«Դեռ նոյեմբերի սկզբին եմ զանգել Ծաղկաձորի «Էլեգանտ» հյուրանոց, որտեղ թե՛սենյակները, թե՛ քոթեջները սպառված էին, ազատ տեղեր չկային: Մեկ ազատ ստանդարտ համար էր մնացել, որտեղ վեց օր մնալու համար պետք է վճարեինք 1 մլն 80 հազար դրամ»,- «Մեդիալաբին» ասում է Երևան քաղաքի բնակչուհի 31-ամյա Անի Պողոսյանը, որը ցանկացել է 5 հոգանոց ընտանիքի հետ ամանորյա հանգիստն անցկացնել քաղաքից դուրս:
Ծաղկաձորի «Սայա» հյուրանոցում էլ Անիին առաջարկել են վեց օրվա համար վճարել 700 հազար դրամ, բայց գումարի մեջ սնունդը ներառված չի եղել:
«Ծաղկաձորի բարձր գների, նաև ազատ տեղեր չլինելու պատճառով, որ կարողանայինք մեր սրտով համար ընտրել, ամուսնուս հետ որոշեցինք ամանորյա արձակուրդն անցկացնել Սևանի հյուրանոցներից մեկում»,- ասում է Անին:
Սևանի հյուրանոցային համալիրի քոթեջը, որտեղ նախընտրել է Անին անցկացնել ընտանեկան հանգիստը, ընտանիքը կարողացել է վարձակալել 90 հազար դրամ օրավարձով, որն իր մեջ ներառել է միայն նախաճաշը: Ստանդարտ համարների օրավարձն այդ հյուրանոցում սկսվում է 40 հազար դրամից:
Սակայն, ամառվա լավագույն հանգստի ուղղություն համարվող Սևանա լիճն իր հյուրանոցներով և հյուրատներով, ձմռան և Ամանորի նախաշեմին այնքան էլ մրցունակ և նախընտրելի չէ Նոր տարին դրսում նշել ցանկացողների համար։
Սևանն այս շրջանում պահանջված ուղղություն չէ, նախընտրելի ուղղություններ են Դիլիջանը, Աղվերանը, Ծաղկաձորը, Գյումրին ու Գորիսը: Այս ուղղություններով հյուրանոցներում ու հյուրատներում այս օրերին՝ Ամանորից մեկ ամիս առաջ, ազատ տեղեր գտնելն այնքան էլ հեշտ չէ։
«Վանաձոր, Գորիս, Գյումրի՝ այսօր, որպես ամանորյա փաթեթ, առաջարկում ենք միայն այս ուղղությունները: Ընտրվել են այս երեքը, որովհետև բավականին ակտիվ են, ու մի քանի տարի է՝ իրականացնում ենք այս ուղղություններով տուր փաթեթներ, ու բավականին մեծ արձագանքներ կան»,- «Մեդիալաբին» ասում են «Ուան վեյ տուր» տուրիստական գործակալությունից, որը Հայաստանում այն քիչ գործակալություններից է, որ իրականացնում է և՛ արտագնա, և՛ ներգնա տուրեր:
Գործակալության խոսքով՝ այս տարի Դիլիջան, Ծաղկաձոր, Աղվերան ուղղությունները չեն ընդգրկել, փոխարենն առաջարկում են Վանաձոր, Գորիս, Գյումրի ուղղությունները:
Երկու գիշեր, երեք օր տարբերակով տուր փաթեթը Վանաձորի պարագայում արժի 79 հազար դրամ, Գյումրիինը՝ 69 հազար դրամ, իսկ Գորիսինը՝ 95 հազար դրամ, որն իր մեջ ներառում է երեքանգամյա սնունդ, ի տարբերություն նախորդ երկուսի, որոնցում միայն նախաճաշն է ներառված գումարի մեջ:
Պայմանավորված հանգամանքով, որ այս տարի ամանորյա հանգստյան օրերը կրճատվեցին, և այս տարի ոչ աշխատանքային կլինի դեկտեմբերի 31-ից հունվարի 3-ը ներառյալ, առաջարկվող ամանորյա փաթեթները հենց երեք օրով են տրամադրվում:
«Դիլիջան-պարկ ռեզորթ» հյուրանոցում, որտեղ մարդիկ ամանորյա ամրագրումներն անում են դեռ նոյեմբերի սկզբից, այս պահին շատ քիչ ազատ տեղեր են մնացել:
«Ստանդարտ համարները՝ երկու անձի համար, երեքանգամյա սնունդով և տոնական ընթրիքով, արժի 350 հազար դրամ: Կախված սենյակի դասակարգումից ու փաթեթում ներառվածից՝ արդեն արժեքը բարձրանում է: Փաթեթը հիմնականում երեքօրյա է, ցանկության դեպքում՝ կարող են երկարաձգել»,- «Դիլիջան-պարկ ռեզորթ» հյուրանոցի ադմինիստրացիայի բաժնից ասում են «Մեդիալաբին»:
«Աղվերան Արարատ ռեզորթ» հյուրանոցում, որտեղ մնացել է ընդամենը երկու-երեք ազատ տեղ, ևս ամանորյա եռօրյա փաթեթ են առաջարկում:
«Փաթեթները տարբեր են ու սկսվում են 410 հազար դրամից՝ երկու անձի համար: Ներառում է երկուանգամյա սնունդ: Կախված արդեն փաթեթներից՝ արժեքներն ավելանում են»,- «Մեդիալաբին» ասում են հյուրանոցի ադմինիստրացիայից:
Ծաղկաձորի «Ռոսիա» հյուրանոցում, որտեղ ազատ տեղեր չկան դեռ նոյեմբերի սկզբներից, գործում է վեցօրյա ամանորյա փաթեթ:
«Երկու անձի համար ստանդարտ համարում հանգիստն արժի 800 հազար դրամ, որն իր մեջ ներառում է երեքանգամյա սնունդ ու ծառայությունները, նաև Զատիկի նշում:
Հաջորդաբար՝ կիսալյուքս համարներն արժեն 1 մլն 200 հազար դրամ, դելյուքս համարները՝ 1 մլն 300 հազար, լյուքսը՝ 1 մլն 800 հազար, իսկ նախագահականները՝ 2 մլն 100 հազար դրամ:
Ընտանեկան փաթեթը՝ չորս անձի համար, արժի 1 մլն 200 հազար դրամ, իսկ ընտանեկան մի փոքր մեծ բաժինը՝ 1 մլն 400 հազար դրամ»,- «Ռոսիա» հյուրանոցի ադմինիստրացիայի բաժնից ասում են «Մեդիալաբին»:
Քրիստինե Աղաբեկյան
MediaLab.am
