Քոչարյանի փաստաբանները կարծում են, որ Վերաքննիչը կբավարարի խափանման միջոցը փոխելու իրենց միջնորդությունը

Քոչարյանի փաստաբանները կարծում են, որ Վերաքննիչը կբավարարի խափանման միջոցը փոխելու իրենց միջնորդությունը
Քոչարյանի փաստաբանները կարծում են, որ Վերաքննիչը կբավարարի խափանման միջոցը փոխելու իրենց միջնորդությունը

Վերաքննիչ դատարանը երկրորդ նախագահ Ռոբերտ Քոչարյանի խափանման միջոցի հարցով որոշումը կհրապարակի օգոստոսի 13-ին, ժամը 16:00-ին:

Դատարանը Քոչարյանի նկատմամբ կալանքը որպես խափանման միջոց կիրառելու առաջին ատյանի դատարանի որոշման դեմ վերաքննիչ բողոքը քննել է երկու օր՝ դռնփակ նիստում: Փաստաբանները միջնորդել են բեկանել առաջին ատյանի դատարանի որոշումը և գրավի դիմաց ազատ արձակել Ռոբերտ Քոչարյանին:

Ռոբերտ Քոչարյանը  ՀՀ հատուկ քննչական ծառայությունում քննվող՝ 2008թ․Մարտի 1-ի գործով մեղադրվում է սահմանադրական կարգը տապալելու մեջ։ Հուլիսի 27-ին դատարանը նրա նկատմամբ խափանման միջոց ընտրեց կալանավորումը: Պաշտպանական կողմը պնդում է, որ Քոչարյանի նկատմամբ քաղաքական հետապնդում է իրականացվում: Նույն դիրքորոշումն են հայտնել նաև ՀՀԿ-ն և ՀՅԴ-ն:

Բողոքի քննության երկու օրերին Քոչարյանը ներկա է եղել դատարանի դահլիճում, շարունակել է պնդել, որ ինքն անմեղ է, եւ ըստ նրա փաստաբան Հայկ Ալումյանի, «փայլուն» ելույթ ունեցել: «Ես նույնիսկ մտածում եմ՝ իմաստ ունի նրա ելույթի զգալի մասը հրապարակել»,- ասել է փաստաբանը՝ չմանրամասնելով, թե կոնկրետ ինչ է ասել Քոչարյանը՝ դա պայմանավորելով դռնփակ նիստի գաղտնիությունը պահպանելու անհրաժեշտությամբ:

Ըստ Ալումյանի, ձգձգման պատճառն այն է, որ դեռևս բավականաչափ փաստարկներ կան, որոնք դատարանում պետք է ներկայացնեն մեղադրող և պաշպանական կողմերը:

Քննության ավարտից հետո երկրորդ նախագահի փաստաբաններից Արամ Օրբելյանը լրագրողներին ասել է, որ իրենց ակնկալիքները դրական են: «Կարծում եմ՝ պետք է բավարարվի»,- ասել է փաստաբանը:

Նիստին զուգահեռ դատարանի առջև բողոքի ակցիա է անցկացրել «Երկիր ծիրանի» կուսակցության նախագահ, Երևանի ավագանու անդամ Զարուհի Փոստանջյանը՝ պահանջելով, որ Քոչարյանը մնա կալանքի տակ, ավելին՝ նրա դեմ ներկայացված մեղադրանքի ծավալն ընդլայնվի:

Ավելի վաղ, գլխավոր դատախազությունը մերժել էր Քոչարյանի խափանման միջոցը փոխելու վերաբերյալ Ազգային ժողովի 46 պատգամավորների միջնորդությունը:

Մարտի 1-ի գործով Ռոբերտ Քոչարյանից բացի ՀՀ քրեական օրենսգրքի նույն՝ 300.1-ին հոդվածի 1-ին մասով մեղադրանք է առաջադրվել նաև ՀՀ պաշտպանության նախկին նախարար Միքայել Հարությունյանին և ՀԱՊԿ գլխավոր քարտուղար Յուրի Խաչատուրովին: Միքայել Հարությունյանի նկատմամբ հետախուզում է հայտարարվել, իսկ Յուրի Խաչատուրովը 5 մլն դրամ գրավի դիմաց ազատ է արձակվել և վերադարձել Մոսկվա:

Մարտի 1-ի գործի շրջանակում արդարադատության իրականացմանը խոչընդոտելու մեղադրանք է առաջադրվել նաեւ 2008թ. դեպքերի ժամանակ ՀՀ ազգային անվտանգության խորհրդի քարտուղարի պաշտոնը զբաղեցրած Արմեն Գևորգյանին:   Նրա նկատմամբ որպես խափանման միջոց է ընտրվել ստորագրություն չհեռանալու մասին: