«Մեդիալաբի» հարցերին պատասխանում է Երևանի քաղաքապետի մամուլի խոսնակ Հակոբ Կարապետյանը
– Պարո՛ն Կարապետյան, Երևանի ավագանու հերթական նիստի ժամանակ քաղաքապետն ասաց, որ Աջափնյակում կա զինված «բանդա»: Կխնդրեմ մանրամասնեք՝ ի՞նչ «բանդայի» մասին է խոսքը:
– Թե ովքե՛ր են «բանդաները», կազմակերպիչները, ի՛նչ միջոցներ են կիրառում, կարծում եմ՝ այդ հարցերի պատասխանները կտան իրավապահ մարմինները: Քաղաքապետը պատկերավոր ձևով նկարագրել է այն իրավիճակն ու գործընթացը, որն առկա է:
Շատ կազմակերպված, գիշերվա ընթացքում՝ մի քանի ժամում, ընդ որում՝ բազմաթիվ մարդկանց միջոցով, այսպես ասած՝ թիկունքային ապահովում կազմակերպելով, մարդիկ անում են այդ գործը, և կան բավարար հիմքեր ենթադրելու, որ դա արվում է համակարգված ձևով: Չի բացառվում, որ որոշակի կառույցների մասնակցությամբ և թողտվությամբ է արվում այդ ամենը:
Հույս ունենք, որ իրավապահ մարմինները այդ ամենը կքննեն և բացահայտումներ կանեն, այնպես որ, անունները և այլ հանգամանքներ կներկայացնեն իրավապահ մարմինները:
– Այժմ ընթացող ապամոնտաժման աշխատանքներին այդ նույն «բանդան» չի՞ խոչընդոտում, դիմադրություններ չկա՞ն:
– Եթե ներկա լինեք քանդելու աշխատանքներին կամ նայեք մեր հրապարակած տեսանյութերը, այդ դիմադրությունը կտեսնեք: Գալիս են, մեքենաներով ծածկում են ապօրինի տարածքի շրջակայքը, որ տեխնիկան չկարողանա մոտենալ այդ շինությանը, կամ քանդման աշխատանքների ընթացքում իրենց մեքենան վնասվի, և իրենք փոխհատուցում պահանջեն:
Աղմկում են, կարգն են խախտում, տարատեսակ ձևերով փորձում են խոչընդոտել: Բայց դրանք ապարդյուն փորձեր են, որովհետև քաղաքապետարանը, ուզում եմ շեշտել, ոստիկանության գործուն աջակցությամբ հետևողականորեն շարունակելու է այս գործընթացը, մինչև որ մեր քաղաքացիների համար հստակ, պարզ լինի, որ այս գործընթացն անդառնալի է:
– Պարո՛ն Կարապետյան, ինչպե՞ս է ստացվում, որ մեկ գիշերում կարողանում են կառույց կանգնեցնել, սա ինչի՞ հետևանք է, իրավապահ մարմինների անհետևողականությա՞ն, այդ «բանդաների» հետ համագործակցությա՞ն:
– Քաղաքապետն ավագանու նիստին հանգամանալից ներկայացրեց, թե դա ինչպես է տեղի ունենում: 20, 30, 40 հոգով գալիս-կանգնում են: Եթե ահազանգ լինում է, ահազանգի հետքերով գնում են:
Բացի այդ, գիտեք՝ երկու-երեք աշխատակիցը ևս երկու-երեք ոստիկանի ուղեկցությամբ, երբ գնում են այդ մարդկանց դեմ, որոնք երբեմն ալկոհոլի ազդեցության տակ են, շատ հաճախ ագրեսիվ են և երբեմն քրեական ենթամշակույթին բնորոշ վարքագիծ են դրսևորում և արդեն իրենց իրավաբանների կողմից նախապես պատրաստված թղթեր են ցույց տալիս: Այդ պարագայում բավականին դժվար է այդ մարդկանց դեմ պայքարել:
Նշեմ նաև, որ տարիներ առաջ մշակված և մինչ օրս գործող օրենսդրությունը շատ ավելի ձեռնտու է իրավախախտների համար:
– Քաղաքապետարանն ինչու՞ ընտրություններից անմիջապես հետո սկսեց այս գործողությունն իրականացնել, ի՞նչն էր խանգարում դա անել մինչև ընտրությունները:
– Շատ պարզ է. ընտրություններից առաջ ոստիկանության զգալի մասը կենտրոնացած էր նախընտրական գործընթացների ժամանակ հասարակական կարգը պահպանելու վրա: Եթե դուք տեսնեք, թե հիմա միայն մեկ կրպակ քանդելու համար ինչ ծավալի ոստիկանական ուժեր են հատկացվում, միանգամայն պարզ կլինի: Հիմնական պատճառը սա է:
Բացի այս, ունենք նաև օրենսդրական խնդիր, որը դեռ լուծված չէ: Բայց հուսանք, որ շուտով լուծում կստանա, որովհետև իրավախախտները փորձում են շատ հմտորեն մանիպուլյացիայի ենթարկել օրենսդրությունը:
– Աջափնյակ վարչական շրջանի ղեկավարի հրաժարականի որոշումը կապ ունե՞ր այս գործընթացների հետ, պարո՛ն Կարապետյան:
– Իմ տեղեկություններով՝ նա դեռ հունիսից, գուցե նաև՝ մայիսից, մտադրություն ուներ հրաժարվել պաշտոնից և տեղափոխվել այլ աշխատանքի:
– Նման ապօրինի կառույցներ մայրաքաղաքում շա՞տ կան:
– Նմանատիպ կառույցներն առնվազն հարյուրներով են հաշվվում, և քաղաքապետարանն այս առումով դեռ շատ անելիքներ ունի: Բայց այնպես չէ, որ այդ աշխատանքը նոր է սկսվել կամ որևէ պահի դադարել է:
Այո՛, կրկնում եմ, նախընտրական գործընթացներով պայմանավորված՝ այդ գործընթացը մի փոքր բարդացել էր, բայց նույն Աջափնյակ վարչական շրջանում արդեն նախկին թաղապետի ձեռնարկած գործողությունների արդյունքում վերջին վեց ամսվա ընթացքում 34 ապօրինի կառույց է ապամոնտաժվել:
Քրիստինե Աղաբեկյան
MediaLab.am
