«Հաղթանակի օրվա միջոցառումների շրջանակում այսօր Ստեփանակերտում անցկացված երթի ժամանակ սովետական դրոշի առկայությունը նախաձեռնել է Արցախում ապրող ռուսական համայնքը»,- «Մեդիալաբին» ասում է Արցախի Ազգային ժողովի «Ազատ Հայրենիք» խմբակցության պատգամավոր Արամ Հարությունյանը՝ անդրադառնալով Ստեփանակերտի փողոցներում այսօր տոնական երթի ժամանակ բարձրացված սովետական դրոշի ու Z և V տառերով պաստառների առկայությանը:
Ինչ վերաբերում է «Անմահ գունդ» ակցիային, արցախցի պատգամավորն ասում է, որ այն միշտ էլ եղել է, նաև՝ մինչև պատերազմը. «Արցախում այդ ակցիան արվում էր ի հիշատակ Հայրենական մեծ պատերազմի զոհերի, որում մեծ ներդրում ունի ամբողջ հայ ազգը՝ և՛ Արցախից, և՛ Հայաստանից, դա նորություն չէ, ու այդ ակցիան մի քանի տարի է՝ ինչ մայիսի 9-ին իրականացվում է»:
Սոցիալական ցանցերում օգտատերերից ոմանք այս քայլն անընդունելի ու խնդրահարույց են համարել: Արցախի իշխանական պատգամավորը, սակայն, չի շտապում հստակ գնահատական տալ՝ ասելով, որ դա կախված է նրանից, թե ինչ ենթատեքստով է այս քայլն արվել ռուսական համայնքի կողմից, բայց, մեծ հաշվով, Հարությունյանը կարծում է, որ դա արվել է ուղղակի հիշողությունը վառ պահելու համար և ոչ թե այլ նպատակով:
Քաղաքագետ Տիգրան Գրիգորյանն էլ իր ֆեյսբուքյան հրապարակման մեջ նշել է, որ սա «իմիջային հարված է Արցախին, ու ապագայում Արցախի իշխանությունները պետք է կանխարգելեն նմանատիպ նախաձեռնությունները»:
Արցախի իշխանական պատգամավորն այս հարցում էլ միանշանակ գնահատական հնչեցնելն այնքան էլ ճիշտ չի համարում:
«Եթե սա պետական մակարդակով կազմակերպված միջոցառում չէ, ի՞նչ վնասի մասին է խոսքը: Ժողովրդավար երկիր ենք, ցանկացած մեկը կարող է իր դիրքորոշումն արտահայտել այնպես, ինչպես ուզում է: Նույն հաջողությամբ ռուս-ուկրաինական պատերազմի տարբեր փուլերում Հայաստանում ակցիաներ էին անցկացվում, որի ժամանակ մի խումբն իր աջակցությունն էր հայտնում Ռուսաստանին, մյուսը՝ Ուկրաինային»,- ասում է Արամ Հարությունյանը:
Արցախի Հանրապետության խորհրդարանի պատգամավորը չի թաքցնում, որ Արցախում միշտ էլ գերակշիռ է եղել մարդկանց թիվը, որոնք ավելի շատ ռուսական կողմնորոշման կրող են եղել: Նման տրամադրություններ Արցախում այսօր էլ կան, ու դա գաղտնիք չէ, բայց այս ակցիան, ինչպես վստահեցնում է Արամ Հարությունյանը, դրա հետ ընդհանրապես կապ չունի:
Քրիստինե Աղաբեկյան
MediaLab.am