Թե որքանո՞վ է հնարավոր ներկա պահին ՀՀ-ի կողմից ԼՂՀ անկախության ճանաչումը, քննարկումների առիթ դարձավ վերջին զարգացումների ֆոնին, երբ Ադրբեջանը Բաքվում ազատություն պարգեւեց եւ հերոսացրեց 2004-ին Բուդապեշտում հայ սպա Գուրգեն Մարգարյանին կացնով սպանած եւ ցմահ դատապարտված Ռամիլ Սաֆարովին:
Տեղի ունեցածը կրկին անգամ ալեկոծեց հասարակությանը, իսկ նախագահ Սերժ Սարգսյանը նույնը օրը հայտարարեց Հունգարիայի հետ դիվանագիտական հարաբերությունների խզման մասին:
Թեեւ «Ժառանգության» կողմից ԼՂՀ անկախությունը ճանաչող օրինագիծը նախկինում երկու անգամ ներկայացվել է ԱԺ քննարկմանը, սակայն պատգամավորների մեծամասնությունը պատճառաբենելով «ոչ պատեհությունը» դեմ է քվեարկել:
Իշխող տրամադրությունների ֆոնին, արդեն մի քանի օր տարբեր ամբիոներից սկսեցին հնչել անհապաղ Հայաստանի` ԼՂՀ անկախությունը ճանաչելու անհրաժեշտության մասին:
«Այս անգամ Սաֆարովի դեպքը, որը ապտակ էր հայ դիվանագիտությանը, դաս կլինի, քանի որ հայ ժողովրդի գլխին կանգնած պատերազմի սպառնալիքը` Արցախի անկախություն չճանաչման հետեւանք է, եւ եթե այս անգամ էլ չճանաչեն, դա կարող է ոչ միայն անխուսափելի այլեւ անշրջելի հետեւանքներ ունենալ»,-«Մեդիալաբին» ասում է «Ժառանգություն» կուսակցության անդամ, քաղաքագետ Ստեփան Սաֆարյանը:
Քաղաքագետ Երվանդ Բոզոյանն ասում է, որ ստեղծված իրավիճակում դժվար է ասել, այնուամենայնիվ Հայաստանի կողմից ԼՂՀ անկախությունը կճանաչվի՞, թե՞ ոչ:
«Դժվար է ասել կճանաչեն ԼՂՀ անկախությունը, թե՞ ոչ: Բայց հասարակության մեջ այսօր հարց է առաջացել, թե ինչպես կարելի է Ադրբեջանի հետ բանակցություններ վարել, երբ նրանք մարդասպանին հերոսի կոչում են տալիս: Հայաստանը կարծում եմ պետք է ճանաչի ԼՂՀ անկախությունը, շարունակելով բանակցությունները Ադրբեջանի հետ, եթե իհարկե Ադրբեջանը համաձայնվի այդ տարբերակին»,-«Մեդիալաբին» ասում է Բոզոյանը:
Սակայն, ի տարբերություն քաղաքագետներին՝ ԼՂՀ նախագահի մամլո խոսնակ Դավիթ Բաբայանը henaran.am-ի հետ զրույցում ասել է, որ նման քայլից հետո «շատ դժվար կլինի վերսկսել բանակցությունները եւ փորձել ադրբեջանական կողմի հետ ինչ-որ հարցեր քննարկել»:
Նա կարծում է, որ ԼՂՀ անկախացման սկիզբը պետք է դնի ինքը` Հունգարիան:
«Որովհետեւ Հունգարիան կատարել է շատ անվայել մի քայլ, սարսափելի գործարք է կնքել, որը հարվածում է ժողովրդավարական նորմերին, բարոյականությանը եւ, ընդհանրապես, որեւէ բացատրություն չի կարելի տալ նման գործարքին, հետեւաբար որպեսզի իր մեղքը քավի, Հունգարիան պետք է ճանաչի Արցախի անկախությունը: Այնուհետ այդ շքերթը կսկսվի: Կարծում եմ, որ Հայաստանը չպետք է լինի առաջին պետությունը, որը այն կճանաչի, որովհետեւ սա արդեն իսկ կնշանակի բանակցային գործընթացի դադարեցում»,-ասել է Բաբայանը:
Նմանատիպ մի միտք արտահայտել էր երեկ` ՀՀ նախագահ Ռոբերտ Քոչարյանը` իր գրասենյակի կողմից տարածած հաղորդագրությամբ:
«Եթե հունգարական կողմի արձագանքից պարզվի, որ Ադրբեջանն իրոք խաբել է պաշտոնական Բուդապեշտին եւ հանցավոր համաձայնություն չի եղել, ապա հունգարացիների ամենաարժանի պատասխանը կարող է լինել Լեռնային Ղարա¬բա¬ղի Հանրապետության ճանաչումը»,-ըստ Ռոբերտ Քոչարյանի գրասենյակի տարածած հաղորդագրության ասել է նա:
© Medialab.am