Տիգրան Սարգսյանը գրառում է կատարել ֆեյսբուքյան իր էջում` անդրադառնալով իր հրաժարականին: Գրառումն ամբողջությամբ ներկայացնում ենք ստորեւ:
«Սիրելի հայրենակիցներ,
Դեռևս փետրվար ամսին ես հանրապետության նախագահ Սերժ Սարգսյանին դիմեցի խնդրանքով՝ ընդունել իմ հրաժարականը:
Որոշումս հասունացած էր և խորը գիտակցված: Պայմանավորվեցինք դիմումի ներկայացման պահը հետաձգել`մի շարք կարևոր պետական միջոցառումների և ՀՀԿ տնտեսական համաժողովի անցկացման անհրաժեշտությունից ելնելով:
Իմ շնորհակալությունն եմ հայտնում բոլոր այն մարդկանց ում հետ աշխատել եմ, և առաջին հերթին հանրապեության նախագահին՝ վարչապետի բարձր պաշտոնն ինձ վստահելու համար:
Նոր կառավարությանը մաղթում եմ հայրենանվեր և արդյունավետ աշխատանք»:
Տեղեկացնենք, որ քիչ առաջ հայտնի դարձավ, որ ՀՀԿ գրասենյակում մեկնարկած կուսակցության գործադիր մարմնի նիստի ժամանակ Տիգրան Սարգսյանը հրաժարական է տվել:
«Այսօր՝ ապրիլի 3-ին, վարչապետ Սարգսյանն իր սեփական նախաձեռնությամբ, սեփական դիմումի համաձայն, որին մենք հարգանքով ենք վերաբերվում, իրականացրել է իր գործառույթը և տվել է հրաժարականի դիմում», -նիստից հետո Ազատություն ռադիոկայանի հաղորդմամբ լրագրողների հետ զրույցում հայտարարել է ՀՀԿ խոսնակ Էդուարդ Շարմազանովը:
© Medialab.am