Նոր չվերթներ, նոր հույսեր. «Արմավիայի» բացը կլրացնեն միջազգային ավիափոխադրողները

Նոր չվերթներ, նոր հույսեր. «Արմավիայի» բացը կլրացնեն միջազգային ավիափոխադրողները
Նոր չվերթներ, նոր հույսեր. «Արմավիայի» բացը կլրացնեն միջազգային ավիափոխադրողները
Հեղինակ MediaLab

Ձեռք բերված պայմանավորվածությունների շնորհիվ, առաջիկայում «Զվարթնոց» օդանավակայանից կավելացնեն չվերթները միջազգային ավիափոխադրողները, սրանով լրացնելով ապրիլի 1-ից սնանդ հայտարարված «Արմավիայի» ստեղծած «բացը»: Այս մասին քիչ առաջ հայտարարություն է տարածել «Արմենիա Միջազգային Օդանավակայաններ» ՓԲԸ-ն:
«Խիստ մտահոգված լինելով Արմավիա ավիաընկերության շուրջ ստեղծված իրավիճակից, չնայած մյուս շահագրգիռ կողմերի պես կրած կորուստներին, հայտնում ենք, որ մեր ընկերությունը շարունակում է ակտիվորեն աշխատել մյուս գործող ավիաընկերությունների հետ շուկայում առաջացած հնարավոր բացերը լրացնելու համար:

Մասնավորապես ուզում ենք տեղեկացնել, որ հետևյալ ավիաընկերությունների հետ ձեռք են բերվել պայմանավորվածություններ չվերթների ավելացման վերաբերյալ

Ավստրիական ավիաուղիները կսկսի իրականացնել շաբաթական 7 չվերթ

Չեխական ավիաուղիներ` 7 չվերթ

Ալիտալիան` 3 չվերթ

Հունիսի սկզբից չվերթերը կվերսկսի նաև լեհական ԼՈՏ ավիաընկերությունը` շաբաթական իրականացնելով 5 չվերթ:

Քննարկումներ են տարվում նաև այլ ավիաընկերությունների հետ` չվերթների հաճախականությունների ավելացման վերաբերյալ:

Ակնկալվում է Ֆլայ Դուբայ ավիաընկերության կողմից հաճախականությունը հասցնել մինչև ամենօրյա չվերթների իրականացում»,-նշված է «Արմենիա Միջազգային Օդանավակայաններ» ՓԲԸ-ի տարածած պաշտոնական հաղորդագրության մեջ:

Հիշեցնենք, որ «Արմավիայի» սնանկացման գործընթացը սկսել էր ապրիլի 1-ին: Նույն օրվանից ընկերությունը որոշում էր ընդունել դադարեցնել թռիչքները:

«Ավիացիան բնագավառ է, որտեղ չի կարելի կանգ առնել ձեռք բերվածի վրա: Երեք տարվա ընթացքում «Արմավիա» ավիաընկերության սեփականատերը այլ բիզնեսներից միջոցներ էր ներդնում «Արմավիա»-ի զարգացումը պահպանելու համար: Սակայն այսօրվա դրությամբ իրավիճակն այնպիսին է, որ շարունակել նման ձեւով այլեւս հնարավոր չէ, այդ իսկ պատճառով որոշում է ընդունվել դադարեցնել թռիչքները եւ սկսել սնանկացման ընթացակարգ», – նշված էր օրերս տարածած «Արմավիայի» հայտարարության մեջ:

«Արմավիայի» սպասարկաման որակից, տոմսերի գներից դժգոհ շատ քաղաքացիների մնում է հուսալ, որ միջազգային ավիափոխադրողների ակտիվությունը Հայաստանում գոնե ինչ-որ չափով կանդրադառնա գների վրա:

© Medialab.am