«Մարտական ենք տրամադրված, նոր խորհրդարանում հնարավորինս քիչ ենք ուշադրություն դարձնելու սադրանքներին». Արթուր Հովհաննիսյան

«Մեդիալաբի» հարցերին պատասխանում է ԱԺ «Իմ քայլը» խմբակցության պատգամավոր Արթուր Հովհաննիսյանը

Պարո՛ն Հովհաննիսյան, ինչպես հասկանում ենք Արայիկ Հարությունյանի խոսքից, ձեր քաղաքական թիմը դժգոհ է Հայկ Մարությանից: Ինչո՞ւ, ի՞նչ պետք է աներ քաղաքապետը, որ չի արել նախընտրական փուլում:

-Պարոն Հարությունյանը, վստահաբար, խոսել է քաղաքական թիմի հետ նույն տրամաբանությամբ քարոզարշավին և, առհասարակ, քաղաքական գործընթացներին, որոնք տեղի են ունեցել մինչ ընտրությունները, մասնակցելու մասին:

Ես էլ, թերևս, ցավում եմ, որ պարոն Մարությանը չի միացել մեզ քաղաքական պայքարում, սակայն դա նրա որոշումն է:

-Իսկ քաղաքական թիմո՞ւմ ինչ խմորումներ կան՝ Հայկ Մարությանի հետագա պաշտոնավարման հետ կապված:

-Ոչ մի խմորում էլ չկա՝ առնվազն խմբակցությունում: Քաղաքական թիմում խոսակցությունները եղել են նույն տրամաբանության մեջ, ինչն արտահայտել է պարոն Հարությունյանը, բոլորս էլ մեր ափսոսանքն ենք հայտնել, որ պարոն Մարությանը այս դժվարին փուլում չի միացել մեր քաղաքական պայքարին: Սրանից ավելի բան չեմ կարող ասել այսօր:

Յուրաքանչյուր մարդ ինքն է որոշում՝ մասնակցե՞լ ընտրական գործընթացներին, թե՞ ոչ: Մենք՝ որպես քաղաքական թիմի ներկայացուցիչներ, ուղղակի արտահայտել ենք մեր ափսոսանքը, թե ի՛նչ զարգացումներ կլինեն հետագայում, ցույց կտա հետագան, այսօր յուրաքանչյուրն իր տեղում շարունակում է կատարել իր աշխատանքը:

Պարո՛ն Հովհաննիսյան, այսինքն՝ ակնկալում էիք, որ քաղաքապետը և՞ս միանար քարոզարշավին ու հանրահավաքներին:

– Ես ուրախ կլինեի, որ պարոն Մարությանը ևս մասնակցեր և իր ներդրումն ունենար մեր պետության համար այս դժվարին իրավիճակում քաղաքական տրամաբանության մեջ: Իհարկե նա՝ որպես քաղաքապետ, իր աշխատանքն է իրականացնում է, որը կապ չունի քաղաքական գործընթացների հետ:

Իսկ պարոն Մարությանի այդ որոշման պատճառը ձեզ համար գոնե պա՞րզ է:

-Չեմ ուզում այս թեմային շատ անդրադառնանք, ես՝ որպես թիմակից, պարզապես, ինչպես պարոն Հարությունյանը, ափսոսանքս եմ հայտնում, դրանից ավելի որևէ բան չեմ կարող մեկնաբանել, ավելի ճիշտ՝ սրա վերաբերյալ որևէ խմորում չկա, որ մեկնաբանեմ:

-Հետագայում հնարավո՞ր է, որ քաղաքական թիմը քաղաքապետին անվստահություն հայտնի, քանի որ Հայկ Մարությանը չի մասնակցել նախընտրական ու ընտրական գործընթացներին:

-Մեր օրակարգում նման թեմա չի քննարկվել, որ ես էլ ասեմ՝ հավանական համարում եմ կամ չեմ համարում:

-Պարո՛ն Հովհաննիսյան, ձեր հետագա գործունեությունը կշարունակեք օրենսդիրու՞մ, թե՞ գործադիր մարմին կտեղափոխվեք:

– Օրենսդիրում կմնամ: Կիսատ մնացած գործեր կան՝ «Զանգվածային լրատվության մասին» օրենք կա, որը, ցավոք, կիսատ մնաց՝ պայմանավորված արտահերթ ընտրություններով, այդ գործը պետք է ավարտին հասցնել, այլ բազմաթիվ օրինագծեր կան այս պահին, որոնք պետք է առաջ տանել:

Իմ աշխատանքն ամբողջապես պատկերացնում եմ օրենսդիրում: Խմբակցության վերջնական կազմը մոտ օրերս պարզ կդառնա: Թիմով պետք է որոշենք, թե որ մեկս որտեղ ավելի արդյունավետ կաշխատի, հիմա գլխավորը կառավարման արդյունավետությունն է:

-Խմբակցության ղեկավարի մասով որոշումն արդեն կա՞, մամուլում շրջանառվող տարբեր անուններից ո՞րն է համապատասխանում իրականությանը:

-Մամուլում շատ անուններ են շրջանառվել: Առայժմ ձեր հարցին չեմ պատասխանի, իհարկե քննարկումներ կան, բայց դրանք կավարտվեն, նոր անուն կասենք, հիմա նպատակահարմար չէ:

-Ի վերջո, ձեր խմբակցությունը սահմանադրական մեծամասնություն կկազմի՞:

