Տարո՛ն ջան, ընտրություններ են, կներես. ըստ վերլուծաբանի՝ նախագահի հրամանը՝ «ոչ գրագետ քաղաքական գովազդ»

Տարո՛ն ջան, ընտրություններ են, կներես.  ըստ վերլուծաբանի՝ նախագահի հրամանը՝ «ոչ գրագետ քաղաքական գովազդ»
Տարո՛ն ջան, ընտրություններ են, կներես. ըստ վերլուծաբանի՝ նախագահի հրամանը՝ «ոչ գրագետ քաղաքական գովազդ»

Մինչ բնապահպանները տոնում են իրենց «մեծ հաղթանակը», քաղաքական վերլուծաբան Երվանդ Բոզոյանն այսօր ՀՀ նախագահի կողմից Մաշտոցի պուրակ այցելելն ու կրպակները ապամոնտաժելու մասին արված հայտարարությունը համարում է անհաջող նախընտրական քարոզի մի մաս, որը կարող է հենց իշխանության դեմ աշխատել:
«Տարո՛ն ջան, ինքդ էլ ես տեսնում, որ սա այդքան էլ գեղեցիկ չէ: Նորից եմ կրկնում՝ քաղաքապետարանը շատ արդյունավետ է աշխատել: Ճիշտ որոշում եք կայացրել, բայց, իրոք, գեղեցիկ չէ, և լավ կլինի, որ ձևը գտնես, այս ամենն ապամոնտաժեք: Սա կլինի շատ ճիշտ որոշում: 2-3 տարի այս պատկերը չի կարող մեր «աչքը շոյել», իսկ մենք ասել ենք, որ ամբողջ Երևանում աչք շոյող կառույցներ պետք է լինեն, կրկնում եմ՝ օրինական ճանապարհով»,-Մաշտոցի պուրակում հայտարարել է Սերժ Սարգսյանը՝ կրպակներին անդրադառնալով:

Այն որ հենց ընտրություններից մի քանի օր առաջ նախագահը քաղաքապետի հետ այսօր անսպասելի այցելեց Մաշտոցի պուրակ ու հայտարարեց, որ կրպակները կապամոնտաժվեն, Բոզոյանի համոզմամբ «ոչ գրագետ կազմակերպված քաղաքական գովազդի օրինակ է»:

Հիշեցնենք, որ բնապահպան ակտիվիստները 2 ամսից ավելի պայքարում էին ընդդեմ Մաշտոցի պուրակում տեղադրված կրպակների՝ներկայացնելով օրինական հիմքեր, այն մասին որ իշխանություններն իրավունք չունեն պուրակում նման գործունեություն ծավալեն: Սակայն երկու ամսվա ընթացքում ո՛չ ՀՀ նախագահը, ո՛չ Երեւանի քաղաքապետ տարոն Մարգարյանը, ո՛չ էլ իշխանական թեւի ազդեցիկ այլ ներկայացուցիչներ հաշվի չէին առնում այդ փաստարկները:

Երվանդ Բոզոյանն ասում է, որ նախագահի անսպասելի հայտարարությունը եւ հակասական իրավիճակը կրպակները մոնտաժելու մասին արդեն չեն զարմացնում: Վերլուծաբանի համոզմամբ, այնպիսի տպավորություն է, որ իշխանության աջ թեւը չգիտի, թե ձախ թեւն ինչ է անում: Բոզոյանի համոզմամբ՝ նույն կերպ եղավ հայ-թուրքական արձանագրությունների ժամանակ, նույն կերպ է նախագահը առաջնորդվում ԼՂՀ եւ այլ կարեւոր հարցերում:

«Ու այս քայլով Սերժ Սարգսյանը ոչ թե շահեց, այլ իրականում եւս մեկ անգամ ապացուցեց, որ ինքը անըդհատ փոխում է իր կայացրած որոշումները ու կայուն չէ: Այսինքն, եթե ինքը աղմուկի հենց սկզբում որոշեր, որ այդ կրպակների տեղադրումը անօրինական է, ոչ ոք նրան հետագայում չէր էլ մեղադրի, որ ինքը այս քայլին դիմեց նախըտրական նպատակով»,-«Մեդիալաբին» ասում է Բոզոյանը:

Նա համոզված է, որ նախագահը չէր սպասում, որ հասարակական մեծ աղմուկ կբարձրանա ու տարբեր կուսակցություններ կսկսեն կանգել Մաշտոցի պուրակի ակտիվիստների կողքին, որն ըստ էության դիտվում է որպես քաղաքական PR: Իսկ Պուրակի ակտիվիստներին սատարելու կոչեր են հնչեցրել ԱԺ ընտրությանը առաջադրված «Ժառանգություն», «Հայ ազգային կոնգրես» եւ «Հայ հեղափոխական դաշնակցություն» քաղաքական կուսակցությունները:

«Նա պարզապես որոշեց ինքն էլ հետ չմնա ու օգուտ քաղի»,- համոզված է Երվանդ Բոզոյանը:

Կարնե Իոնեսյան

© Medialab.am