«Հայկական կողմը կուժեղացնի հսկողությունը առաջնագծում՝ հակահարված տալով հակառակորդի ցանկացած սադրանքի»,-ըստ «Ազատություն» ռադիոկայանի, այսօր հայտարարել է Հայաստանի պաշտպանության նախարար Սեյրան Օհանյանը՝ մեկնաբանելով հայկական զինուժի՝ նոյեմբերի 12-ին ադրբեջանական կողմից խոցված ուղղաթիռի անձնակազմի դուրս բերման գործողությունը։
«Մեր հարևանների պետական կոշտ դիրքորոշումը, բանականության բացակայությունը և ուղղաթիռի խոցումից հետո մարդասիրական նորմերի համաձայն՝ օդաչուներին դուրս բերելուց հրաժարվելը ստիպել է հայկական կողմին հատուկ գործողությունների դիմել», – ասել է Սեյրան Օհանյանը՝ ընդգծելով, որ հայկական կողմը հմուտ է գործել, դիտարկվել է ուղղաթիռի անկման վայրը ու ոչնչացվել հակառակորդի ծուղակը։
Հիշեցնենք, որ օրեր շարունակ ադրբեջանական կողմը լարվածության տակ է պահում այն տեղանքը, որտեղ ընկել է խոցված ուղղաթիռը: Երեք հոգանոց անձնակազմով ռազմաօդային ուժերի ՄԻ-24 ուղղաթիռը ղարաբաղա-ադրբեջանական սահմանի արևելյան հատվածի օդային տարածքում ադրբեջանական ԶՈՒ-ի կողմից խփվել էր նոյեմբերի 12-ին՝ ուսումնավարժական թռիչքի ժամանակ:
Լեռնային Ղարաբաղի Պաշտպանության բանակին հաջողվել է շնորհիվ հատուկ գործողության հաջողության հասնել եւ նոյեմբերի 12-ին Ադրբեջանի կողմից խոցված ՄԻ-24 ուղղաթիռի անկման վայրից դուրս հանել զոհված օդաչուներից մեկի դին, երկու օդաչուների մասունքները:
«Հաշվի առնելով ադրբեջանական կողմի պաշտոնական հայտարարություններն ու բանականության իսպառ բացակայությունը, ԼՂՀ զինված ուժերը ստիպված դիմել են նոյեմբերի 12-ին հակառակորդի կողմից խոցված ուղղաթիռի անձնակազմի ճակատագիրը անկման վայրում պարզելու և դրանից բխող խնդիրներ լուծելու հատուկ նշանակության գործողության,-նշված է ԼՂՀ ՊԲ տարածած հաղորդագրության մեջ:
Մարտական խնդրի կատարման արդյունքում դեպքի վայրից տարհանվել են ուղղաթիռի անձնակազմից մեկի դին, երկու օդաչուների մասունքները և ուղղաթիռի որոշ անհրաժեշտ մասեր»:
Հաղորդագրությունը տեղեկացնում է, որ Լեռնային Ղարաբաղի կողմից կորուստներ չեն եղել, մինչդեռ հատուկ նշանակության գործողության ընթացքում զոհվել է առնվազն երկու ադրբեջանցի:
Սակայն, ավելի ուշ ՀՀ Պաշտպանության նախարարության մամլո խոսնակ Արծրուն Հովհաննիսյանը տեղեկացրել է, որ ադրբեջանի կորուստներն անհամեմատ մեծ են:
«Փաստորեն ադրբեջանի կորուստները շատ են ու այնքան շատ, որ բրիգադի հրամանատարին պաշտոնանկ են արել: Հետաքրքիր է այս կորուստների համար են ազատել պաշտոնից թե ուղղաթիռը խփելու»,-ֆեյսբուքյան գրառման մեջ նշել է Հովհաննիսյանը:
Ըստ Արծրուն Հովհաննիսյանի, հաշվի առնելով հակառակորդի չափազանց մեծ կրակային եւ այլ հակազդեցությունները, ծավալված գործողությունները բնույթով եւ բարդությամբ աննախադեպ էին:
Նախարար Օհանյանը վստահեցրել է, որ այսուհետ էլ հայկական կողմը ցանկացած սադրանքի դեպքում պատասխան է տալու հակառակորդին՝ նվազագույնը կիրառելով համաչափ պատիժ։
«Այս պարագայում առաջին գծում մենք խստացնելու ենք մեր ծառայությունը՝ դիտարկման, հայտնաբերման, խոցման միջոցառումները, որոնքուղղված են լինելու հրադադարը խախտողներին», – ասաց Օհանյանը՝ ընդգծելո , որ հայ ժողովրդի մոտ «ընդունված չէ կացնահարել, կազմակերպել դավադրություններ, բայց մենք արժանի պատասխան ենք տալու ցանկացած այսպիսի սադրանքի»։
© Medialab.am
