Աժ պատգամավոր, նախկին վարչապետ Հրանտ Բագրատյանն անդրադարձել է Աստանայում Նազարբաեւի պահվածքին եւ դրանից հետո սկիզբ առաջ քննարկումներին եւ հայտարարություններին:
Բագրատյանի գրառումն ամբողջությամբ ներկայացնում ենք ստորեւ:
«Նազարբաևի խոսքերից հետո հայկական քաղաքական միտքը ուշքի չի գալիս։
Առանց խորանալու ՀՀ Նախագահի, ԱԺ նախագահի և ԱԺ փոխխոսնակի մակարդակով արվում են հայտարարություններ, որոնք թանկ են նստելու ԼՂՀ վրա։
Այդ հայտարարությունների իմաստն այն է, որ բա իհարկե Ղարաբաղը հո Հայաստանի հետ ՄՄ կամ Եվրազես չի մտնում։ Ադրբեջանական day.az-ը և zerkalo-ն ցնծության մեջ են. իբր թե հայերն ահա խոստովանում են, Ղարաբաղը Հայաստան չէ։
Պարոնայք, մ՞իթե նախորդ գրառումից չհասկացաք, որ ԼՂՀ-ն տնտեսապես Հայաստան է։ Երբ ԱՀԿ էինք մտնում հարցն էլ հենց այն էր, որ քանի որ ԼՂՀ քաղաքական ճակատագիրը դեռ որոշված չէր, ապա մինչ այդ (որոշվելը) Արցախը պետք է առևտուր աներ։
Ադրբեջան ճամփեքդ բացու՞մ ես, որ ԼՂՀ-ն առևտուր անի։ Պատասխան՝ ոչ։ Հայաստան՝ դ՞ու։
Պատասխան այո։ Եվ ուրեմն Հայաստանի մաքսային օրենքներով առևտուր անելն օրինական է ԼՂՀ համար։ Սա էր, որ պետք է պատասխան տրվեր Նազարբաևին։
Սա է, որ գոնե հիմա պիտի ասվի։ Ախր ԱՀԿ մտնելիս այսպես է հաղթահարվել ԼՂՀ խնդիրը։ ԱՄՀ-ն ֆինանսավորում է ՀՀ դրամը, որն օգտագործվում է նաև ԼՂՀ-ում։ 1994թ փետրվարին ՀՀ-ն ՀԲ-ից 24 մլն դոլար վարկ է ստանում, երբ պատերազմը Ղարաբաղում շարունակվում էր։
Այդ ի՞նչ արտգործնախարար է Նախագահի կողքին, որ այս ամենը չգիտի։
Իրականում Նազարբաևը հնարավորություն էր տվել Ալիևին հստակ պատասխանելու։
Իսկ դ՞ուք»։
© Medialab.am
