«Մեդիալաբի» հարցերին պատասխանում է Արցախի ԱԳ նախարար Դավիթ Բաբայանը
-Պարոն Բաբայան, Արցախում բողոքի ակցիաներ են տեղի ունենում, պահանջում են նախագահ Արայիկ Հարությունյանի հրաժարականը: Վերջինս էլ արդեն քաղաքական ուժերին խորհրդակցությունների է հրավիրում: Ինչպե՞ս եք գնահատում ստեղծված իրավիճակը, արտաքին մարտահրավերների տեսանկյունից սա որքանո՞վ է վտանգավոր:
-Առհասարակ, ժողովրդավարությունը բավականին ակտիվ քաղաքական համակարգ է, դրա համար նման բաներ տեղի են ունենում գրեթե բոլոր երկրներում: Այստեղ որևէ արտառոց բան չկա, հատկապես մեր պարագայում, այն ամենի լույսի ներքո, ինչ տեղի է ունեցել Արցախում:
Բայց այստեղ խնդիրն այն է, որ ես անձամբ՝ որպես քաղաքական ուժի ղեկավար և որպես հասարակության անդամ, կարծում եմ, որ անհրաժեշտ է ամեն ինչ անել, որպեսզի մեր երկիրը զարգանա էվոլյուցիոն եղանակով: Մեզ պետք չեն ներքաղաքական ցնցումներ, որևէ թշնամանք: Առանց այն էլ շատ ծանր վիճակում ենք:
-Այս իրավիճակը հրահրվում է ինչ-որ ուժերի կողմի՞ց, թե՞ ոչ:
-Ցանկացած քաղաքական գործընթաց կարելի է բաժանել երկու մասի՝ ինքնաբուխ և ուղղորդված: Այո՛, քաղաքական լուրջ գործընթացներ կարող են սկսվել ինքնաբուխ, հետո կարող են դառնալ ուղղորդված: Ժամանակը դա ցույց կտա: Բայց անկախ ամեն ինչից, մենք պետք է ունենանք ուժեղ իմունային համակարգ, որպեսզի էվոլյուցիոն կերպով դուրս գանք այդ ամենից: Երբ Արցախը պատրաստ կլինի ընտրությունների, այդ ժամանակ էլ կարելի է գնալ դրան:
Իսկ այսօր Արցախի նախագահի հրաժարականը կնշանակի ընդհանրապես գնալ գործադիր և օրենսդիր թևերի վերընտրությունների, որովհետև ավտոմատ կերպով նաև Ազգային ժողովն է ցրվում: Շատ յուրահատուկ իրավիճակում կհայտնվի նաև կառավարությունը:
Մենք այսօր պատրա՞ստ ենք գնալ դրան: Իհարկե, պատրաստ չենք, հազար ու մի հարց կա, որոնք պետք է լուծել: Ոչ թե ինչ-որ մեկը վախենում է ընտրություններից, մենք էլ ենք պատրաստ մեր ազգին ծառայելու և պայքարելու: Ո՞վ է ասել, որ մենք որևէ մեկից ավելի քիչ վաստակ ունենք կամ որևէ մեկից ավելի քիչ ներուժ ունենք:
Մենք պատրաստ ենք այդ պայքարին, բայց դա չի նշանակում, որ պետք է այնպես անենք, որ դա լինի մեր ներքին կայունության և Արցախի անվտանգության հաշվին:
-Կարո՞ղ ենք արձանագրել, որ սրանք Արցախի ներքին կայունությունը խաթարելու փորձեր են:
-Ես չգիտեմ՝ ինչի փորձեր են, դա ժամանակը ցույց կտա: Կարող է պարզապես ինչ-որ մարդկանց կարծիքը լինել, կարող են լինել ուժեր, որոնք ուզում են դիվիդենտներ շահել, այդ ամենն արդեն երկրորդական է:
