«Հաց բերող» Արթուր Սարգսյանին իշխանություններն ազատ արձակեցին, քանի որ անհանգստացած էին նրա հացադուլով ու ստեղծված իրավիճակով: «Մեդիալաբի» հետ զրույցում նման դիտարկում արեց Հելսինկյան կոմիտեի նախագահ, իրավապաշտպան Ավետիք Իշխանյան:
«Ես կարծում եմ, որ նրանք իսկապես անհանգստացան: Չնայած Հայաստանում բոլոր տիպի շարժումներն ինչ-որ ժամանակ անց մարել են, բայց հավանաբար նրանք անհանգստացան, որ եթե այդ ամենն ավարտվեր Արթուր Սարգսյանի մահով, գուցե ամեն ինչ վերահսկողությունից դուրս գար»,- «Մեդիալաբին» ասում է Իշխանյանը:
Հիշեցնենք, որ 26 օր հացադուլի մեջ գտնվող Արթուր Սարգսյանը մարտի 6-ին ազատվել է կալանքից և Դատապարտյալների հիվանդանոց քրեակատարողական հիմնարկից տեղափոխվել «Արմենիա» բժշկական կենտրոն: Նրա նկատմամբ կալանաքը որպես խափանման միջոց փոխելու միջնորդությամբ հանդես էին եկել Ազգային ժողովի պատգամավորները, ովքեր 27 ստորագրությամբ դիմել էին Գլխավոր դատախազին: Պատգամավորներից յուրաքանչյուրը 500 հազար դրամ գրավ է վճարել «Հաց բերողի» ազատման համար:
«Սասնա ծռեր» զինված խմբին օժանդակելու մեջ մեղադրվող Արթուր Սարգսյանը առաջին անգամ կալանաքից ազատվել էր նախորդ տարվա դեկտեմբերի 31-ին: Նրան ազատելու որոշումը կայացվել էր այն բանից հետո, երբ փաստաբաններն ու իրավապաշտպաններն ահազանգել էին, որ Արթուր Սարգսյանը տառապում է Բեխտերևի հիվանդությամբ, ինչը, կառավարության որոշման համաձայն, անհամատեղելի է պատիժը կալանավայրում կրելու հետ:
Այս տարվա փետրվարի 9-ին, սակայն, Արթուր Սարգսյանի նկատմամբ դարձյալ որպես խափանման միջոց ընտրվեց կալանավորումը: Հատուկ քննչական ծառայությունը փետրվարի 9-ին ձերբակալել էր Արթուր Սարգսյանին, նույն օրը դատարանը նրան կալանավորելու որոշում էր կայացրել: Իսկ հիմքը այն էր, որ նա քննիչի պահանջով ժամանակին չի ներկայացել ՀՔԾ:
Համաձայն չլինելով իր կալանավորման որոշման հետ՝ Արթուր Սարգսյանը հացադուլ էր հայտարարել և մինչև վերջ պնդել իր պահանջը: Չնայած առողջական ծանր վիճակին ու բազմաթիվ հորդորներին՝ նա չդադարեցրեց հացադուլը:
Ավետիք Իշխանյանն ասում է, որ սա Հայաստանի պատմության մեջ 1988 թվականից սկսած տարբեր հացադուլների թվում առաջին ու եզակի դեպքն է, երբ մարդը հացադուլի է գնում որոշակի պահանջներով և հացադուլից դուրս չի գալիս մինչև իր պահանջների կատարումը:
«Սա աննախադեպ երևույթ էր: Ես հիանում էի նրա սկզբունքայնությամբ և անհանգստանում նրա կյանքի համար: Նրան կալանքի տակ պահելը աննորմալ երևույթ էր, իսկ խափանման միջոցը փոխելու վրա հիմնական ազդեցությունն ունեցան հենց իր հացադուլը, երկրորդը՝ բողոքները, այդ թվում՝ Սփյուռքից հնչող: Եվ այդ իրավիճակից դուրս գալու համար իշխանությունները գտան այս ձևը»,- ասում է Իշխանյանը:
Այդուհանդերձ իրավապաշտպանը չի կարծում, թե սա կարող է նախադեպ լինել հետագա դեպքերի համար:
«Սա նախադեպ չի դառնա, որովհետև ամբողջ Հայաստանի 25 տարվա պատմույթունը աչքիս առաջ է: Տարբեր դեպքեր են եղել, որ մեզ թվացել է, թե նախադեպ կլինեն, բայց չեն լինում»,- ասում է իրավապաշտպանը:
Իշխանյանը նաև նկատում է, որ տարբեր քաղաքական ուժեր նախընտրական այս ժամանակահատվածում փորձեցին օգտվել Արթուր Սարգսյանի ազատ արձակման գործընթացից:
«Նրանց մեջ, կարծում եմ, եղել են և անկեղծ մարդիկ, և եղել են մարդիկ, ովքեր փորձել են սրանով դիվիդենտներ շահել: Ամեն դեպքում անկախ ամեն ինչից ես համարում եմ դրական, որ թեկուզ նախընտրական շրջանը հաշվի առնելով՝ քաղաքական կուսակցությունները մի քիչ տեղից շարժվեցին»,- ասում է Ավետիք Իշխանյանը:
Ռոզա Հովհաննիսյան
MediaLab.am
