«Ժառանգություն» կուսակցության անդամ Ստեփան Սաֆարյանը ցավակցել է հաշված ժամեր առաջ հոսպիտալում մահացած բժիշկ Վահե Ավետյանի ընտանիքին:
Հիշեցնենք, որ իշխանական ՀՀԿ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում հունիսի 17-ին ծեծի ենթարկված ՀՀ ՊՆ Երևանի կայազորի հոսպիտալի ուրոլոգիայի բաժնի պետ, մայոր Վահե Ավետյանը կյանքի ու մահվան հետ կռիվ տալուց հետո այսօր հիվանդանոցում մահացել է:
«Խորին ցավակցություններս Վահե Ավետյանի ընտանիքին ու հարազատներին: Պինդ կացեք ու մխիթարվեք Վահեի հիշատակի հավերժությամբ, ով այլեւս ապրելու է Ձեր հետ, ձեր հիշողություններում ու մտքերում,-իր գրառման մեջ նշում է Ստեփան Սաֆարյանը:
Նա նշում է, որ Վահեի մոր ու քրոջ նման անկեղծորեն հավատում էր հրաշքին, որ Վահեն կապաքինվի: Սակայն նա մահացավ, քան որ «չկարողացանք պաշտպանել նրան»:
«Մեր երկրում մարդիկ զավակ են ունենում, հույսեր կապում նրա հետ, հավատում նրա ապագային, պետական բյուջեով լավ թե վատ ծախս է արվում այդ քաղաքացու վրա, ու վերջինս կա’մ լքում է իր երկիրն ու ծնողին, կա’մ էլ վատագույն դեպքում` մի անպատժելի, թռփոշացած, հաբռգած կենդանի ջնջում է այդ ամենը` հույսեր, երազանքներ, ջանքեր, ներդրումներ, ապագա` ցույց տալով, թե մարդը Հայաստանում ճանճի նման բան է,-գրում է Սաֆարյանը:
Երկու դեպքում էլ մարդը մեր երկրում արժեք չունի…. Եւ պետությունը իր հանցավոր անտարբերությամբ, որոշ դեպքերում` հանցավոր մեղսակցությամբ անուղղակի թե ուղղակի հավանություն է տալիս այս ամենին: Եթե այդպես չլիներ, ապա շատ պաշտոնանակությունների մասին լսած կլինեինք մինչեւ հիմա…»:
© Medialab.am