Առանց դիմագծերի, ու պատմության սրտի մայրաքաղաք. «ավելի գունեղ, ծաղկառատ, լուսառատ, գրավիչ ու ջերմ»

Առանց դիմագծերի, ու պատմության սրտի մայրաքաղաք. «ավելի գունեղ, ծաղկառատ, լուսառատ, գրավիչ ու ջերմ»
Առանց դիմագծերի, ու պատմության սրտի մայրաքաղաք. «ավելի գունեղ, ծաղկառատ, լուսառատ, գրավիչ ու ջերմ»
Հեղինակ MediaLab

Մայրաքաղաքի տարեդարձի կապակցությամբ այսօր Երեւանում բազմաթիվ միջոցառումներ են կազմակերպվել` թատերականացված բեմադրություններ, շքերթներ, երգ ու պար:
Չնայած վերջին տարիներին Երեւանի աղավաղված պատմությանը` գետնին հավասարված պատմական եւ արժեքավոր շինություններով, կանաչ տարածքների փոխարեն կենտրոնում բազմած անճաշակ սրճարաններով եւ վերջերս մայրաքաղաքում տեղադրված մեծերի կավ-գիպսե անդիմագիծ արձաններով, քաղաքապետը խոսել է ձեռքբերումների մասին:
Երեւանի ծննդյան 2794-րդ տարեդարձի առթիվ իր շնորհավորական ուղերձում, քաղաքապետ Տարոն Մարգարյանը նշել է, որ «այսօր մայրաքաղաքն ավելի գունեղ է, ծաղկառատ, լուսառատ, գրավիչ եւ ջերմ»:
«Եթե փորձենք մտովի ամփոփել հազարամյակների մեզ հայտնի տարեգրությունը, հաստա՛տ կարձանագրենք, որ մեր սիրելի Երևանը պատվով է անցել իր ճանապարհը,-նշել է Տարոն Մարգարյանը: Եվ եթե այդ անսահման թվացող ժամանակի մեջ դիտարկենք թեկուզ վերջին մեկ տարվա կատարածը, վստահաբար կարձանագրենք, որ քաղաքամայր Երևանն իր ծննդյան 2794-ամյակը դիմավորում է շոշափելի ձեռքբերումներով ու խոստումնալից հաջողություններով»:
Նա նշել է, որ ամեն մի սերունդ իր մթնոլորտն ու միջավայրն է բերում քաղաքին, հետքը թողնում քաղաքում` «հերթը մերն է»:

«Ու մեր սրտի մայրաքաղաքն այսօր շատ ավելի գունեղ է, ծաղկառատ, լուսառատ, գրավիչ ու ջերմ: Երևանի զարգացման հարցում էլ, ըստ էության, մեր նպատակը մեկն է. համադրելով մեր սիրելի քաղաքի անցյալն ու ներկան, պահպանել երևանյան հին ու բարի ավանդույթները` ապահովելով հարմարավետ միջավայր ինչպես երևանցիների, այնպես էլ մայրաքաղաքի հազարավոր հյուրերի համար»,-նշել է նա, չնայած նրան, որ մայրաքաղաք Երեւանում փաստացի արդեն հնարավոր չէ խոսել անցյալի մասին եւ առավելեւս «պահպանել հինն ու բարին»:

«Շնորհակալություն եմ հայտնում բոլոր երևանցիներին ու տոնի բոլոր մասնակիցներին, ովքեր ամեն ինչ անում են, որ այս օրը Երևանը բոլորիս ու աշխարհին ներկայանա իսկապես որպես մեր սրտի մայրաքաղաք»,-ասել է քաղաքապետը։

Երեկոյան, ինչպես տեղեկացնում է պաշտոնական հաղորդագրությունը, «մայրաքաղաքի սրտում» կանցկացվի Գալա համերգ` տոնական հրավառությամբ: Գալա համերգին կմասնակցեն ինչպես Ռուսաստանից հրավիրված աստղեր, այնպես էլ հայ հիմնականում ռաբիզի վառ աստղերը:

Երեւանի մասին հեղինակային լավագույն կատարումներն այս անգամ եւս տեղ չեն ունենա մայրաքաղաքի տոնին տեղադրված 26 երաժշտական եւ ժամանցային հարթակներում:

«էն որ ասում են իմ քաղաքն է, սա հենց ինձ համար է ասված, ես ծնվել մեծացել եմ մայրաքաղաքի սրտում, բայց ինձ անտեսված եմ զգում, որովհետեւ իմ արվեստը չի տեղավորվում այսօրվա մշակութային քաղաքականություն կերտողների ծրագրերի մեջ»,- a1plus.am-ին ասել է հայտնի հեղինակային կատարող Լիլիթ Պիպոյանը:

«Ես կուզենամ, որ արտագաղթը պակասի, և շնորհավորում եմ էն մնացած երևանցիներին, որոնք շարունակում են սիրել մեր քաղաքը»,- ըստ Tert.am-ի նշել է երգահան Ռուբեն Հախվերդյանը` տեղեկացնելով, որ ինքը եւս չի մասնակցելու տոնակատարությանը:

© Medialab.am

http://www.youtube.com/watch?v=DF2Md8yShDg