Կարևորն այն է, որ պետք է այնպես անենք, որ լինենք ուժեղ: Հանկարծ այնպես չլինի, որ բանը հասնի ամբոխային փողոցակառավարման: Դա անթույլատրելի է: Քաղաքական ուժերը չպետք է թույլ տան, որ նման բան լինի, որովհետև մենք ունենք հասուն քաղաքական ուժեր:
-Նախագահի հրաժարականը պահանջողներին դուր չի եկել, որ նա այցելել է ՔՊ գրասենյակ, շնորհավորել Նիկոլ Փաշինյանին, թեև Արայիկ Հարությունյանը պարզաբանեց, որ հանդիպումներ է ունեցել տարբեր ուժերի ու առաջնորդների հետ: Դուք սխա՞լ եք համարում, որ այդպիսի հանդիպում է տեղի ունեցել և նման մեծ աղմուկի պատճառ դարձել:
-Արցախը պետք է բաց լինի բոլոր ներքաղաքական զարգացումների համար: Մենք պետք է արժեք լինենք հայության համար:
Հանդիպումներ պետք են, բոլորի հետ են պետք: Արցախն իսկապես պետք է լինի արժեք, եթե մենք դրան չհասնենք, վերջնականապես կործանվելու ենք, կորցնելու ենք մեր սուբյեկտայնությունը, չի լինելու նաև հայոց պետականության ապագան: Թող որևէ մեկը իլյուզիաներով չտառապի, որ առանց Արցախի Հայաստանը որևէ մեկին պետք է:
– Երեկ Արայիկ Հարությունյանը քաղաքական կոնսուլտացիաների առաջարկով հանդես եկավ: Կարծում եք՝ դրանով իրավիճակը կհանդարտվի՞:
– Ժամանակը ցույց կտա, կտեսնենք:
-Այս փուլում ընդհանրապես նոր ընտրություններ անցկացնելու շանս կա՞:
-Դե, դա է խնդիրը: Մենք ունենք 35 հազար փախստական, ունենք այնպիսի իրավիճակ, երբ բազմաթիվ ճանապարհներ կարող են թիրախավորվել հակառակորդի կողմից, նույնիսկ քարերով, սադրանքներ լինեն: Մենք պետք է պատրաստ լինենք:
Խնդիրն ընտրությունների մեջ չէ, նրա մեջ չէ, որ պետք է ընտրություններ լինեն: Հարցը ժամկետների մեջ է, և այնպես պետք է անել, որ իրավիճակը չբարդանա: Իսկապես այսօր ծանր վիրավորված է Արցախը:
-Այդուհանդերձ, պարոն Բաբայան, քաղաքական ո՞ր ուժերն են, որ հրահրում են այսպիսի զարգացումներ:
-Դա պարզ կլինի մոտ ապագայում, այսօր բոլորը հայտարարում են, թե դա ինքնաբուխ է՝ անկախ ամեն ինչից: Փողոցը չպետք է որոշի, թե պետությունը ոնց պետք է զարգանա: Մենք ունենք քաղաքական համակարգ, ունենք կուսակցություններ, և որևէ մեկը չի կարող ասել, որ ինքն ավելի մեծ վաստակ ունի, քան, օրինակ՝ մենք՝ Պահպանողական կուսակցությունը՝ համեստ, ինտելեկտուալ ներուժով ամենաբարձրերից մեկը: Էդ ո՞վ պետք է որոշի՝ մենք պե՞տք է մասնակցենք ընտրություններին, թե՞ ոչ: Դա կարող անել միայն օրենքը, մենք դրա կողմնակիցն ենք:
– Այս վիճակը ինչի՞ կհանգեցնի, եթե քաղաքական ուժերը խելքի չգան:
– Եթե ճիշտ քայլեր չկատարենք, իհարկե մեզ համար շատ վատ է լինելու: Ես չեմ ուզում, որ մեզ համար վատ լինի:
Մանե Հարությունյան
MediaLab.am