Նախագահական ընտրություններից հաշված ամիսներ առաջ ներքաղաքական անորոշ և լղոզված իրավիճակում, ԲՀԿ` կառավարման խորհրդարանական համակարգի անցնելու նախաձեռնությունը, ըստ վերլուծաբանների, վարկանիշային առումով դիվիդենտներ շահելու միտում ունի:
Անցյալ շաբաթ ԲՀԿ խորհրդարանական խմբակցության նախաձեռնությունը` կառավարման խորհրդարանական համակարգի և 100-տոկոսանոց համամասնական ընտրակարգի անցնելու մասին դեռևս պասիվ ներքաղաքական դաշտի քննարկումների և գնահատականների առիթ դարձավ:
Կուսակցությունը թեև արդեն իսկ սկսել է բանակցությունների շարքը ընդդիմադիր դաշտի տարբեր կուսակցությունների հետ, իսկ ՀՅԴ-ի հետ արդեն իսկ նախնական պայմանավորվածություն կա, այնուամենայնիվ, պարզ չէ, թե «երկրում լրջագույն համակարգային փոփոխությունների» ԲՀԿ ձգտումն ի՞նչ հանգրվանի կհասնի:
Անկախ քաղաքական վերլուծաբան Երվանդ Բոզոյանն ասում է, որ ԲՀԿ-ն լավ հաշվարկ է արել և գիտի, որ այդ առաջարկությունների հետ կապված միևնույն միտումներն ունեն ՀՅԴ-ն, ՀԱԿ-ը և «Ժառանգությունը»:
«Իհարկե, ես այստեղ նաև նախընտրական տարր եմ տեսնում, ու ԲՀԿ-ն պատահական չի ընտրել այս ժամանակահատվածը: Բայց ֆորմալ առումով պետք է ասենք, որ իր նախընտրական ծրագրերում ԲՀԿ-ն ուներ նման կետ և, այս պահին առաջարկությամբ հանդես գալով, փորձում է այն դնել շրջանառության մեջ, որպեսզի կոնսոլիդացիոն կենտրոն ստեղծի քաղաքական դաշտում»,- ասում է Բոզոյանը:
Բոզոյանի կարծիքով` այդ համախմբման կարիքը կա քաղաքական դաշտում, որը և կլինի այլընտրանքային ուժ նախագահական ընտրությունների ժամանակ իշխանության դեմ, իսկ իշխանությունը բավականին ուժեղ է, եթե հաշվի ենք առնում, թե ինչ վարչական ու ֆինանսական ռեսուրսների է տիրապետում:
Քաղաքական և ընտրական տեխնոլոգիաների մասնագետ Արմեն Բադալյանը, գնահատելով ԲՀԿ-ի վերջին քայլերը, բնավ չի կիսում այն տեսակետը, որ կուսակցությունը փորձում է քաղաքական դիվիդենտներ շահել` համարելով, որ «ԲՀԿ-ն այսօր դրա կարիքը չունի»:
«Չեմ կարծում, որ այսօր հասարակությունը համակարգային խնդիրների լուծման կարիք ունի, մարդկանց այլ խնդիրներ են հետաքրքրում, այս պահին հասարակության համար կարևոր չեն ոչ 100-տոկոսանոց համամասնական ընտրակարգը և ոչ խորհրդարանական կառավարման անցնելու ձևը»,- ասում է Բադալյանը:
Այնուամենայնիվ, եթե նախաձեռնությամբ ԲՀԿ-ին հաջողվի նախագահական ընտրություններից առաջ համախմբել քաղաքական ուժերին, ըստ «Պոլիտէկոնոմիա» հետազոտական կենտրոնի ղեկավար, տնտեսագետ Անդրանիկ Թևանյանի, ապա «դա Հայաստանում կլինի արտառոց դրական երևույթ»:
«Եթե ԲՀԿ-ին դա հաջողվի, շատ լավ կլինի»,- «Մեդիալաբին» ասում է Թևանյանը:
Սակայն մինչ նոր զարգացումները, քննարկումների և համաձայնությունների փուլում գտնվող ԲՀԿ նախաձեռնությունը «հարձակման» ենթարկվեց երբեմնի գործընկերների կողմից:
Իշխանական կոալիցիայի նախկին գործընկերոջ նախաձեռնության մասին խոսելիս ՀՀԿ մամլո խոսնակ Էդուարդ Շարմազանովը որակեց այն որպես «պարզունակ քայլ»:
«Կառավարման խորհրդարանական համակարգի անցման առաջարկություններով հանկարծահաս հանդես եկողների հետևում չտեսնել մարդկանց, որոնք որևէ այլ կերպ, սեփական դեմքով, առանց շղարշվելու իշխանության գալու հնարավորություն չունեն, առնվազն քաղաքական կարճատեսություն է: Սա ավելի քան ակնհայտ է»,-հայտարարեց Շարմազանովը` ենթադրաբար այս ամենի հետևում տեսնելով ՀՀ երկրորդ նախագահ Ռոբերտ Քոչարյանի ստվերը:
Վերջին շրջանում նկատելիորեն ակտիվացած Ռոբերտ Քոչարյանի պատասխանը չուշացավ. նոյեմբերի 12-ին իր իսկ ոչ պաշտոնական կայքէջում` www.2rd.am-ում, «Նոր հարցազրույց» վերտառությամբ հրապարակված հարցազրույցում նա, հերքելով ԲՀԿ նախաձեռնության հետ իր կապը, այնուամենայնիվ հավանության արժանացրեց այն:
Քաղաքագետ Բոզոյանն ասում է, որ, բնականաբար, երկրորդ նախագահը պետք է հերքեր իր անձի հետ կապված խոսակցությունները, բայց չի կարծում, որ նա դեմ կլիներ քաղաքական հարթակում ԲՀԿ նախաձեռնությամբ առաջ քաշվող համախմբմանը:
«Քոչարյանի համար այդ կոնսոլիդացիան նույնպես շահավետ է, որքան էլ որ նա փորձի այսօր հայտարարել, թե ինքը կապ չունի այդ ամենի հետ»,- համոզված է վերլուծաբան Բոզոյանը:
© Medialab.am
