72-ամյա Շուշանիկ Դավթյանն ամեն տարի մայիսի մեկին վերցնում է խորհրդային իշխանության խորհրդանիշ հին դրոշակն ու Արտաշատ քաղաքից գալիս է Երեւան՝ աշխատավորների օրվան նվիրված երթին մասնակցելու համար:
Հայաստանի կոմունիստական կուսակցության (ՀԿԿ) 56 տարվա անդամը հպարտանում է շարքային բանվորի 45 տարիների իր աշխատանքով: Նա համոզված է՝ Հայաստանում գործազրկության խնդիրը կլուծվի միայն այն դեպքում, երբ ՀԿԿ-ն հայտնի Ազգային ժողովում:
«Սիրում եմ մեծերին, սիրում եմ մատաղ սերունդին, տանջվում եմ իրանց համար, գիշեր ցերեկ քուն չունեմ, որ սովետական իշխանությունը կյանք ստեղծեց, էս ավազակները եկան, թալանեցին: Կոմունիստները ձեռից բաց թողին, բայց որ հաջողվի գնան ԱԺ, շատ բան կփոխեն, քանի որ մեր ժողովուրդը մեղք է՝ 23 տարի աղքատության մեջ է»,- «Մեդիալաբին» ասում է Դավթյանը, ով միայնակ է ապրում՝ մշակելով բալի, գիլասի, տանձի, փշատի տասնյակ ծառերն ու հատապտուղներն իր հողամասում:
Դավթյանը ՀԿԿ-ի այՆ 20000 անդամներից մեկն է, որ ամեն տարի մասնակցում են մայիսի մեկին նվիրված երթին. խորհրդային ժամանակներին բնորոշ գլխարկներով ու փողկապներով դպրոցականներ, խորհրդային տարիների հիթ-երգեր նվագող փողային նվագախումբ, տարբեր պատվո շքանշաններով տարեց մարդիկ ամեն տարի բարձր ծածանում են կարմիր դրոշներ՝ հավատալով, որ խորհրդային տարիները վերադառնալու են:
Այս տարի ավանդական երթը ուղեկցվում էր նաեւ նախընտրական քարոզով: Կուսակցության նախագահ Ռուբեն Թովմասյանը ժողովրդին էր ներկայացնում իր ծրագրերն ու նպատակները:
«Հանդիպումները քաղաքացիների հետ ցույց են տալիս, թե ոնց են փայլում մարդկանց խամրած աչքերը, երբ խոսում ենք Սովետական ժամանակների մասին: Մարդը մի տեսակ վերակենդանանում է»,- «Մեդիալաբին» ասում է Թովմասյանը:
Նա համոզված է, որ իրենք կհայտնվեն Ազգային Ժողովում, թեպետ տարիների ընթացքում նրանց շարքերը պակասում են՝ մեծահասակները հեռանում են կյանքից, իսկ երիտասարդները՝ երկրից:
«Առաջինը սահմանդրությունը ամբողջությամբ կփոխենք, երկրորդը՝ ռազմավարական բոլոր ճյուղերը կազգայնացնենք: Աստված բնությունը ժողովրդին է տվել՝ պղինձը, ոսկին, այս բոլորը պետք է գտնվի պետության ձեռքին, որ պետությունը կարողանա ապահովել առողջապահության, կրթության եւ այլ կարեւոր բնագավառների անվճար լինելը: Այնպես կանենք, որ ժողովուրդը իրավունք ունենա պատգամավորին հետ կանչել սխալ գործելակերպի պարագայում, կբացառանեք հողի առք ու վաճառքը, որ չառաջանա ֆեոդալական հասարակություն՝ «Տերն ու ծառան» կինոյի նման»,- հայտարարեց Թովմասյանը:
Մեդալակիր պապիկները հիշում են, որ խորհրդային տարիներին երկաթգիծ է եղել, բնակարաններ են տվել մարդկանց, աշխատանքով են ապահովել: Այս ամենն են նրանք ուզում տեսնել՝ կանգնելով ՀԿԿ կողքին:
Կուսակցության Արթիկի ներկայացուցիչ Վրեժ Սահակյանն ասում է, որ այն ամենը ինչ այժմ տեսնում են քաղաքում, կառուցվել է խորհրդային տարիներին, իսկ նոր իշխանության ժամանակ լճացում է:
«Ծխող չեմ եղել, խմելուց հեռու եմ ու ամբողջ կյանքում աշխատել եմ ու դրա համար տղաներիս համար երեք տուն եմ կառուցել» ,- հպարտանում է Արթիկի շրջանի բնակիչ Գեւորգ Սարգսյանը՝ նշելով, որ այժմ նման բան իր տղաները դժվար թե կարողանան անել իրենց երեխաների համար:
Կուսակցության ղեկավարները նշում են՝ իրենց անդամների 30 տոկոսը 15- 50 տարեկան երիտասարդներն են: ՀԿԿ Երիտասարդական թեւի ղեկավար 42-ամյա Երջանիկ Ղազարյանը «Մեդիալաբին» ասում է, որ երիտասարդներն ավելի են համոզվում, որ «ճիշտը սոցիալիստական գաղափարախոսությունն է»:
«Նրանք հասկանում են, որ խորհդրային համակարգն է, որ երիտասարդներին տալիս էր մեկնարկային հավասար հնարավորություններ, տալիս էր անվճար բնակարանի հնարավորություն, կրթության, աշխատանքի ու հանգստի հնարավորություն: Հիմա տալիս են միայն գործազրկություն ու արտագաղթ»,- համոզված է Ղազարյանը:
Կարինե Իոնեսյան
Լուսանկարները` Փիրուզա Խալափյանի
© Medialab.am