Մինչ շարունակվում են Պռոշյանի գյուղապետ, ազատամարտիկ, ՀՅԴ անդամ Հրաչ Մուրադյանի աղմկահարույց սպանության շուրջ քննարկումներն ու տարաբնույթ կանխավարկածների խոսակցությունները, քիչ առաջ հայտարարությամբ հանդես է եկել ՀՅԴ Գերագույն մարմինը:
Մուրադյանը սպանվել է այսօր: Պաշտոնական հաղորդագրության համաձայն, 1963 թվականի ծնված գյուղապետ Հրաչ Մուրադյանի դիակը հայտանաբերվել է այսօր առավոտյան ժամը 9-ի սահմաններում, Կոտայքի մարզի Պռոշյանի գյուղապետարանի դիմաց»: Ոստիկանության հաղորդագրության համաձայն, Մուրադյանը մահացել է աջ քունքի շրջանում անհայտ անձի կողմից արձակած հրազենային կրակոցից:
Տեղի ունեցածը ՀՅԴ Գերագույն մարմինը որակել է որպես «կանխամտածված ու ծրագրված սպանություն»:
«Այսօր` ապրիլի 2-ի առավոտյան, աշխատավայրի դիմաց ահաբեկչության զոհ է դարձել Պռոշյան համայնքի ղեկավար Հրաչ Մուրադյանը: Տեղի է ունեցել կանխամտածված ու ծրագրված սպանություն: Ակնհայտ է նաև, որ, անկախ կատարողներից, ոճրագործությունը անպատժելիության և անհանդուրժողական մթնոլորտի հետևանք է:
Հրաչ Մուրադյանը հավատավոր դաշնակցական էր, Արցախյան ազատամարտի առաջին օրերից մինչև ավարտը, մարտական փառահեղ ուղի էր անցել։ Պարգևատրվել էր Արցախի «Մարտական խաչ» երկրորդ աստիճանի և հայրենիքի պաշտպանության համար բազմաթիվ մեդալներով: 2005-ից երեք անգամ անընդմեջ ընտրվելով գյուղապետ` նա դրսևորել էր իրեն որպես օրինակելի ղեկավար, իրականացրել էր տարբեր ծրագրեր, նպաստել պռոշյանցիների բազմաթիվ խնդիրների լուծմանը:
Իր տեսակով ու նկարագրով լինելով պայքարող, ինքնուրույն և ժողովրդի շահերով առաջնորդվող անհատականոթյուն` Հրաչ Մուրադյանը վայելում էր համագյուղացիների սերն ու համակրանքը։ Դա հարուցում էր ոմանց ակնհայտ դժգոհությունը: Ղեկավարման տարիներին նրա շուրջ մշտապես փորձ է արվել լարվածություն ստեղծել: Բազմիցս դրսևորված սպառնալիքներն ու ահաբեկումները, ի վերջո, հասցրեցին այս վախճանին:
Ցավով արձանագրում ենք, որ մեր երկրում երաշխավորված չէ քաղաքացու անվտանգությունը, հանցավոր գործելակերպը մեր կյանքի անբաժանելի մաս է կազմում։ Հրաչ Մուրադյանի կյանքը խլած դավադիր գնդակը ուղղված էր ոչ միայն ազնվագույն հայի և համայնքի սրտացավ ղեկավարի, այլև հայոց պետականության և նրա վարկի դեմ: Դատապարտելով կատարված ոճրագործությունը ՀՅ Դաշնակցությունը պահանջում է հանցագործության արագ և լիարժեք բացահայտում` կատարողների և կազմակերպիչների նկատմամբ խստագույն պատժի կիրառում»,-նշված է ՀՅԴ Գերագույն մարմնի տարածած հաղորդագրության մեջ:
Պռոշյանի գյուղապետի սպանությանն է անդրադարձել նաեւ «Սարդարապատ» շարժման նախաձեռնող խմբի անդամ, Շուշիի առանձնակի գումարտակի հրամանատար Ժիրայր Սեֆիլյանը: Ազատամարտիկ Հրաչ Մուրադյանը Սեֆիլյանի մարտական ընկերն էր:
«Իմ խորին ցավակցությունն եմ հայտնում մարտական ընկերոջս՝ Պռոշյանի գյուղապետ Հրաչ Մուրադյանի մերձավորներին, հարազատներին ու ընկերներին: Հրաչն ազնիվ ու սկզբունքային մարդ էր և չէր հաշտվում անարդարության ու ապօրինության հետ: Նա անցավ Արցախյան ազատամարտի թոհ ու բոհով, սակայն սպանվեց հայրենի գյուղում՝ զոհ դառնալով երկրում տիրապետող հանցավոր բարքերին, որոնց համար մարդու կյանքը ոչ մի արժեք չունի»,- «Ֆեյսբուք» սոցիալական ցանցի իր էջում գրառում է կատարել Ժիրայր Սեֆիլյանը:
Դեպքի կապակցությամբ, ինչպես հաղորդում են պաշտոնական աղբյուրները քրեական գործ է հարուցվել:
Լուսանկարում` Հրաչ Մուրադյանը -Աղբյուրը` yerkirmedia.am
© Medialab.am