«Դատապարտում ենք բժշկի նման վարքագիծը». Հաշմանդամություն ունեցող անձանց շահերի պաշտպանություն ազգային դաշինքի հայտարարությունը

«Դատապարտում ենք բժշկի նման վարքագիծը».  Հաշմանդամություն ունեցող անձանց շահերի պաշտպանություն ազգային դաշինքի հայտարարությունը
«Դատապարտում ենք բժշկի նման վարքագիծը». Հաշմանդամություն ունեցող անձանց շահերի պաշտպանություն ազգային դաշինքի հայտարարությունը

«Հաշմանդամություն ունեցող անձանց շահերի պաշտպանության ազգային դաշինքը» իր մտահոգությունն է հայտնում վերջերս մամուլում տեղ գտած գինեկոլոգ Գեորգի Պողոսյանի հայտնած այն կարծիքի առնչությամբ, թե հաշմանդամություն ունեցող երեխային ընտանիքում պահելը քայքայում է ընտանիքը, իսկ ծնողներին դարձնում է դժբախտ:
Հիշեցնենք, որ Գեորգի Պողոսյանը անդրադառնալով վերջերս Երևանի «Մալաթիա» բժշկական կենտրոնում առանց վերջույթների լույս աշախարհ եկած նորածնին դեպքին, որից ծնողները հրաժարվել էին, նոյեմբերի 12-ին լրագրողներին ասել էր, թե արատավոր երեխա ունենալու դեպքում ինքն էլ նրան մանկատուն կհանձներ:

«Հաշմանդամություն ունեցող անձանց շահերի պաշտպանության ազգային դաշինք» իրավաբանական անձանց միություն անընդունելի է համարում բժշկի նման մոտեցումը` նկատի ունենալով բժշկի դիրքն ու հեղինակությունը հասարակությունում, ինչպես նաև նրա կոչումը, ինչը ըստ միության հաղորդագրության, վիրավորում է Հայաստանում ապրող բազմաթիվ երեխաների և նրանց ընտանիքների:

«Բժշկի կողմից արված նման արտահայտությունը կարող է հուսահատեցնել ընտանիքներին, որոնց բարօրության և զարգացման համար կոչված էլ գինեկոլոգը: Ավելին, այն կարող է կյանքի և ընտանիքում երեխայի ապրելու իրավունքների ոտնահարման յուրօրինակ կոչ դիտարկվել,-նշված է հաղորդագրության մեջ:

Մեզ համար զարմանալի է այն փաստը, որ այսօր, երբ ողջ աշխարհում առողջապահության ոլորտը և մոտեցումները զարգացում են ապրում, ՀՀ առողջապահության ոլորտում դեռևս գերակշռում են կարծրատիպային մոտեցումները մարդու և ընտանիքի առողջության և լիարժեքության մասին: Փոխարենը՝ այսօր ընտանիքի սոցիալ-հոգեբանական աջակցության համար որևէ գործուն քայլ չի իրականացվում ՀՀ պետական և մասնավոր կլինիկաների, բժշկական կենտրոնների կամ այլ բժշկական հաստատությունների կողմից, որոնք կաջակցեն այն ընտանիքներին, որտեղ ծնվում են հաշմանդամություն ունեցող երեխաներ: Մենք համոզված ենք, որ հենց նման ծառայությունների բացակայությունն է ամենամեծ խնդիրը մեր երկրում, և հենց այս հարցին պետք է մեծ ուշադրություն դարձնեն ոլորտի մասնագետները»:

Միությունը եւս մեկ անգամ հաստատում է. հաշմանդամություն ունեցող մարդիկ կարող են լիարժեք ապրել, կրթություն ստանալ, աշխատել, ստեղծագործել և դառնալ հասարակության լիարժեք անդամ, եթե ստեղծվեն համապատասխան պայմաններ, և ձևավորվի ճիշտ վերաբերմունք նրանց հանդեպ: Իսկ առաջին մարդը, ով կարող է մեծ ազդեցություն ունենալ երեխայի հետագա ճակատագրի վրա, բժիշկն է:

««Հաշմանդամություն ունեցող անձանց շահերի պաշտպանության ազգային դաշինքը», որը համախմբում է 23 հասարակական կազմակերպություններ և հաշմանդամություն ունեցող անձանց հարյուրավոր ընտանիքներ, դատապարտում է նման վարքագիծը,-տեղեկացնում է հաղորդագրությունը,- և կոչ է անում առողջապահության ոլորտի մասնագետներին զերծ մնալ կարծատիպեր առաջացնող, երեխաներին և ծնողներին վիրավորող հայտարարություններից»:

© Medialab.am