Հայաստանում Ռուսաստանի դեսպան Իվան Վոլինկինը «Սպուտնիկ» ռադիոկայանի տված հարցազրույցում խոսելով Գյումրիում տեղի ունեցած արյունալի միջադեպի և դրան հաջորդած իրադարձությունների մասին՝ ասել է, որ հարցը չպետք է քաղաքականացնել: Այս մասին հղում անելով ռուսական աղբյուրներին` հաղորդում է «Ազատություն» ռադիոկայանը:
Աղբյուրը հղում անելով ռուսական «Նովոստի» գործակալության ռադիոկայանին, նշում է, որ վաղը Հայաստանում Ռուսաստանի դեսպանատան և Հայաստանի նախագահի նստավայրի առջև բողոքի ակցիա է տեղի ունենալու: Անդրադառնալով զարգացումներին, Վոլինկինն ասել է, որ մարդիկ ունեն բոլոր իրավունքները իրենց զգացմունքներն ու կարծիքն արտահայտելու:
«Ես հասկանում եմ այդ մարդկանց, նրանց զգացմունքները, որովհետև դաժան հանցագործություն է տեղի ունեցել, որի համար հանցագործը պետք է պատասխան տա: Մարդիկ իհարկե, իրավունք ունեն գալ այստեղ, իրենց կարծիքը, զգացմունքներն արտահայտելու: Բայց կարծում եմ, որ այս հարցը քաղաքականացնել պետք չէ», -ըստ աղբյուրի ասել է Հայաստանում Ռուսաստանի դեսպանը:
«Մենք չպետք է քաղաքական հրդեհ բորբոքենք այս հարցի շուրջ: Կարծում եմ քննությունը կպարզի այս գործի բոլոր մանրամասները և հանցագործը համարժեք պատիժը կկրի», – նշել է նա:
Հիշեցնենք, որ հունվարի 12-ի վաղ առավոտյան Գյումրիի Մյասնիկյան փողոցի թիվ 188 տանը բնակվող Ավետիսյանների ընտանիքի վեց անդամները սպանդի ենթարկվեցին, ընտանիքի ամենափոքրը` վեց ամսական Սերյոժա Ավետիսյանը, ով հայտնաբերվեց կրծքի շրջանում ծակող գործիքով վնասված գտնվում է հիվանդանոցում` ծանր վիճակում: Բժիշկները պայքարում են երեխայի կյանքի համար:
Գյումրեցիների սպանության մեջ կասկածվողը Գյումրիի 102-րդ ռազմաբազայի զինծառայող ռուս զինվոր Վալերի Պերմյակովն է, ով խոստովանական ցուցմունք է տվել:
Գյումրիում տեղի ունեցած արյունալի ողբերգությունը է հազարավոր մարդկանց փողոց էր հանել: Այսօր Գյումրիում տեղի ունեցած երթի ժամանակ ձվեր են թռչել Ռուսաստանի հյուպատոսարանի ուղղությամբ: Հազարավոր քաղաքացիներ, չնայած իրավապահների շղթաներին շարժվել են ռազմաբազայի ուղղությամբ` պահանջելով սպանդի մեջ մեղադրվողին ռուսական կողմից հանձնել հայ իրավապահներին:
Ցուցարարները մինչեւ վաղը ժամանակ են տվել դատախազությանը` խոստանալով Ավետիսյանների հուղարկավորման արարողությունից հետո վաղը` ժամը երեկոյան հինգին, կրկի հավաքվել: Ցուցարաները նշել են, որ իրենց հետագա քայլերը կախված են լինելու դատախազության պատասխանից:
ՀՀ գլխավոր դատախազ Գեւորգ Կոստանյանն այսօր լրագրողների հետ ունեցած ճեպազրույցի ժամանակ նշել է, թե հանցագործը պատասխանատվության կենթարկվի Հայաստանի տարածքում: Նա նաեւ նշել է, որ վաղը պատրաստվում է մեկնել Գյումրի եւ տեղում բացատրություններ տալ:
«Վստահեցնում եմ, որ հանցագործը քրեական պատասխանատվության կենթարկվի ՀՀ տարածքում, և մենք բոլորս հնարավորություն կունենանք թե՛ հետևել ամբողջ ընթացակարգին և թե՛ մենք կտեսնենք ամբողջ պատասխանատվության ենթարկելու գործընթացը: Հայաստանի Հանրապետությունը որևէ բան որևէ մեկին չի զիջում»,- ճեպազրույցում մասնավորապես նշել է Կոստանյանը:
© Medialab.am