Շատ, շատ տոլմա: Բազմազան ու զանազան ու բացառապես հայկական:
Այս տարի եւս, ինչպես անցյալ տարի, հայ խոհարարները կզարմացնեն բոլորին տոլմայի տարատեսակությամբ եւ ճաշատեսակը պատրաստելու հմտությամբ:
Հուլիսի 11-ին, արդեն ավանդական դարձած «համեղ» միջոցառումը՝ «Տոլմայի համահայկական փառատոնը» կազմակերպվում է «Սարդարապատ» հուշահամալիրի հարակից տարածքում՝ «Հայ խոհարարական ավանդույթների պահպանում ու զարգացում» ՀԿ-ի նախաձեռնությամբ: Եփած, փաթաթած, ավանդական, նորարական մեթոդների կիրառությամբ, միջոցառման հատուկ տաղավարներում, հայ խոհարարները կզարմացնեն այցելուներին՝ հայկական ճաշատեսակի բույրը տարածելով շուրջբոլորը:
Այսօր կայացած մամլո ասուլիսում կազմակերպիչները նշել են, որ հուլիսի 11-ին բոլոր ցանկացողներին միջոցառման վայր կտեղափոխվեն Հանրապետության հրապարակից՝ հատուկ նախատեսված անվճար ավտոբուսներով:
Միջոցառման մեկնարկը կտրվի երեկոյան ժամը 18-ին: Նախատեսվում են համտեսումներ, ցուցադրություններ, մրցույթներ:
Ըստ կազմակերպիչների, տոլմայի փառատոնի կազմակերպման նպատակներից մեկը «աշխարհին հայկական խոհանոցը ներկայացնելն է»:
«Ադրբեջանցիներն ու թուրքերը պարբերաբար ոտնձգություն են անում մեր տոլմա ճաշատեսակի ազգային պատկանելիության վրա: Եվ հենց այս ամենի դեմ փոքր-ինչ պայքար մղելու համար, մենք որոշեցինք փառատոն կազմակերպել՝ նվիրված հենց տոլմային»,- լրագրողներին գաղտնիքները բացել է «Հայ խոհարարական ավանդույթների պահպանում ու զարգացում» ՀԿ-ի քարտուղար Վահե Անթանեսյանը:
Ըստ կազմակերպության տնօրեն Գարիկ Գևորգյանի, տոլմայի բազմաթիվ եւ բազմահամ տեսակները տեղում՝ տաղավարներում կպատրաստվեն եւ կմատուցվեն փառատոնի մասնակիցներին:
«Կներկայացվի տոլմայի ավելի քան 70 տեսակ: Դրանցից մեկը թոնրի տոլման է, որը շատ յուրօրինակ է: Այս տոմլան անցկացվում է խորովածի շշերով և կախվում թոնրում: Կա տոլմա, որը պատրաստվում է դդումի ծաղկի մեջ և այլն: Ներկաները կարող են վերցնել իրենց դուր եկած տոլմայի բաղդրատոմսը»,- նշել է Գարիկ Գևորգյանը:
Լուսանկարը՝ Փիրուզա Խալափյանի
Տես անցյալ տարվա փառատոնի «Մեդիալաբի» ֆոտոպատմությունը:
© Medialab.am