Իտալացի անկախ լրագրող և լուսանկարիչ Ռոբերտո Տրավանի ազդեցիկ ֆոտոպատմությունը Արցախից հուզել է բազմաթիվ մարդկանց՝ լուսանկարների միջոցով տեղափոխելով կրակի գոտի, որտեղ մարդկային հույզերն են, ողբերգությունը, կյանքն ու մահը կողք կողքի։
Լուսանկարիչ Տրավան, որը մասնագիտացած է սոցիալական լուսանկարչության և պատերազմների լուսաբանման մեջ, մեկնել է Արցախ՝ սեպտեմբերի 27-ից հետո Ադրբեջանի սանձազերծած մարտական գործողություններից հետո։
Սեպտեմբերի 27-ի վաղ առավոտյան Ադրբեջանի կողմից Արցախի դեմ սկսված ռազմական գործողությունների ընթացքում մեկ շաբաթ Ռոբերտո Տրավանը անցկացրել է Արցախի մայրաքաղաք Ստեփանակերտում։
Իր տպավորությունները փոխանցելով՝ նշել է, որ ի տարբերություն իր նախորդ պատերազմական ռեպորտաժների, սա ծանր աշխատանք էր։
«Քաղաքը պաշարվել էր ռումբերով, անօդաչու թռչող սարքերով։ Ես փորձեցի ուշադրությունս սևեռել բնակչության կյանքի սարսափելի պայմանների վրա։ Նրանք ստիպված էին ապրել մութ և խոնավ նկուղներում ադրբեջանական ռմբակոծություններից պատսպարվելու համար։
Այս աշխատանքը նվիրված է նրանց բոլորին»,- գրել է նա։
Նշենք, որ 2016-ին Ռոբերտո Տրավանն արժանացել էր Արցախի նախագահի մրցանակի՝ ընթացող հակամարտության վերաբերյալ լուսանկարների շարքի համար։
Լուսանկարների շարքն ամբողջությամբ՝ այստեղ։