«Այսուհետ այդ շանսը չի տրվելու, եթե դուք ունեք խնդիրներ օրենքի հետ, ապա օրենքը պետք է հավասարապես գործի բոլորի համար ». պատգամավոր

Արուսյակ Ջուլհակյան (Լուսանկարը՝ «Ֆոտոլուր»)

«Մեդիալաբի» հարցերին պատասխանում է ԱԺ «Իմ քայլը» խմբակցության պատգամավոր Արուսյակ Ջուլհակյանը

-Տիկի՛ն Ջուլհակյան, «Ապօրինի ծագում ունեցող գույքի բռնագանձման մասին» օրենքը կարծես սկսում է գործել․ երեկ արդեն կալանք դրվեց նախկին ոստիկանապետ Վլադիմիր Գասպարյանի գույքի վրա: Արդյոք այս գործընթացները հենց բխում էին պողպատյա հեղափոխությանն ուղղված քայլեր իրականացնելու տրամաբանությունի՞ց: Արդեն նշվում է, որ 400-ից ավելի այսպիսի գործեր են ուսումնասիրվել:

-Ապօրինի գույքի բռնագանձման մասին օրենքը սկսել է գործել նախորդ տարի, և, ըստ էության, օրենքով նախանշված ժամկետներում գործընթացներն իրենց հունով գնացել են: Այսինքն՝ խոսել այն մասին, որ հենց պողպատյա մանդատը ստացանք, օրենքն սկսեց աշխատել, ես այդպես չէի ասի:

Աշխատանքներ այդ ուղղությամբ տարվել են նախորդ տարվանից, և այդ գործընթացները գրեթե անշեղորեն իրականացվել են օրենքով նախանշված ժամկետներում: Այն ժամանակ էլ օրենքն ընդունելուց հետո հայտարարել էինք, որ ժամանակ է պետք մրցույթ հայտարարելու, այդ ուղղությամբ աշխատող դատախազներ մրցութային կարգով ներգրավելու համար:

Դրանից հետո այդ դատախազները պետք է անցնեին վերապատրաստման փուլ, հատուկ մասնագիտացում ստանային, որը նրանց կօգնի հենց այս ուղղությամբ նեղ մասնագիտական աշխատանք տանել: Այդ վերապատրաստումներից հետո արդեն սկսել են կոնկրետ ուղղություններով աշխատել:

Եթե հիշում եք, այս տարվա ապրիլին, երբ գլխավոր դատախազը ԱԺ-ում ներկայացնում էր իր զեկույցը, նաև ապօրինի ծագում ունեցող գույքի բռնագանձման մասով ես հարց տվեցի, և դատախազը չկարողանալով շատ մանրամասներ ներկայացնել, որովհետև օրենքը սահմանափակում է հրապարակայնությունը, ասաց, որ մինչև հունիսի վերջ արդեն կլինեն մի քանի գործերով հստակ գործողություններ: Նա նշեց, որ արդեն 5 գործ պետք է ուղարկվի դատարան: Ես կարծում եմ, որ այս տրամաբանության մեջ են վերջին օրերին մամուլի հրապարակումները տեղի ունենում:

-Կարո՞ղ ենք արձանագրել, որ իշխանությունն անցում է կատարում ավելի կոշտ գործիքակազմի՝ հաշվի առնելով, որ անցած երեք տարիներին մենք ականատես էինք բռնել-բաց թողնելու պրակտիկային, և որևէ մեկն այդպես էլ չպատժվեց:

-Այդ առումով մենք բավականին քննադատության ենք ենթարկվել, և որոշ դեպքերում կարող եմ ասել, որ, այո՛, իրավացիորեն, բայց մենք նաև այն ժամանակ ասել ենք, որ փորձում ենք ուղղվելու, երկրորդ շանսից օգտվելու հնարավորություն տալ:

Խոսքն այն մասին է, որ հնարավորություն է տրվել տարբեր ոլորտներում աշխատող մարդկանց, ըստ էության, հեղափոխական օրակարգի մեջ մտնել, ինքնամաքրվել, նոր էջից սկսել, բայց մենք տեսանք, որ դա որոշ դեպքերում չի աշխատում, և հիմա ասում ենք՝ այդ ժամանակը, որ ձեզ տրվել էր ուղղվելու համար, դուք սխալ եք օգտագործել, այսուհետ այդ շանսը չի տրվելու, եթե դուք օրենքի հետ խնդիրներ ունեք, ապա օրենքը պետք է հավասարապես գործի բոլորի համար: Այո՛, իրավապահները պետք է կատարեն իրենց պարտականությունները:

-Այսինքն՝ Վովա Գասպարյանը կամ ևս մի քանիսը քավության նոխազ չեն դառնա՞: Բոլորը հատ-հատ պատասխա՞ն են տալու:

-Ես ինքս էլ մամուլից եմ տեղեկացել, որ Վովա Գասպարյանի և ևս երկու հոգու մասով գործընթացները եզրափակիչ փուլ են մտել: Բայց ինչպես դուք նշեցիք, 400-ից ավելի գործերով ուսումնասիրություններ են կատարվում, ինչը խոսում է այն մասին, որ դատախազության համապատասխան ստորաբաժանումը քնած չի եղել այսքան ժամանակ, ուսումնասիրություններ է իրականացրել:

