ԱԺ ՀՀԿ խմբակցության 58 պատգամավոր այսօր դեմ քվեարկեց չորս ոչ իշխանական խմբակցությունների ներկայացրած «Հայաստանի Հանրապետության գազամատակարարման ոլորտում 2011 թվականից պետական պարտքի և գազի գների ձևավորման ուսումնասիրության Ազգային ժողովի ժամանակավոր հանձնաժողով ստեղծելու մասին» որոշման նախագծին:
ՀՀԿ խմբակցության ղեկավար Գալուստ Սահակյանը նախքան քվեարկությունը կոչ արեց մեծամասնությանը դեմ քվեարկել այս նախագծին՝ նշելով, որ վերջին երկու օրերին խորհրդարանում ընդդիությունը «հիմնականում զազրախոսությամբ զբաղվեց»:
«Սա հնարավորություն է և Հայաստանի կառավարությանը, և բոլոր պատասխանատու մարմիններին ցույց տալ, որ պետք է պետականության նկատմամբ պատշաճ ձևով վարվել, պատասխաանտվություն ունենալ»,- նախքան քվեարկությունը հայտարարեց ՀԱԿ խմբակցության պատգամավոր Հրանտ Բագրատյանը՝ կոչ անելով կողմ քվեարկել նախագծին:
Նախագծին կողմ քվեարկած պատգամավորների թիվը 44-ն էր, դեմ քվեարկեց 58, ձեռնպահ՝ 3 պատգամավոր: Այսպիսով, խորհրդարանում գազի հարցով ժամանակավոր հանձնաժողով չի ստեղծվի:
Հիշեցնենք, որ ԱԺ չորս խմբակցությունների՝ ՀԱԿ-ի, ԲՀԿ-ի, Ժառանգության և ՀՅԴ-ի 49 պատգամավորներ առաջարկում էին ԱԺ ժամանակավոր հանձնաժողով ստեղծել՝ քննարկելու ՀՀ գազամատակարարման ոլորտում գոյացած 300 մլն դոլար պարտքի և գազի գների ձևավորման ուսումնասիրության վերաբերյալ հարցերը:
© Medialab.am