Գեղարքունիքի մարզի Սոթք գյուղում, որը Ադրբեջանի զինված հարձակման հիմնական թիրախներից մեկն էր, այս օրերին վնասների գույքագրում է իրականացվում:
«Այս պահին հարձակման, գնդակոծությունների հետևանքով վնասների չափը ճշգրտվում է: Եթե նույնիսկ մեկ պատուհան է կոտրվել, արձանագրում ենք այդ վնասը, որ չմնա որևէ տուժած բնակարան, տուժած բնակիչ»,- «Մեդիալաբին» ասում է Սոթք համայնքի ղեկավար Սևակ Խաչատրյանը:
Մինչև 44-օրյա պատերազմը Սոթք գյուղը սահմանակից էր արցախյան Քարվաճառին, որը հանձնվել է Ադրբեջանին:
Ադրբեջանի կողմից զինված հարձակումն սկսել էր սեպտեմբերի 13-ի կեսգիշերին: Հայաստանի պաշտպանության նախարարությունը հայտարարել էր, որ Ադրբեջանի զինուժը Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից ինտենսիվ կրակ է բացել հայկական դիրքերի ուղղությամբ։
Գիշերային գնդակոծության ընթացքում զգալիորեն տուժել էր Գեղարքունիքի մարզի Սոթք գյուղը: «Սոթքում գիշերվա գնդակոծության հետևանքով վնասվել է համայնքապետարանի շենքը, մի քանի տուն այրվել է, որոշ տների տանիքներն ու պատուհաններն են վնասվել»,- իր ֆեյսբուքյան էջում հրապարակելով լուսանկարներ գրել էր Խաչատրյանը:
Հարձակման հետևանքով Սոթքից անվտանգության նկատառումներով բնակիչները՝ կին, երեխա, տարհանվել էին հարակից բնակավայրեր, մասնավորապես՝ Վարդենիս քաղաք:
«Հատ-հատ մասնագետները մտնում են տներ ու արձանագրում վնասները: Գյուղում չպետք է լինի վնասված տուն»,- ասում է Խաչատրյանը:
Այժմ, նրա խոսքով, թեպետ տները դեռ վնասված են, բայց մարդիկ մեծ ցանկություն ունեն վերադառնալու: «Այսօր գյուղում արդեն բավականին մեծ բնակչություն կար: Կեսից ավելին բնակավայրում էին այսօր: Չնայած էս ամենին, մարդիկ մեծ ցանկություն ունեն վերադառնան, իրենց դուռը բացեն ու սկսեն ապրել: Կառուցեն, վերանորոգեն: Մի խոսքով, մարդիկ ուզում են Սոթք բնակավայրում ապրել»,- նշում է նա:
Տարածքային կառավարման և ենթակառուցվածքների փոխնախարար Վաչե Տերտերյանը ավելի վաղ հայտարարել էր, որ ադրբեջանական հարձակման հետևանքով երեք մարզերում՝ Գեղարքունիքում, Վայոց ձորում, Սյունիքում, վնասվել է 192 բնակելի տուն, որից ամբողջությամբ վնասվել են 60-ը:
«Կստեղծվեն մասնագիտական հանձնախմբեր, որոնք տեղում ավելի մանրակրկիտ կհաշվառեն վնասները: Մեր քաղաքացիներն այդ առումով կարող են հանգիստ լինել: Եթե նույնիսկ որևէ բան բաց է մնացել, ապա համայնքների աշխատակազմերի միջոցով պատշաճ կարվի այդ աշխատանքը»,- ասել էր Տերտերյանը: Նա նաև վստահեցրել էր, որ ռազմական գործողությունների հետևանքով տուժած յուրաքանչյուր քաղաքացի լինելու է կառավարության ուշադրության կենտրոնում:
«Հենց այսօր մարզպետը անձամբ եկել էր բնակավայր, բնակիչների բոլորի հետ հանդիպել են, ու ասել է, որ բոլորին օգնելու են: Չի մնալու մի բնակիչ, որի տունը չկառուցվի կամ չվերականգնվի: Այսինքն՝ էդ պատրաստակամությունը կա ու ամբողջովին արվելու է»,- «Մեդիալաբին» ասում է Սևակ Խաչատրյանը:
Հասմիկ Համբարձումյան
MediaLab.am
