ԱՄՆ նախագահ Բարակ Օբաման իր ապրիլքսանչորսյան ուղերձում` նախկին տարիների նման կրկին անգամ խուսափել է «ցեղասպանություն» բառից այս անգամ եւս ասելով`«Մեծ Եղեռն»:Ելույթն ամբողջությամբ ներկայացնում ենք ստորեւ:
«Այսօր մենք հիշում ենք Մեծ Եղեռնը և հարգում նրանց հիշատակը, ովքեր նահատակվել են 20-րդ դարի վատթարագույն կոտորածներից մեկի ժամանակ:
Մենք հիշում ենք 99 տարի առաջ տեղի ունեցած սարսափելի դեպքերը, երբ 1.5 միլիոն հայեր են կոտորվել կամ աքսորվել Օսմանյան կայսրության գոյության վերջին օրերի ընթացքում և սգում ենք կորսված կյանքերի, այդ տղամարդկանց, կանանց և երեխաների կրած տառապանքների համար: Հանդիսավոր ոգեկոչման համար մեզ են միանում միլիոնավոր մարդիկ Միացյալ Նահանգներում և ողջ աշխարհում: Մենք այսպիսով հիշեցնում ենք ինքներս մեզ մեր ընդհանուր հանձնառության մասին, այն է՝ այնպես անել, որ մարդկության պատմության այս մութ էջերը չկրկնվեն:
Մենք արժանին ենք մատուցում և խրախուսում ենք շատացող համարձակ հայերին ու թուրքերին, ովքեր արդեն ընտրել են այս ուղին և ավելի շատ մարդկանց ենք քաջալերում անելու նույնը՝ նրանց կառավարությունների և իմ աջակցությամբ: Մենք հպարտությամբ ենք հիշում Սիրիական և հայկական օգնության ամերիկյան կոմիտեին, որn ամերիկացիների նվիրատվությունների շնորհիվ փրկել է անհամար հայերի և 1915 թվականին տեղահանված այլ համայնքների ներկայացուցիչների կյանքերը: Մենք հիշելով հարգում ենք այն հայերին, ում կյանքն անանիրավորեն խլեցին 1915 թվականին և ոգեշնչված ենք հայ ժողովրդի արտասովոր խիզախությամբ և դիմացկունությամբ՝ ի հեճուկս նման մեծ աղետի և տառապանքների: Ես ողջունում եմ ամերիկահայերն անգնահատելի ներդրումը, ամերիկյան հասարակությանը, մշակույթին և մարդկանց: Մենք բոլորս հանձն ենք առնում աջակցել հայ ժողովրդին, որովհետև նրանք աշխատում են ժողովրդավարական, խաղաղ և բարգավաճ երկիր կառուցելու համար:
Այսօր մեր մտքերն ու աղոթքները հայերի հետ են, քանի որ հիշում ենք Մեծ Եղեռնի սարսափը, հարգանքի տուրք ենք մատուցում զոհերին և վերահաստատում ենք մեր հարատև նվիրվածությունը հայ ժողովրդին և այն սկզբունքին, որ նման ոճրագործությունները միշտ պետք է հիշվեն, եթե ցանկանում ենք կանխել դրանց կրկնվելը»:
© Medialab.am
