ՀՀ վարչապետ Նիկոլ Փաշինյանի ավտոշարասյան մասնակցությամբ տեղի ունեցած վրաերթի գործով Երևանի ընդհանուր իրավասության դատարանում (Կենտրոն նստավայր) հոկտեմբերի 31-ին նախատեսված նիստը չի կայանա: Այս գործով մեղադրյալի պաշտպան Ռուբեն Բալոյանը այլ գործով նշանակված դատական նիստ ունի, ուստի խնդրել է դատարանին հետաձգել վրաերթի գործով նիստը ու նշանակել այլ օր:
Փաշինյանի ավտոշարասյան մասնակցությամբ տեղի ունեցած վրաերթի հետևանքով, հիշեցնենք, մահացել էր հղի Սոնա Մնացականյանը: Դեպքը տեղի էր ունեցել ապրիլի 26-ին Երևանի Լեոյի-Պարոնյան փողոցների խաչմերուկում: Այս գործով մեղադրյալը ՀՀ վարչապետի ավտոշարասյան ուղեկցող սպայական գումարտակի հրամանատար Արամ Նավասարդյանն է: Նրան մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով՝ ճանապարհային երթևեկության անվտանգության ապահովմանն ուղղված պահանջները խախտելը, որն անզգուշությամբ առաջացրել է մարդու մահ:
Պաշտպանական կողմը արդեն հստակեցրել է դատարանում իր մարտավարությունը: «Մենք պնդելու ենք, որ ուղեկցող գումարտակի վարորդը մեղավոր չէ: Ուղեկցողը իրավունք չունի կանգնել, անկախ նրանից՝ ինչ դեպք է տեղի ունեցել: Այդտեղ որևէ խախտում չկա: Ես կարծում եմ՝ վարորդը որևէ կապ չունի դեպքի հետ, մեղավոր է տուժողը (նկատի ունի՝ Սոնա Մնացականյանը – հեղ.)»,- «Մեդիալաբին» ասում է փաստաբան Ռուբեն Բալոյանը:
Նա ասում է՝ ինքը նման պնդում անելիս հիմնվում է փաստերի վրա, իսկ փաստերը գործի նյութերում առկա տեսանյութերն են, որոնք արձանագրել են դեպքը:
«Եթե տեսանյութերն ուշադիր նայեք, կտեսնեք՝ տուժողից մեկ քայլ առաջ այլ հետիոտն է անցնում, որն ընդամենը քայլերը մի փոքր արագացնում է ազդանշանի դեպքում, սակայն տուժողը անհասկանալի պատճառով ձեռքերը վեր պարզած հետ-հետ է գալիս, հենց այդ ժամանակ էլ տեղի է ունենում դեպքը»,- նշում է Բալոյանը:
Տուժողի իրավահաջորդի ներկայացուցիչ, փաստաբան Րաֆֆի Ասլանյանը իր հերթին դժգոհել էր նախաքննության ընթացքից և հայտարարել, որ թերի նախաքննություն է իրականացվել: Նա մասնավորապես դժգոհ էր, որ նախաքննությունը իրավական գնահատական է տվել միայն ՃՈ ուղեկցող գումարտակի մեքենայի վարորդ Արամ Նավասարդյանի գործողություններին, բայց շրջանցել է շարասյան ղեկավարի, կորտեժի պատասխանատու ղեկավարի գործողություններին իրավական գնահատական տալու հանգամանքը:
Բացի այդ, նա հայտարարել էր՝ ուղեկցող մեքենայի մեջ գործել է ռադիոկապ, որի ձայնագրությունները, սակայն ոչնչացվել են, թեպետ ոստիկանությունից պաշտոնապես պատասխանել են, որ ռադիոկապով խոսակցությունը չի ձայնագրվել տեխնիկական անսարքության պատճառով: Տուժող կողմի իրավահաջորդի ներկայացուցիչը պնդել էր, որ վարույթն իրականացնող մարմինը, այսինքն՝ Քննչական կոմիտեն, իր գործողություններում կաշկանդվածություն է ցուցաբերել:
Նախաքննության արդյունքներից ամբողջությամբ գոհ չէ նաև պաշտպանական կողմը, քանի որ նրանք պահանջում էին կարճել գործը, ազատել վարորդին քրեական պատասխանատվությունից:
Այս գործով դատավարությունը կանցկացվի դատավոր Կարեն Ֆարխոյանի նախագահությամբ:
Հասմիկ Համբարձումյան
MediaLab.am
