Հայ անվանի գրող Լեւոն Խեչոյանը չի ընդունել նախագահի կողմից ստացած մեդալը:
Ի պատասխան, lragir.am կայքի լրագրողի այն հարցին, թե ինչ է պատրաստվում անել Խեչոյանը շքանշանի հետ, այն բանից հետո, երբ օրեր առաջ բավականին կոշտ հայտարարությամբ էր հանդես գալիս` ի պաշտպանություն այն ազատամարտիկների, ովքեր հետ էին հանձնում իրենց շքանշանները, գրողը պատասխանել է.
«Ճիշտ է, ինձ համար էլ անակնկալ էր… Էլի իմ երկիրն է, էլի իմ հայրենիքին է, շնորհակալ եմ վստահության և մեդալի համար, սակայն այն չեմ կարող ընդունել, երբ այս չափերի արտագաղթ կա երկրում, երբ իմ եղբայր ազատամարտիկները, չդիմանալով սոցիալական ծանր պայմաններին, հենց այսօր էլ նստացույց են անում»,-ըստ լրատվամիջոցի, ասել է Լեւոն Խեչոյանը:
Հիշեցնենք, որ այսօր նախագահի հրամանագրերով Հանրապետության տոնի առթիվ պետական պարգևներ և կոչումներ են շնորհվել գիտության, կրթության, մշակույթի, առողջապահության ոլորտների մի խումբ ներկայացուցիչների: Սերժ Սարգսյանը շնորհավորել է պարգևատրվածներին Հանրապետության տոնի ու պետական բարձր պարգևներին և կոչումներին արժանանալու առթիվ և Նախագահի նստավայրում այսօր կազմակերպված պարգևատրման արարողության մասնակիցներին հանձնել պարգևները:
Լեւոն Խեչոյանն պարգեւատրվել է «Հայրենիքին մատուցած ծառայությունների համար» 2-րդ աստիճանի մեդալով:
© Medialab.am
