Կոտայքի մարզի Արտավազ գյուղում ապրող Ալինա Վարդանյանը ամուսնու մահից հետո արդեն 14 տարի միայնակ է հոգում ընտանիքի հոգսերը: Նա իր երկու երեխաների եւ սկեսրոջ հետ ապրում է գյուղի կիսաքանդ տանը, որը նախկինում որպես պահեստ է ծառայել:
Ինչպես ինքն է ասում, հիմնականում տղամարդու գործ է անում`անտառներում փայտ է կտրում, շինարարության վրա աշխատում, որպես էլեկտրիկ աշխատում:
«Տղամարդկանց հետ հավասար տան ֆունդամենտ եմ քանդել: Տղամարդիկ մի երկու լապատկա խփում էին ու չէին կարողանում առաջ գնալ, ես իրանց հետ հավասար քանդել եմ: Ախր ինչե~ր եմ արել, որ ոչ մի կին չէր անի»,- ասում է «Հայ Ձմեռ պապի» բարեգործական հիմնադրամի շահառու Ալինա Վարդանյանը, որին Արտավազ գյուղում «հերոս» անունն են տվել:
Այս տարի Ալինայի առողջական վիճակը վատացել է: Փորձում է նախորդ տարիների նման աշխատել, բայց այլևս չի կարողանում:
Ալինա Վարդանյանին օգնելու եւ հասարակության ուշադրությունը ՀՀ և ԼՂՀ գյուղերում բնակվող սոցիալապես անապահով ընտանիքներին օգնելու անհրաժեշտության վրա կենտրոնացնելու համար մայիսի 1–ին` ժ. 17:00-19:30-ը, Խուլերի միավորման սպորտային դահլիճում /Եզնիկ Կողբացու 69/ կկազմակերպվի ֆուտբոլային հանդիպում:
Հայաստանյան ինտերնետ հանրությունը և «Հայ Ձմեռ պապ» բարեգործական հիմնադրամը, համագործակցությամբ «Հայաստանի խուլերի միավորում» ՀԿ-ի և «Եվրասիա համագործակցություն» հիմնադրամի «Երիտասարդական բանկ» ծրագրի և «Երիտասարդական ակումբների դաշնություն» ՀԿ-ի կազմակերպած խաղին, ուր իրար դեմ դուրս կգան «RealMadrid.am» երկրպագուների ակումբն ու ֆեյսբուքյան «Ես նեռվային եմ» խումբը, նաեւ հանգանակություն կկազմակերպվի:
Խաղից առաջ կցուցադրվի «Հայ Ձմեռ պապ» բարեգործական հիմնադրամի ներկայացրած` Արտավազ գյուղում բնակվող Ալինա Վարդանյանի ընտանիքի պատմությունը (շուրջ 10 րոպե)` հիմնավորելով խաղից հետո կատարվելիք հանգանակության առաջարկը:
Հավաքված գումարը կծառայի Ալինայի առողջությունը վերականգնելու անհետաձգելի խնդրին:
© Medialab.am
