Մեկ օրվա ընթացքում ոչ մարտական պայմաններում երկու զոհ ունենալը, իրավապաշտպան Ժաննա Ալեքսանյանի դիտարկմամբ՝ բանակում տիրող անպատժելիության մթնոլորտի հետևանք է:
«Բանակում այսօր կատարվում է նույնը, ինչ տարիներ առաջ, չնայած գործող իշխանությունը ամեն օր խոսում է ռեֆորմների մասին»,- «Մեդիալաբին» ասում է Ալեքսանյանը:
Հիշեցնենք, ՀՀ ՊՆ-ի տարածած հաղորդագրության համաձայն՝ մարտի 17-ին, ժամը 10:30-ի սահմաններում, հանրապետության հարավային ուղղությամբ տեղակայված ՀՀ ՊՆ N զորամասի տարածքում հայտնաբերվել է ժամկետային զինծառայող, շարքային Էդուարդ Ռազմիկի Ռուստամյանի (ծնված 2003 թ.) դին` հրազենային վիրավորումով: Ընթանում է քննություն՝ դեպքի հանգամանքները լիարժեք պարզելու նպատակով:
Ավելի վաղ ՊՆ-ից հայտնել էին, որ հանրապետության հարավարևելյան ուղղությամբ տեղակայված մարտական դիրքերից մեկում մարտի 16-ին՝ ժամը 21:10-ի սահմաններում, հայտնաբերվել է ՀՀ ՊՆ N զորամասի ժամկետային զինծառայող, շարքային Ալբերտ Լևոնի Սիրոյանի (ծնված 2002 թ.) դին` ծնոտի շրջանում հրազենային վիրավորմամբ:
«Կրիմինալ բարքերը, անպատժելիության մթնոլորտը չեն փոխվել: Արձանագրվող մահվան դեպքերը չեն բացահայտվում, որ նման դեպքերը կանխվեն, հետևաբա այս իրավիճակը շարունակական է լինելու, քանի դեռ բանակում էական փոփոխություններ չեն կատարվել»,- ասում է իրավապաշտպանը:
Նրա խոսքով, բանակում տարվող ռեֆորմների մասին անընդհատ խոսող իշխանության կառավարման տարիներին բանակում՝ ոչ մարտական պայմաններում, զոհվածների թիվը տարեցտարի ավելանում է:
«Հստակ թվեր այս պահին կդժվարանամ նշել, բայց նմանօրինակ դեպքերի աճը ցույց է տալիս, որ զինվորի կյանքը բացարձակապես չի հետաքրքրում այս իշխանություններին, հակառակ դեպքում ամեն գնով կփորձեին կանխել այս դեպքերը բանակում»,- ասում է Ալեքսանյանը:
Իրավապաշտպանը վստահ է, որ ամեն բան մատնված է թողտվության, արդարադատություն չի իրականացվում, որ իրական հանցագործը պատժվի: Ժաննա Ալեքսանյանը չի բացառում, որ այս պարագայում էլ կատարվածը կներկայացվի որպես ինքնասպանություն:
«Հարուցված քրեական գործերի քննությունը կեղծում են, ու զինվորի սպանության համար պատասխանատվության է ենթարկվում մեկ այլ զինվոր, ոչ թե հրամանատարը, որը թողել է զինվորներին այդ վիճակում, ու հրամանատարների անպատժելի լինելը թույլ է տալիս, որ այս դեպքերը շարունակվեն»,- ասում է իրավապաշտպանը:
Նրա խոսքով՝ նախարարությունը պարտավոր է հանրության առաջ հանդես գալ, պարզաբանումներ ներկայացնել, ցավակցել զինվորի հարազատներին: Ալեքսանյանը նկատում է, որ առաջ գոնե ցավակցում էին, երբ պաշտոնական հաղորդագրությամբ տեղեկացնում էին նման դեպքերի մասին, իսկ հիմա դա էլ չկա:
«Նախարարը պետք է ելույթ ունենա, ներկայացնի այս դեպքերի պատճառներն ու ասի՝ ինչ է անելու, որ դրանք չշարունակվեն, բայց դա չենք տեսնում: Իմ գնահատմամբ՝ սա անտարբերության հետևանք է: Նոր նախարար է եկել, անո՞ւմ է այդ բարեփոխումները: Դեռ օր չի անցել, ժամերի տարբերությամբ՝ հայտնում են երկու զոհի մասին, պետք է սուգ հայտարարեին հիմա»,- ասում է Ժաննա Ալեքսանյանն ու շեշտում, որ նախարարը պարտավոր է այս մասով բացատրություններ ներկայացնել, որովհետև այդ զինվորների կյանքի համար ինքն անձամբ է պատասխանատու:
Քրիստինե Աղաբեկյան
MediaLab.am
