«Մեդիալաբի» հարցերին պատասխանում է ԱԺ ՀՀԿ խմբակցության ղեկավար Վահրամ Բաղդասարյանը:
– Պարո՛ն Բաղդասարյան, «Ընտանեկան բռնության կանխարգելման մասին» օրենքի նախագիծը բավականին բուռն քննարկումների և քննադատությունների տեղիք է տվել։ Անգամ նշում են, որ ԵՄ-ն է ճնշում այս նախագիծը կյանքի կոչելու համար։ Ի՞նչ կարծիք ունեք այդ նախագծի վերաբերյալ։
– Մենք այդ նախագիծը դեռ չենք քննարկել։ Իրոք, այդտեղ կան բավականին հարցեր, որը պետք է նաև մեր արժեհամակարգի, մեր մենթալիտետի հետ համապատասխանություն ունենա։ Միջազգային ստանդարտներին համապատասխանող օրենքները դոգմա չեն, որ բոլոր երկրները պետք է պարտադիր ընդունեն, և այդ պատճառով մենք պետք է դա լուրջ քննարկման առարկա դարձնենք։ Ազգային ժողովում մենք դեռ դա մանրակրկիտ չեն քննարկել, քննարկումից հետո կտանք դրա պատասխանը։
– Այսինքն՝ հնարավո՞ր է նախագծում փոփոխություններ կատարվե՞ն և արդյոք հնարավո՞ր է այն ընդհանրապես կյանքի չկոչվի:
– Դրա մասին կխոսենք քննարկումից հետո:
– Իսկ ինչո՞ւ է մի հատվածն այդքան ագրեսիվ տրամադրված: Ստամբոլցյանական թևը բավականին ագրեսիվ է տրամադրված: Քննարկմանը հետևե՞լ եք:
– Մի փոքր պատմական էքսկուրս կատարեմ. ստամբոլցյանական կողմը նախկինում մեր ամբողջ քիմիական հզոր արդյունաբերության կոմպլեքսն էր փակում, և հիմնականում տնտեսական արհավիրքները, տնտեսական խնդիրները, որ այսօր առաջացել են, այդ տարիներից են առաջացել: Այն ժամանակ նրանք կոչ էին անում, որ մենք միայն տուրիզմով և ջրով մեր երկիրը կպահենք: Այսինքն՝ միշտ չէ, որ այդ պնդումները լինում են օբյեկտիվ, և դրա արդյունքները մենք քաղեցինք տարիներ հետո: Մենք այս նախագիծը քննարկման առարկա կդարձնենք և ավելի մանրամասն կխոսենք:
– Նախագծի հետ կապված կոնկրետ ո՞ր դրույթներն են մտահոգիչ:
– Ասացի, որ մենք դա դեռ քննարկման առարկա չենք դարձրել: Բնականաբար, մանրամասն քննարկելուց հետո կխոսենք դրա մասին: Իհարկե, կլինեն դրույթներ, որոնք չեն համապատասխանի իմ անձնական կարծիքին, որովհետև, կրկնում եմ, մենք չենք կարող ասել, որ այսօր եվրոպական երկրների բոլոր արժեքները գնահատվում են, բոլորը չեն կարող ընդունելի լինել, մերժելի են մեր կողմից, մենք չենք կարող այդ օրենքները նույնությամբ ընդունել, որքան էլ մենք տարբեր կոնվենցիաների և համաձայնագրերի մասնակից լինենք, մենք պետք է նկատի ունենանք մեր ժողովրդի մենթալիտետը, մեր ազգային արժեքները, մեր արժեհամակարգը, և թե ի՛նչը կընդունվի, ի՛նչը չի ընդունվի հասարակության կողմից:
– Այս նախագծին դեմ եղողները խոսում են այն մասին, որ հայկական ավանդական ընտանիքները խարխլելու միտում կա: Ավանդական ընտանիքը ո՞րն է` ըստ Ձեզ:
– Իմ ընտանիքը ավանդական և ավանդապաշտ ընտանիք է:
– Ավանդական ընտանիք ասելով՝ ի՞նչ նկատի ունեք:
– Ավանդական ընտանիք ասելով՝ ես նկատի ունեմ ընտանիքի ամրությունը, երեխայի դաստիարակությունը որպես առաջնահերթություն, մեծի նկատմամբ ունեցած պատկառանքն ու հարգանքը, իր հայրենիքի նկատմամբ ունեցած նվիրվածությունը, անցյալների նկատմամբ հարգանքը և սերնդափոխության ժամանակ անցյալների պատմությունն իր ժառանգներին մատուցելը: Ավանդապաշտությունը մեկ նախադասությամբ անհնար է բնութագրել, իսկ հայ ազգի պահպանման և գոյատևման հիմնական արմատներից մեկը ամուր ընտանիքն է, և որևէ մեկը չի կարող ժխտել, որ հայ ժողովուրդն ընտանիքների ամրությամբ, ծնողների նկատմամբ ունեցած պատկառանքով տարբերվում է մյուս բոլոր ազգերից: Եվ մեզ մոտ այնպես չէ, որ 18 տարին լրանալուց հետո ծնողը երեխայի դաստիարակությամբ չի զբաղվում: Մեր ավանդապաշտության հիմնական գրավական է նաև այն, որ եթե երեխան մեծ մարդ է, և ծնողները ողջ են, նա խորհուրդ է հարցնում ծնողներից իր քայլերի համար:
– Անգամ եթե համաձայն չէ՞:
– Համենայն դեպս, խորհուրդ հարցնում է, դա շատ կարևոր բան է, դա պատկառանք է ծնողի հանդեպ: Ընդ որում, ընտանիքում մեծի նկատմամբ հարգանքը փոխանցվում է ազգերի մեծերի նկատմամբ ունեցած հարգանքի:
– Դուք բազմազավակ հայր եք: Երեխաների իրավունքների, ազատությունների հետ կապված` որքանո՞վ եք տալիս ազատություններ:
– Երեխաներն այդ տարիքում շատ սխալներ կարող են թույլ տալ, և, բնականաբար, կողմնակից, համամիտ չեմ երեխաներին մեծ ազատություններ տալուն: Այն բոլոր քայլերը, որոնք փոքր ժամանակ իմ ծնողներից թաքուն եմ արել, որոնց համար պատժվել եմ, հիմա շնորհակալություն եմ հայտնում իմ ծնողներին, որ նրանք հետևողական են եղել:
– «Զինապարտության և զինվորական ծառայության մասին օրենսդրական նոր կարգավորումների վերաբերյալ» քննարկմանը պաշտպանության նախարար Վիգեն Սարգսյանը ասաց, որ զինծառայողների 95 տոկոսը առաջնագծում ծառայություն է անցնում: Մնացածը 5 տոկոսն ովքե՞ր են` պաշտոնյաների՞ երեխաները, ծանոթ-բարեկամնե՞րը:
– Դուք կարծում եք, որ հարյուր տոկոսն էլ պետք է ծառայեն առաջնագծո՞ւմ: Եթե 10 հոգի էլ ծառայեն ոչ առաջնագծում, դուք պետք է ասեք` պաշտոնյաների որդիներն են: Օրենսդրական այս նոր կարգավորումներով այնպիսի պայմաններ են դրվում, հստակեցվում են, որ չեն կարող լինել պաշտոնյայի և ոչ պաշտոնյայի երեխաներ, բոլորը պետք է ծառայեն վիճակահանությամբ:
Մանե Հարությունյան
MediaLab.am