-Կենտրոնական ընտրական հանձնաժողովի վերջին տվյալների համաձայն՝ այո՛, ունենալու ենք:

-Ազգային ժողով անցած ընդդիմադիր երկու ուժերն էլ չեն ընդունում ընտրությունների արդյունքները և դիմել են Սահմանադրական դատարան՝ արդյունքներն անվավեր ճանաչելու նպատակով: Ինչպե՞ս եք մեկնաբանում այս գործընթացը:

-Մինչև ընտրություններն էլ մի քանի անգամ առիթ եմ ունեցել ասելու, որ կոնկրետ «Հայաստան» դաշինքը, ինչու չէ՝ «Պատիվ ունեմ» դաշինքը, քարոզարշավի ընթացքում և դրանից առաջ ամեն ինչ անում էին, որ ստեղծեին կեղծ իրականություն, որում հնարավորություն կլիներ ստվեր գցել ընտրությունների անցկացման և արդյունքների վրա:

Գործնականում նրանք արեցին այն, ինչ կանխատեսելի էր, այսինքն՝ պրիմիտիվ քայլ է արված, բայց բոլորս էլ տեսնում ենք, որ բոլոր քրեական գործերը՝ կապված ընտրական հանցագործությունների հետ, հարուցված են այդ երկու դաշինքի անդամների կամ նրանց շտաբների պետերի դեմ: Եվ հենց այս իրականության մեջ նրանց կողմից ընտրությունների արդյունքները վիճարկելն առնվազն ծիծաղելի է:

Այսինքն՝ սա նախօրոք պլանավորված սցենար է, որը իրականացնում են հիմա: Բայց ես վստահ եմ, որ սա որևէ արդյունք չի տալու, որովհետև ընտրություններն անցել են թափանցիկ, ժողովրդավար, և այստեղ որևէ խնդիր չի կարող առաջանալ: Իսկ արձանագրված հիմնական խախտումները տեղի են ունեցել հենց այդ ուժերի կողմից:

-Ընդդիմությունն էլ ձեր թիմին է մեղադրում ուղղորդելու և այլ ընտրախախտումների համար, հատկապես՝ զինվորականների մասով են ասում, որ ունեն ապացույցներ, որ իշխանությունը ուղղորդել է նրանց: Չե՞ք ընդունում այս մեղադրանքները:

-Ոչ թե չեմ ընդունում, այլ ասում եմ, որ նրանք սուտ են ասում և պլանավորված սուտ են խոսում, ինչպես միշտ: Այն իրականության մեջ, երբ բոլորս էլ գիտենք, որ մի շարք համայնքներում շարունակում են պաշտոնավարել համայնքների ղեկավարներ, որոնք ծառայում են այդ երկու դաշինքի անդամներին ու նրանց տերերին, ինչպե՞ս եք պատկերացնում մեր կողմից վարչական ռեսուրսի օգտագործում: Սա հնարավոր չէր, բայց մենք դա չէինք էլ անի, քանի որ այն դեմ է մեր արժեքներին:

-Պարո՛ն Հովհաննիսյան, քաղաքական թիմն արդեն կայացրե՞լ է ձեր նշած համայնքների ղեկավարներից ազատվելու որոշում:

-Կարծում եմ՝ բոլոր համայնքների ղեկավարները, որոնք փորձել են ապօրինի ճանապարհներով ազդել քաղաքացիների ընտրելու իրավունքի վրա, բոլոր նրանք, ովքեր նախորդ տարիների ընթացքում արել են ամեն բան, որ իրենց համայնքները չզարգանան՝ այդկերպ դժգոհություն գեներացնելով գործող իշխանության դեմ, պետք է օր առաջ լքեն իրենց պաշտոնները, որովհետև այդ տեղերն այդ մարդկանց համար չեն, և այդ մարդիկ այդ տեղերում ժամանակին նշանակվել են Հանրապետական կուսակցությանը ծառայելու ու նրանց համար ձայներ ապահովելու համար: Այդպիսի գյուղապետներ մեզ և ժողովրդին պետք չեն:

-Ինչպե՞ս եք պատկերացնում ձեր համատեղ աշխատանքը խորհրդարանի նոր կազմով:

-Կարծում եմ՝ ընդդիմությունն էլի փորձելու է տեղեկատվական տիրույթում հնարավորինս մանիպուլյատիվ ու ֆեյք տեղեկություններ գեներացնելով՝ դժգոհություն առաջացնել իշխանության նկատմամբ:

Խորհրդարանում բարդ է լինելու, համագործակցություն չեմ պատկերացնում, բայց մենք մարտական ենք տրամադրված՝ աշխատելու առումով, և հնարավորինս քիչ ենք ուշադրություն դարձնելու սադրանքներին: Գալիս ենք, որ մեր կողմից հնչեցրած պողպատյա տրամաբանության մեջ աշխատենք:

– Իշխանության բոլոր գործողությունները հետայսու բխելու են այդ պողպատյա մանդատի տրամաբանությունի՞ց:

– Միանշանակ, միանշանակ:

– Դրանք լինելու են միմիայն օրենքի շրջանակներո՞ւմ, թե՞ որոշ դեպքերում այն գործելու է նաև օրենքից դուրս, պարո՛ն Հովհաննիսյան:

– Մենք հայտարարել ենք, որ Հայաստանի Հանրապետությունում օրենքի դիկտատուրա է լինելու, և դա առաջին հերթին վերաբերում է մեզ:

Քրիստինե Աղաբեկյան

MediaLab.am