www.ilur.am -Երեկվանից համացանցի սկանդալային հիթն է դարձել թիվ 119 ավագ դպրոցի Վերջին զանգի արարողությունը, որտեղ դպրոցի աշակերտներից մեկը Հովիկ Աբրահամյանի պատվին բանաստեղծություն է արտասանում: Իշխանությունների հանդեպ ստորաքարշությունն ու քծնանքը հասցրել են նաեւ ուսումնական հաստատություններ, ընդ որում, էլ ավելի իջեցնելով տարիքային շեմը: Բուհ-երի հետ այդ հարցում արդեն դպրոցներն են մրցում: Ու մինչ ամբողջ համացանցով մեկ ամոթանքներ են հնչում դպրոցի ուսուցիչների եւ տնօրենի հասցեին, պարզվում է՝ ինքը տնօրենը խիստ գոհ է իր կատարած աշխատանքից:
Այդ մասին այսօր ինքը՝ տնօրեն Հովհաննես Կարապետյանը հայտարարեց iLur.am-ի հետ զրույցում: Տնօրենի հետ մեր զրույցը՝ ստորեւ:
–Պարոն Կարապետյան, դիտեցինք ձեր երեկվա միջոցառումը: Ինչպե՞ս եղավ այդ ամենը, հանպատրաստի՞ց արեցիք, թե՞ պլանավորել էիք: Գաղափարը ինչպե՞ս ծագեց:
-Մենք ընդամենը մեկ օր առաջ իմացանք, որ վարչապետը պիտի գար:
-Ե՞ւ: Ինքնաբուխ բանաստեղծություն գրվե՞ց:
-Բա, իհարկե:
-Իսկ ո՞վ է հեղինակը, եթե գաղտնիք չէ:
-Մեր լեզվի մասնագետներն են աշխատել աշակերտների հետ:
-Այսինքն, աշակերտների ներգրավմամբ գրել են այդ բանաստեղծությունը:
-Իհարկե:
-Կարո՞ղ ենք արձանագրել, որ այդ բանաստեղծությունը հենց Հովիկ Աբրահամյանի պատվին է գրվել:
-Չէ, դա Սահյանի մոտիվներով է գրված:
-Բայց իր պատվի՞ն:
-Դե, ինչ-որ բաներ ձեւափոխված, հարմարեցված:
-Հատուկ Աբրահամյանի համա՞ր:
-Այո:
-Իսկ ի՞նչ եք կարծում, նրան դուր եկա՞վ:
-Կարծում եմ՝ իրեն պետք է այդ հարցը ուղղեք:
-Իսկ դուք հավանեցի՞ք:
-Ւնչ ասեմ, իհարկե:
-Դուք այդ առումով երեւի տարբերվեցիք մյուսներից: Կարծում եք՝ սա լա՞վ օրինակ կծառայի:
-Միանշանակ: Դա դրական կարող է ազդել, եւ ընդհանրապես, խթան հանդիսանալ երեխաների համար:
-Իսկ ի՞նչ առումով, ի՞նչ դաստիարակչական բան կարող է այն տալ:
-Ոչ մի բացասական բան, բացի դրականից: Թող շփվեն ղեկավարների հետ, ղեկավարներին հաղորդեն իրենց մտածածը, եթե ունեն նպատակներ, թող ներկայացնեն, դա էլ ղեկավարների մոտ կարող է արթնացնել վերաբերմունք դեպի աշակերտը, երեխաները, եւ ընդհանրապես, շփումները միայն դրական ազդեցություն կարող են ունենալ:
-Իսկ շա՞տ դրական արձագանքներ ստացաք այդ առիթով:
-Չեմ կարող ասել, չեմ կարող ասել:
Հարցազրույցը տեղադրվել է http://www.ilur.am-ի համաձայնությամբ