Ես հույս ունեմ, որ դրանց արդյունքում, եթե դատախազությունը բավարար հիմքեր գտնի, այդ բոլոր ուղղություններով պետք է իր լիազորություններն ամբողջությամբ գործի դնի: Ես, համենայնդեպս, մեծ ակնկալիքներ ունեմ այս գործընթացից:

Այս երեք տարվա ընթացքում վեթինգի գործընթացն այդպես էլ կյանքի չկոչվեց, ու հիմա արդարադատության նախարարը խոսում է համակարգային վեթինգի մասին: Դա ինչպե՞ս է տեղի ունենալու:

-Մենք այն ժամանակ էլ, հիմա էլ ասում ենք, որ այն կոշտ վեթինգի համար, որի մասին խոսվում էր, մեզ պետք են սահմանադրական փոփոխություններ: Մենք դատական ռեֆորմներն իրականացրել ենք այն մասով, որ մասով սահմանադրական կարգավորումները թույլ են տվել: Դրա արդյունքում մեզ մոտ վեթինգի փափուկ գործիքակազմն է ներդրվել, որը միտված է ապագային:

Այսինքն՝ անցյալին ուղղված կոշտ վեթինգ մենք չենք կարողացել անել, քանի որ ունեցել ենք Սահմանադրությամբ պայմանավորված սահմանափակումներ: Մեր նախընտրական ծրագրում մենք հստակ նշել ենք, որ պատրաստվում ենք սահմանադրական փոփոխությունների, և այդ փոփոխությունները այնպիսի կարգավորումներ են ենթադրելու, որոնք թույլ են տալու վեթինգի կոշտ գործիքակազմ կիրառելու։

Եթե նկատի ունեք արդարադատության նախարարի վերջերս արած հայտարարությունը, ապա նա հենց նկատի ուներ սահմանադրական փոփոխություններից հետո մեր իրականացնելիք գործողությունները։

Վովա Գասպարյանի հետ փոխկապակցված անձինք՝ կինն ու դուստրը, ունեն 4 առանձնատուն, 2 բնակարան, 3 հողամաս, 4 մեքենա, 1 ավտոտնակ: Արդյոք արդար ճանապարհով պաշտոնյան կարո՞ղ է այսքան ունեցվածք ունենալ։ Եվ ընդհանրապես, այս գործընթացից «պլստացողներ» չե՞ն լինի։

-Ես՝ լինելով պաշտոնյա, իմ օրինակով կարող եմ պնդել, որ պաշտոնյա լինելու ժամանակաշրջանում բացառապես պետական աշխատավարձով որևէ կերպ հնարավոր չէ նույնիսկ մեկ նման գույք ունենալ։

Հետևաբար, միայն պետական պաշտոններ զբաղեցրած ոստիկանապետը չէր կարող այդքան գույք ունենալ, բայց նա միակը չէ այդպիսին։ Կարող ենք ենթադրել, թե գույքի այդպիսի հարուստ նկարագրի  տեր էլ ինչքան պաշտոնյաներ ենք ունեցել, և համապատասխան կառույցները պետք է աշխատեն, և, ենթադրում եմ, աշխատում են, քանի որ մենք մամուլում տեսնում ենք հարուցված քրեական գործեր։

Ես լիահույս եմ, որ իրավապահ մարմինները իրենց գործողությունները պատշաճ իրականացնում են։ Համենայնդեպս, ես պատգամավոր եմ և կարող եմ խոստանալ, որ՝ հետամուտ եմ լինելու, որ համապատասխան մարմիններն այդ ուղղությամբ կատարեն աշխատանքներ, բայց ինքս այդ աշխատանքի կատարողը չեմ և չեմ կարող խոստանալ, որ որևէ մեկը չի պլստալու։

-Ակնկալում եք, որ դատարանները արդար որոշո՞ւմ կկայացնեն այս մասով։

Ակնկալիքներս շատ մեծ չեն, բայց նաև հույս ունեմ, որ դատարանները նույնպես ժամանակի ընթացքում վերափոխվելու են թե՛ մեր ներդրած գործիքների կյանքի կոչմամբ, քանի որ այդ գործիքները միանգամից արդյունք չէին տալու, այլ ժամանակի ընթացքում, թե՛ նաև դատական իշխանությունը կհասկանա, որ հասարակությունն իրենցից կոնկրետ ակնկալիքներ ունի, և համապատասխան գործողություններ կիրականացնի։

Սահմանադրական փոփոխություններից հետո վեթինգի գործիքակազմ կներդրվի, և եթե մենք ունենանք դատավորներ, որոնք իրենց գործունեության ընթացքում կընդունեն դատական ակտեր, որոնք մարդու իրավունքների կոպիտ խախտումներ կներառեն, ապա այդ գործիքակազմը կկիրառվի նաև նրանց նկատմամբ։

Մանե Հարությունյան

MediaLab.am