Արարատի մարզի Նոր Կյանք գյուղի փոքրիկ ամբուլտորայի ղեկավար Արա Ալեքսանյանը, որը շուրջ 30 տարի է՝ բժշկական գործունեության մեջ է ու այժմ ընտանեկան բժիշկ է, ասում է՝ օրեցօր կամավոր պատվաստվել ցանկացողների թիվն ավելանում է:
«Մեր ամբուլատորիայում արդեն պատվաստվել է 625 մարդ: Բայց պատվաստվածների թվում միայն մեր գյուղի բնակիչները չեն, նաև հարակից տարածքներից են մեզ մոտ պատվաստվում»,- «Մեդիալաբին» ասում է Ալեքսանյանը:
Նա իր ֆեյսբուքյան էջում ակտիվ է. գյուղում օրական պատվաստումների մասին թվեր է ներկայացնում, իրազեկում հանրությանը պատվաստանյութերի ու դրանց կանխարգելիչ ազդեցության մասին և հորդորում մարդկանց արագ կանխել քովիդից ծանր դեպքերն ու մահերը:
Նոր Կյանքում քովիդի դեմ պատվաստումների մասին միֆերի համար ընտանեկան բժիշկը ժարգոնային որակում է գտել՝ «մուտիտ».
«Մի բան բացատրում ես, մեկ էլ ուրիշ մուտիտ ա ի հայտ գալիս: Առաջին մուտիտն էն էր, որ հենց պատվաստվեք, շոկի մեջ կընկնեք, կմեռնեք: Համարձակ մարդիկ եկան, պատվաստվեցին, էդ միֆը շատ արագ ցրեցին:
Երկրորդ մուտիտն էն էր, որ պատվաստված տեղին մետաղ է կպնում, ուղիղ եթերում ցույց տվեցի, բացատրեցի, որ նման բան չկա:
Երրորդ մուտիտն էն է, որ ասում են՝ անպտղություն է առաջացնում, ես էլ պարզ բացատրեցի, որ եթե դա կոնտրացեպտիվ (հակաբեղմնավորիչ) լիներ, դեղագործական ընկերությունը դրա անվան տակ կվաճառեր ու ավելի շատ շահույթ կունենար: Շատ հարմար ու թանկ միջոց կլիներ:
Հաջորդ մուտիտն էն է, որ հայտարարում են՝ էսինչ մարդը մեռավ, էնինչ մարդը մեռավ, ես էլ պահանջում եմ՝ անուն, ազգանուն, հասցե, ո՞վ է մահացել:
Ու վերջ, էլ ծպտուն չեն հանում: Ա՛յ մարդ, բոլորս տեսել ենք քովիդից մահացած մարդու, տեսել ենք մեր հարազատների ու ընկերների մեջ, բայց էդ ո՞նց է, որ չենք տեսնում պատվաստումից մահացած մարդու: Ո՞ւր է, մարդու անուն ասեք, որ պատվաստումից մահացել է»:
Բժիշկ Ալեքսանյանը չի թաքցնում, ասում է՝ պատվաստված բնակիչների շրջանում կան մարդիկ, որոնք պարտադրված են գալ, պատվաստվել:
«Կան աշխատողներ, որոնք պարտադրված են պատվաստում ստանալ, ես այդ երևույթը համարում եմ պարտադիր կամավոր պատվաստում, իսկ ովքեր չեն աշխատում, իրենց կամքով, գիտակցաբար գալիս են պատվաստման: Ասեմ, որ այս երկրորդ խմբի թիվն օրեցօր աճում է»,- նշում է բժիշկը:
Հակապատվաստումային քարոզը բժշկին այնքան է վրդովեցնում, որ նա պատրաստ պատասխանատվություն կրել պատվաստումից մարդու վատանալու համար. «Եթե պատվաստումից վատացող լինի, մեղքը իմ վիզը, իսկ կորոնայից մեռածների մեղքը` հակաքարոզչություն անողների վիզը: Ինձ թվում է՝ հակաքարոզչությունը գալիս է մի կենտրոնից, որն ունի երկիրը քանդելու նպատակ»:
Հակաքարոզչության համար նա ինչ-որ իմաստով մեղադրում է նաև գործընկեր բժիշկներին.
«Բժիշկ լինելը և բժշկականի դիպլոմի սեփականատեր լինելը տարբեր բաներ են: Հիմա 7-8 բժշկական համալսարան են բացել, իմ ընկերները դասախոսում են, պատմում են՝ գալիս, ասում` պատրաստ չենք, փողով դրեք, գնանք»:
Գյուղի բժշկի ներկայացմամբ` վերջերս օրական միջինում 4 անձի մոտ քովիդ է հայտնաբերվում, սակայն եթե բոլորը թեստավորվեն, այդ թիվը կարող է հասնել 8-ի:
Հասմիկ Համբարձումյան
MediaLab.am