ հաշվապահ է, նա նույնպես աշխատանք չունի: Պողոսյաններին Քաշաթաղի վարչական շրջանից խոստացել են, որ կօգնեն աշխատանք գտնել` ինչպես մյուս սիրիահայերին:
«Առաջիկայում հնարավոր է` կինս այստեղի մանկապարտեզում հաշվապահ աշխատի, ճիշտ է աղջիկսը`Տարիքը, փոքր է՝ մեկ տարեկան, բայց ամեն պարագաներում պետք է աշխատի»,-ասում է Պողոսյանը եւ հավելում, որ իր աներն արդեն զբաղվում է հողագործությամբ, իսկ մյուս բարեկամի տղաները աշխատում են որպես «տրակտորի մեխանիկ»:
Մեկ տարեկան դստեր եւ կնոջ հետ Վարդանը ապրում է Բերձորի ժամակավոր կացարաններից մեկում: Նա ասում է, որ չգիտի, թե դեռ երբ կստանա բնակարան:
Հիշեցնենք, որ մի քանի օր առաջ Քաշաթաղի շրջանում հաստատված սիրիահայերի բնակարանաշինական կարիքները հոգալու նպատակով «Օգնիր եղբորդ» նախաձեռնող խումբը 5 միլիոն դրամի փոխանցում է կատարել «Քաշաթաղ» հիմնադրամին:
«5 մլն. դրամի օգնությունից արդեն հատկացրել են շենքի կառուցման համար Կովսականում (քաղաք Քաշաթաղի շրջանում), որ շուտ ավարտեն եւ հանձնեն այն սիրիահայերին, ովքեր այդտեղ պիտի ապրեն, իսկ Կովսականում հիմնականում հողագործներն են ապրում»,-հավելում է Պողոսյանը:
Նա կարծում է, որ եթե Հայաստանի տնտեսությունը զարգանա, ապա ավելի շատ մարդ կգա հայրենիքում ապրելու:
«Հայաստանը պետք է ավելի շատ առաջ գնա, ամեն տեղ զարգանա ու մենակ մայրաքաղաքը չէ, այլ բոլոր գյուղերը: Ես հուսամ ամեն ինչ լավ կըլլա»,-ասում է նա:
Ցանկություն հայտնելով մշտապես բնակություն հաստատել Քաշաթաղում, Վարդանը նշում է, որ մտադրություն չունի անգամ որոշ ժամանակ անց Երեւան տեղափոխվելու:
«Ես ընտրեցի Բերձոր ու վերջացավ, այստեղ ապրելու եմ, այստեղ աշխատեմ ինչքան Աստված կամենա: Ես այստեղից ուրիշ տեղ չեմ ուզում գնալ»,-հավելում է Պողոսյանը:
Քաշաթաղի վարչական շրջանի վերաբնակեցման վարչության պետ Ռոբերտ Մաթեւոսյան նշում է, որ իրենք ամեն կերպ փորձում են օգնել վերբանակեցված սիրիահայերին բնակարան ունենալու, աշխատանք գտնելու հարցում:
Նա ասում է, որ գաղթած սիրահայերի մեծ մասը հողագործությամբ է զբաղվում, քանի որ Սիրիայի Ղամիշլի քաղաքից գաղթածները հիմնականում հենց հողագործներ են եղել:
«Վերջին մեկ երկու ամիսն է, որ սիրահայերը հաստատվել են Քաշաթաղում: Բոլորն էլ իրենց որոշմամբ են եկել, մեկը մյուսի բարեկամն է կամ ընկերը, իրար լսելով եկել են»,-ասում է Մաթեւոսյանը՝ նշելով, որ Քաշաթաղի Կովսական քաղաքում բնակեցվել են հիմնականում հողագործները, իսկ Իշխանաձոր գյուղում տրակտորի մեխանիկները:
Ինչ վերաբերում է բնակարաններին, ապա ըստ Մաթեւոսյանի, մի մասը ժամանակավոր կացարաններում է ապրում, մի մասը վերանորոգված բնակարաններում: «Օգնիր եղբորդ» նախաձեռնող խմբի տրամադրած 5 մլն. դրամի օգնությամբ առաջին հեթին բնակարանների վերանորոգման հարցն են լուծելու:
«Չեմ կարող ասել, թե այժմ բնակարանների հարմարությունները ապրելու համար գերազանց են, բայց նախնական պայմաններ կան, իսկ այդ գումարով ընթացքում կվերանորոգենք: Մոտ 10-12 բնակարան կա, որ վերանորգված է, մնացածը դեռ ժամանակավոր կացարաններում են ապրում»,-ասում է Մաթեւոսյանը:
Նա հավելում է, որ բնակարանները անվճար են տրամադրվում սիրիահայերին, իսկ առաջիկա 3 տարին նրանք չեն վճարելու հողի վարձի, ինչպես նաեւ կոմունալ ծառայությունների համար:
«Բոլոր սիրիահայ ընտանինքներին էլ փորձում ենք օգնել եւ ամեն ինչով հնարավորինս ապահովել»,-հավելում է Մաթեւոսյանը:
Լիլիթ Առաքելյան
© Medialab.am
