Ստեփանակերտի օդանավակայանի բացման վերաբերյալ նման հայտարարություն է արել ԼՂՀ վարչապետը` նշելով, որ ձգձգման պատճառը ոչ թե անվտանգության հարցն է, այլ անձնակազմի պատրաստվածությունը:
Այս մասին տեղեկացնում է Karabakh-open.info լրատվական կայքը:
Ըստ կայքի, երեկ ԼՂՀ կառավարության վերջին նիստի ժամանակ գործադիրի հավանությանն է արժանացել օդային փոխադրումներին առնչվող ընթացակարգերի պարզեցման ազգային կոմիտե ստեղծելու վերաբերյալ որոշման նախագիծը։
Նորաստեղծ կոմիտեին, որ կգլխավորի ԼՂՀ կառավարությանն առընթեր քաղաքացիական ավիացիայի վարչության պետը, հանձնարարվել է երկշաբաթյա ժամկետում գործադիրի հաստատմանը ներկայացնել կոմիտեի կանոնադրությունը, իսկ մեկամսյա ժամկետում` օդային փոխադրամիջոցներին առնչվող ընթացակարգերի պարզեցման ազգային ծրագիրը:
Նիստից հետո վարչապետի մամուլի ասուլիսի ժամանակ այն հարցին, թե ե՞րբ է լինելու թռիչքը Ստեփանակերտի օդանավակայանից եւ ինչո՞ւմն է խնդիրը ձգձգման, Արա Հարությունյանը հնչեցրել է ավանդական պատասխանը՝ «շուտով»։
«Օդանավակայանի շահագործման հետ կապված որեւէ խնդիր չունենք. ունենք կառուցված օդանավակայան, նավիգացիոն ժամանակակից համակարգ, ձեռք է բերվել օդանավ, վերապատրաստվել են օդաչուները»,-ըստ Karabakh-open.info-ի նշել է նա՝ հավելելով, որ խնդիրը ոչ թե քաղաքական անվտանգության, այլ մասնագետների պատրաստվածության հետ է կապված։ Վերջում վարչապետը համոզմունք է հայտնել, որ թռիչքը կլինի շատ շուտով։
Հիշեցնենք, որ Ստեփանակերտի օդանավակայանի շուրջ խոսակցությունները թեժացան այն բանից հետո, երբ Ադրբեջանը սկսեց սպառնալիքներ հնչեցնել` հավատացնելով, թե կոչնչացնի ԼՂՀ տարածքով թռիչքներ իրականացնող օդանավերը:
Ի պատասխան, անցյալ տարի մարտի 31-ին ՀՀ նախագահ Սերժ Սարգսյանը հայտարարեց, թե Երևան-Ստեփանակերտ ավիաթռիչքի առաջին ուղևորն ինքն է լինելու:
Սերժ Սարգսյանը Ադրբեջանի նման հայտարարությունները որակել է «մարազմ, հիվանդ մարդկանց ելույթներ, ժամանակավրեպ բաներ»։
«Ես հայտարարում եմ, որ առաջին չվերթի առաջին ուղեւորը լինելու եմ ես` Հայաստանի նախագահը»,-ասել է Սերժ Սարգսյանը:
© Medialab.am