Դատարանը որոշում ընդունեց երկու ամսով կալանավորել Ռոբերտ Քոչարյանին։ Այդ մասին հաշված րոպեներ առաջ տեղեկացրեց Ռոբերտ Քոչարյանի փաստաբան Արամ Օրբելյանը՝ հրաժարվելով պատասխանել լրագրողների հարցերին։
Օրբելյանը տեղեկացրեց, որ դատարանը բավարարել է քննիչի միջնորդությունը եւ Ռոբերտ Քոչարյանին կալանավորելու որոշում է կայացրել։ Փաստաբանը խոստացավ, որ վաղը՝ հուլիսի 28-ին հրավիրված մամլո ասուլիսին կպատասխանի բոլոր հարցերին:
Մարտի 1-ի գործով Ռոբերտ Քոչարյանին մեղադրանք էր առաջադրվել երեկ։
«2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը»,-նշված էր ՀՀ քննչական ծառայության պաշտոնական հաղորդագրության մեջ։
