Ընդդեմ «կուտակայինի». Հարավկովկասյան երկաթուղու աշխատակիցներն գործադուլ են հայտարարել

Ընդդեմ «կուտակայինի». Հարավկովկասյան երկաթուղու աշխատակիցներն գործադուլ են հայտարարել
Ընդդեմ «կուտակայինի». Հարավկովկասյան երկաթուղու աշխատակիցներն գործադուլ են հայտարարել

Հարավկովկասյան երկաթուղու աշխատակիցներն այսօր գործադուլ են հայտարարել և այս պահին բողոքի ակցիա են կազմակերպել իրենց վարչական շենքի դիմաց:

Նրանք դժգոհում են կենսաթոշակային կուտակային համակարգի դեմ՝ նշելով, որ չեն ցանկանում, որպեսզի իրենց աշխատավարձերից պարտադիր պահումներ անեն:

Մարզերից Երևան են եկել ընկերության մասնաճյուղերում աշխատող բանվորները, նրանք նշում են, որ ստանում են ցածր աշխատավարձ, իսկ ընկերության ղեկավարությունը հունվար ամսվա համար իրենց աշխատավարձերից պահումներ է արել:

Ընկերության աշխատակիցներին առաջարկել են հանդիպել և խոսել ընկերության գլխավոր տնօրենի հետ: Գործադուլ հայտարարած բանվորները պնդում են, որպեսզի գլխավոր տնօրենն իջնի և ներքևում հանդիպի իրենց իրենց:

Բողոքի ակցիայի մասնակցիներին միացել են նաև «Դեմ եմ» նախաձեռնության անդամները:

«Սա է միակ մեթոդը, որով կարող ենք պաշտպանել մեր իրավունքներն ու արաժանապատիվ աշխատել: Ցանկացած գործադուլի և ակցիայի աջակցում ենք և ձեր կողքին ենք: Մենք կփորձենք միասին ձևակերպել ձեր պահանջը, իսկ իրականում պահանջը մեկն է, որ ոչ մի պահումներ չլինեն մարդկանց աշխատավարձերից, որի իրավունքը Սահմանադրական դատարանը տվել է : Ըստ ՍԴ որոշման՝ գործատուները կարող են ոչ մի պահում չանել աշխատավարձերից և ոչ մի տույժի չենթարկվել»,- տարածքում հայտարարում են «Դեմ եմ» նախաձեռնության անդամները:

Ընկերության աշխատակիցները հայտարարում են, որ ընկերությունում աշխատող մոտ երեք հազար մարդ բողոքում է համակարգի դեմ:

Հիշեցնենք, որ չնայած Սահմանադրական դատարանի հունվարի 24–ի որոշմամբ «Կուտակային կենսաթոշակների մասին» օրենքում կասեցվել է պարտադիր կուտակային վճարներ չկատարած կամ ուշացումով կատարած անձանց պատասխանատվության ենթարկվելու և կենսաթոշակային ֆոնդերի ու կենսաթոշակային ֆոնդերի կառավարիչ ընտրելու վերաբերյալ դրույթները, այնուամենայնիվ շատ գործատուներ շարունակում են պահումներ կատարել աշխատավարձերից: 

ՍԴ-ի որոշման, գործատուների և աշխատողների շրջանում առաջացած խառնաշփոթին անդրադարձել է նաեւ ՀՀ Մարդու իրավունքների պաշտպանը: Հնչել են բազմաթիվ կոչեր, բողոքի ակցիաներ կազմակերպվել, սակայն ոլորտում ստեղծված իրավիճակը շարունակում է նորանոր հարցեր առաջ բերել: 

© Medialab.am