Հացադուլով, նախընտրական երգի հոլովակով, ընտրողների հետ հանդիպումներով այսօր Հայաստանում մեկնարկեց նախագահական ընտրությունների պաշտոնական քարոզարշավը, որը կտևի մինչև փետրվարի 16-ը:
Ըստ ժամանակացույցի` փետրվարի 17-ին «լռության օր» կլինի, իսկ փետրվարի 18-ին Հայաստանում կանցկացվեն նախագահի ընտրությունները:
Նախագահի պաշտոնի համար պայքարում է 8 թեկնածու` գործող նախագահ, ՀՀԿ առաջնորդ Սերժ Սարգսյանը, «Ազատություն» կուսակցության նախագահ Հրանտ Բագրատյանը, «Ժառանգություն» կուսակցության առաջնորդ Րաֆֆի Հովհաննիսյանը, ԱԻՄ-ի առաջնորդ Պարույր Հայրիկյանը, ԼՂՀ ԱԳ նախկին նախարար Արման Մելիքյանը, էպոսագետ, անկուսակցական Վարդան Սեդրակյանը, «Ռադիո հայի» տնօրեն Անդրիաս Ղուկասյանը և «Ազգային համաձայնություն» կուսակցության առաջնորդ Արամ Հարությունյանը:
Թեև երեկ «Ազատություն» ռադիոկայանին տված հարցազրույցում նախագահ Սերժ Սարգսյանը «մրցակցային» ընտրություններ էր խոստացել, այնուամենայնիվ, այսօր պաշտոնապես մեկնարկած քարոզարշավի առաջին օրը քաղաքագետներն արդեն իսկ անհավասար ընտրապայքար են կանխատեսում:
Քաղաքագետ Երվանդ Բոզոյանը «Մեդիալաբի» հետ զրույցում նշեց, որ այդպես էլ չձևավորվեց այն ազդեցիկ բևեռը, որը կկարողանար այլընտրանք լինել գործող նախագահին: Արդյունքում, ըստ քաղաքագետի, գործող նախագահն ունի հսկայական առավելություն մյուս թեկնածուների համեմատ:
Նրա խոսքով` ընտրարշավի հենց առաջին օրվանից արդեն պարզ է, թե ով է լինելու ֆավորիտը, հետևաբար, ընտրարշավը ձևական բնույթ է կրելու:
«Նախագահի թեկնածուներից և´ Րաֆֆի Հովհաննիսյանին, և´ Հրանտ Բագրատյանին հարգանքով եմ վերաբերվում, սակայն անգամ այս երկու թեկնածուները չունեն այն տարրական ռեսուրսները, որ կարողանան լուրջ դիմադրություն ցուցաբերել գործող նախագահին»,- ասաց Բոզոյանը:
Քաղաքագետ Գարիկ Քեռյանը «Մեդիալաբի» հետ զրույցում նշեց, որ առաջին հերթին իշխող ՀՀԿ-ն ու իր ղեկավարն են շահագրգռված, որ լիարժեք քարոզարշավ լինի, քանի որ այս ուղղությամբ քննադատությունը շատ է:
«Բայց էստեղ մի փոքր բայց կա. թեկնածուներից ոչ բոլորն են, որ կարող են լիարժեք քարոզարշավ կազմակերպել: Երբ ասում ենք «լիարժեք քարոզարշավ», պետք է տարբեր գործոններ նկատի ունենանք` և´ որակական, և´ քանակական: Կարո՞ղ են արդյոք այս թեկնածուներն ամբողջ Հայաստանի մարզերով ու համայնքներով շրջել, ընտրողներին ներկայանալ իրենց ընտրածրագրերով, կամ կարո՞ղ են արդյոք այնքան նյութական ռեսուրսներ ունենալ, որ կարողանան բոլոր բնակավայրերում ապահովել իրենց շտաբների գործունեությունը: Եթե համեմատեք որևէ թեկնածուի շտաբների քանակը Սերժ Սարգսյանի շտաբների քանակի հետ, կտեսնեք, որ թեկնածու կա, որ կարող է ունենալ 3-4 շտաբ կամ ընդհանրապես չունենալ: Ուստի այստեղ հավասար ընտրարշավ մենք չենք կարող տեսնել ռեսուրսների խիստ անհավասարության պատճառով»,- ասաց քաղաքագետը:
Գարիկ Քեռյանը նկատում է, որ նախորդ խորհրդարանական ընտրությունների ժամանակ այս հարցն այդքան սուր չի եղել, որովհետև այն ժամանակ ընտրապայքարին մասնակցող ընդդիմադիրներն ունեին բոլոր կազմակերպչական և ֆինանսական ռեսուրսները` իրենց քարոզարշավում ընդգրկելու ամբողջ հանրապետության տարածքը:
Անդրադառնալով ընտրություններին հիմնական ընդդիմադիր ուժերի չմասնակցելուն` Գարիկ Քեռյանը նշեց, որ դա պայմանավորված էր ընդդիմադիր ճակատի չձևավորմամբ, ինչի հետևանքով ՀԱԿ-ը մենակ մնաց:
Միաժամանակ քաղաքագետը նշեց, որ միայն ՀԱԿ-ին է ընդդիմություն համարում, իսկ ԲՀԿ-ն ու ՀՅԴ-ն ընդդիմություն չեն, որովհետև երկու ուժերն էլ եղել են կոալիցիայի կազմում:
«Ինչ վերաբերում է նրան, թե ՀԱԿ-ն ինչո´ւ չմասնակցեց ընտրություններին, ապա այն ձևաչափը, որը սկսել էր ձևավորվել նախընտրական փուլում` ԲՀԿ-ՀՅԴ-ՀԱԿ, չկարողացավ վերջնական կազմակերպչական ձևավորում ստանալ: Լևոն Տեր-Պետրոսյանն իր հաշվարկներով գտավ, որ միայնակ չի կարող ցանկալի արդյունք ապահովել և հրաժարվեց: Ցավոք, ես դա չեմ արդարացնում: Իր իմիջը պահելու համար այդ ուժը պետք է իր թեկնածուն պաշտոնապես ունենար»,- ասաց Գարիկ Քեռյանը:
Հիշեցնենք, որ Հայաստանում մրցակցային ընտրությունների մասին բազմիցս նշել են միջազգային կազմակերպությունները, ազդեցիկ կառույցների ներկայացուցիչները:
«Մենք սպասում ենք նախագահական ընտրություններին և հուսով ենք, որ դրանք կլինեն թափանցիկ և արդար: Ակնկալում ենք, որ այդ ընտրությունների ժամանակ կապահովվի ամուր և արդար մրցակցությունը»,- ըստ «Արմենպրեսի»` նոյեմբերի 1-ին Գյումրի կատարած այցի ընթացքում ասել էր ՀՀ-ում ԱՄՆ արտակարգ և լիազոր դեսպան Ջոն Հեֆֆերնը:
© Medialab.am