Այս օրերին համացանցում ակտիվորեն տարածվում է մի ձայնագրություն, որում հավանաբար ընդդիմության ներկայացուցիչները բարեխոսում են Հայաստանի ազգային ագրարային համալսարանի ուսխորհրդի նախագահի հետ՝ բողոքի ակցիաներին ուսանողներ ապահովելու համար:
Ըստ հրապարակված ձայնագրության՝ ուսխորհրդի նախագահին դասախոսներից մեկի միջոցով, որը ներկայացվում էր Էմմա Սարգսյան անունով, հորդորում են գումարի դիմաց բողոքի ակցիաներին ապահովել մեծ թվով ուսանողներ: Բարեխոսության արդյունքում ուսխորհրդի նախագահին առաջարկվում է 2000 ուսանողի դիմաց 2 մլն դրամ, այսինքն՝ մեկ ուսանողի համար 1000 դրամ:
Ուսխորհրդի նախագահ Թոռնիկ Ալիյանը «Մեդիալաբի» հարցին ի պատասխան հրաժարվեց մեկնաբանել ձայնագրությունը և դրանում իր մասնակցությունը՝ նշելով, որ այդ մասին հայտարարություն կտարածեն:
Համալսարանի լրատվության հետ կապերի բաժնի ղեկավար Սոս Ավետիսյանը «Մեդիալաբին» ասաց, որ Էմմա Սարգսյանը Ագրարային համալսարանում դասախոս չէ: «Նա մեր համալսարանի հետ ընդհանրապես կապ չունի: Սարգսյանը Ամերիկյան համալսարանի դասախոս է և միաժամանակ ժամավճարով ագրոբիզնեսի ուսուցման կենտրոնի կրթական ծրագրերից մեկում էր դասախոսում»,- ներկայացրեց Ավետիսյանը:
Բուհի ներկայացուցչի խոսքով՝ իրենք համալսարանում գործով են զբաղված, և քաղաքականությունն իրենց չի հետաքրքրում. «Մենք, անկեղծ ասած, գործով ենք զբաղված, քաղաքականությունը մեզ չի հետաքրքրում: Նաև՝ ուսանողներին: Իսկ եթե ոմանց էլ հետաքրքրում է, նրանք ազատ են, կարող են մասնակցել, ոչ մի խոչընդոտ չկա: Բայց ասեմ ձեզ, որ մեր դասերը վերջին շրջանում երբևէ չեն խաթարվել»:
Հասմիկ Համբարձումյան
MediaLab.am
