«Մեդիալաբի» հարցերին պատասխանում է ԱԺ պատգամավոր, «Պատիվ ունեմ» դաշինքի պատգամավորի թեկնածու Թագուհի Թովմասյանը
– Տիկի՛ն Թովմասյան, «Պատիվ ունեմ» դաշինքը պատրաստվում է դիմել Սահմանադրական դատարան՝ արտահերթ խորհրդարանական ընտրությունների արդյունքներն անվավեր ճանաչելու պահանջով: Կենտրոնական ընտրական հանձնաժողովն (ԿԸՀ) այս նույն պահանջով դիմումը մերժեց, ի՞նչ սպասելիքներ կան ՍԴ-ից:
-Սահմանադրական դատարան դիմելը Հայաստանի քաղաքական կյանքում տարիներ շարունակ ոչ միայն ընկալվում է որպես իրավական, այլ նաև ընտրախախտումների դեմ պայքարի քաղաքական ուղի: ՍԴ չդիմելը կնշանակի լուռ համաձայնել արձանագրված կեղծիքների հետ:
Իսկ որ եղել են ակնառու ընտրախախտումներ, իշխանության կողմից վարչական լծակների անթաքույց կիրառման դեպքեր, պետական համակարգի, զինվորականների և մյուս ուժային կառույցների ծառայողների ուղղորդված քվեարկություններ, կարծում եմ՝ որևէ մեկի մեջ կասկած չկա:
Հետևաբար՝ ԿԸՀ մերժումը չպետք է խանգարի ՍԴ դիմելու գործընթացին: ՍԴ-ն ընտրախախտումների ուսումնասիրության համար հարուստ նյութ կստանա. տեսնենք՝ ի՛նչ վճիռ կկայացնեն:
-Ինչո՞ւ «Հայաստան» դաշինքի հետ միասին չեք դիմել ՍԴ, խնդիրներ կա՞ն այս քաղաքական ուժի հետ:
– Բացարձակ որևէ խնդիր չկա «Հայաստան» դաշինքի հետ:
-Իշխանության ներկայացուցիչները ծիծաղելի են համարում, որ հենց ձեր կամ «Հայաստան» դաշինքն է որոշել դիմել ՍԴ՝ պատճառաբանելով, որ ընտրախախտումների հետ կապված քրգործեր հարուցված են ձեր քաղաքական թիմի ներկայացուցիչների դեմ, ձեր թիմն է ընտրակաշառք բաժանել: Ձեր մեկնաբանությունը, խնդրեմ:
-Ծիծաղելին այն է, որ ընտրախախտումների դեմ պայքար մղող գործիչները, նախին քաղհասարակության ներկայացուցիչները, այսօր լինելով իշխանության մեջ, չեն նկատում այն աղաղակող ընտրախախտումները, որ արվում են հեղափոխական իշխանության կողմից:
Այն, ինչ մերժում էր գործող իշխանությունը ընդդիմադիր եղած տարիներին, այսօր անում է իր ձեռքով, բայց՝ այլ բացատրությամբ: Ընտրախախտումները եղել են, կան նաև այսօր:
-Տիկի՛ն Թովմասյան, եթե ՍԴ-ն էլ չբավարարի դիմումի պահանջը, ի՞նչ եք անելու, խորհրդարան կգնա՞ք:
-Ես կարծում եմ, որ ընդդիմությունը խորհրդարանում լուրջ անելիք ունի, և պատգամավորական մանդատները վերցնելն ու խորհրդարան գալը միանշանակ ամենաճիշտ քայլն են:
Ինչո՞ւ, որովհետև մանդատները չվերցնելով՝ չի պարալիզացվում խորհրդարանի գործունեությունը, և իրավական որևէ խոչընդոտ մեծ հաշվով չի ստեղծվում իշխանության համար: Պարզապես ընդդիմությունն է զրկվում խորհրդարանի ամբիոնից, ինչը, կարծում եմ՝ անթույլատրելի է:
-Թիմը, որի երբեմնի անդամն էիք, ասում է, որ իրենք ստացել են պետական համակարգում կադրային ջարդ անելու մանդատ և անելու են: Նորմա՞լ երևույթ է սա, ի՞նչն էր խանգարում հեղափոխությունից հետո այդ ջարդն անել ձեր նախկին թիմին:
-Ես իմ նախկին գործընկերներին մշտապես ասել եմ. հանրային համերաշխությունը, հանդուրժողականությունը և միասնականությունը պետք է լինեն իշխանության գործունեության առանցքը: Վենդետան, կադրային ջարդը, անվերջ անցյալին նայելը մեզ կխոչընդոտեն առաջ գնալ: Իսկ 21-րդ դարն առաջ է շարժվում, և մենք պարտավոր ենք առաջ գնալ:
Առաջ գնալու համար իշխանությունը պարտավոր է չհասկացվածության բոլոր սուր անկյունները կոտրել և համերաշխության միջավայրում ստեղծարար աշխատանք իրականացնել: Այլապես՝ մեր երկրում խնդիրները կավելանան՝ պակասելու փոխարեն: Իսկ մեզ այսօրվա խնդիրներն էլ բավարար են:
Քրիստինե Աղաբեկյան
MediaLab.am
