Ներքաղաքական դաշտում իշխանություն-ընդդիմություն կենացները քաղցրանում են, թեև վերլուծաբանները պնդում են, թե երկուստեք արձագանքները «բնական են ստեղծված իրավիճակում»:
Դեկտեմբերի 18-ին` ՀՀԿ 20-ամյակի կապակցությամբ իր ելույթի ժամանակ, խոսելով երկրում առկա կոռուպցիայի և այլ արատավոր երևույթների մասին, նախագահ Սերժ Սարգսյանը դրական որակումներ տվեց ընդդիմությանը` այն գնահատելով որպես «բարեբախտություն»: Ընդդիմությունն իր հերթին չմոռացավ պատասխան «բաժակաճառը»:
«Առաջին խմբում մեր երկրի ու ժողովրդի բախտով անկեղծորեն մտահոգ անհատներ են, որոնք բարձրացնում են հարցեր, երբեմն՝ շատ սուր, վեր են հանում խնդիրներ, ահազանգ են հնչեցնում այնտեղ, որտեղ իշխանություններն ուշացել են»,- ասաց Սերժ Սարգսյանը:
Սերժ Սարգսյանն ասաց, որ միշտ պետք է հիշել, որ ընդդիմությունը մեր երկրի ու մեր քաղաքական դաշտի հարստությունն է, մեր զարգացման կարևորագույն խթաններից մեկը, իսկ «հանուն» գաղափարների շուրջ միավորված և լավ կազմակերպված ընդդիմությունը պարզապես բարեբախտություն է:
Ասվածին դեկտեմբերի 21-ին շտապեց արձագանքել իրեն հանրապետության միակ ընդդիմադիր ուժը համարող Հայ ազգային կոնգրեսը: ՀԱԿ-ի համակարգող Լևոն Զուրաբյանն ասել է, որ Սերժ Սարգսյանի վերջին ելույթը ավելի շատ ընդդիմադիր գործչի ելույթի էր նման, քան երկրի ղեկավարի:
«Սերժ Սարգսյանը հայտարարեց, որ պատրաստ է միանալ ՀԱԿ-ի պայքարին»,- ասաց Լևոն Զուրաբյանը:
Նրա խոսքով` իշխանությունները հասկացել են, որ կանգնած են կոլապսի առաջ, և առանց որևէ փոփոխության հետևանքները շատ ավելի աղետալի կլինեն:
«Հատկանշական է, որ Սերժ Սարգսյանը հասկացավ, որ նման խնդիրներ կան միայն նախագահության երրորդ տարում»,- ասել է Լևոն Զուրաբյանը:
Մինչդեռ փորձագետների կարծիքով` Սերժ Սարգսյանն ամենևին էլ չի պատրաստվում անցնել ընդդիմության կողմը: Նա պարզապես փորձում է լուծել իր առջև ծառացած խնդիրները:
«Միտք» վերլուծական կենտրոնի տնօրեն քաղաքագետ, Հրանտ Մելիք-Շահնազարյանի կարծիքով` իշխանական կուսակցության 20-ամյակին բնական է, որ պետք է փորձեին նախագծել հետագա անելիքները: Նա հավանական է համարում այն կարծիքը, թե Սերժ Սարգսյանի ելույթը նաև կապված է սպասվող ընտրությունների հետ:
«Այն մեղադրանքները, թե երկու տարի անգործությունից հետո իշխանությունը նոր է խոսում խնդիրների մասին, չեմ կիսում: Այստեղ ոչ թե անգործության, այլ հետևողականության խնդիրն է: Կարծում եմ` մեր իշխանություններին պակասում է հետևողականությունը»,- «Մեդիալաբին» ասում է Հրանտ Մելիք-Շահնազարյանը:
Փորձագետը նաև տրամաբանական է համարում ընդդիմությունը պայմանական մասերի բաժանելու նախագահի փորձը: Իր ելույթում նախագահն ընդդիմությանը բաժանել է երեք մասի` առաջին մասին որակելով որպես ժողովրդի բախտով անկեղծ մտահոգվածների, երկրորդին` միայն իշխանափոխության ձգտողների, իսկ երրորդը, ըստ նրա, իրականացնում է հայ ժողովրդին վարկաբեկելու հստակ ծրագիր:
«Այստեղ սակայն մի նկատառում ունեմ: Իմ տպավորությամբ` Սերժ Սարգսյանի խոսքում հիմնականում ասվում էր անհատ ընդդիմադիրների, այլ ոչ առանձին ուժերի մասին: Մինչդեռ ՀԱԿ-ն անմիջապես փորձեց օգտվել Սերժ Սարգսյանի ելույթից` իր համար տեղ բացելով քաղաքական դաշտում»,- ասում է Հրանտ Մելիք-Շահնազարյանը:
Իսկ ահա «Կովկաս» լրատվամիջոցների ինստիտուտի գիտաշխատող, քաղաքագետ Հրանտ Միքայելյանի կարծիքով` Սերժ Սարգսյանի այս ելույթը ոչ այնքան կապված էր գալիք ընտրությունների, որքան քաղաքական իրավիճակը կարգավորելու ցանկության հետ:
«Ինչ վերաբերում է իշխանությանը, ապա իհարկե, այն ցանկանում է նվազագույնի հասցնել լարվածությունը հասարակության մեջ, առաջին հերթին նրա համար, որպեսզի նվազեցնի իր հանդեպ ընդդիմադիր տրամադրվածությունը: Իշխանության ներքաղաքական շատ քայլեր պայմանավորված են հենց այս խնդրով»,- «Մեդիալաբին» ասում է Հրանտ Միքայելյանը:
Ինչ վերաբերում է ՀԱԿ-ին, ապա վերլուծաբանի կարծիքով, այն ուզում է ցանկալին ներկայացնել որպես իրական և ասել, որ իրենք վաղուց էին ասում այն, ինչ այժմ ասում է Սերժ Սարգսյանը:
«Այստեղ սակայն կա ևս մեկ գործոն` ճգնաժամը: Քանի որ այժմ տնտեսական աճ ապահովելու համար մեծ ջանքեր են հարկավոր, իշխանությունները ստիպված են կա´մ լրջորեն փոխել իրավիճակը, կա´մ էլ ամեն ինչի վերջը կգա: Եվ այստեղ մեծ նշանակություն ունի հասարակական կարգավորումը»,- «Մեդիալաբին» ասում է Հրանտ Միքայելյանը:
Լիաննա Խաչատրյան
© Medialab.am