Արդեն երեք օր է` ՀՀ պետական բուհերի մի խումբ ուսանողներ անցկացնում են դասադուլներ, երթով շարժվում են Երևանի պետական համալսարանների ու ինստիտուտների մոտով, կոչ անում բոլոր ուսանողներին միանալ դասադուլին: Դասադուլ հայտարարած ուսանողներն ասում են, որ այս կերպ արտահայտում են իրենց բողոքը «փետրվարի 18-ի կեղծված նախագահական ընտրությունների» դեմ և իրենց ձայնն են բարձրացնում ՀՀ-ում մարդու ընտրական իրավունքը չոտնահարելու, սահմանադրական կարգը չխախտելու, նոր և արդար ընտրություններ հայտարարելու համար:
Դասադուլի մասնակից՝ Երևանի Խ. Աբովյանի անվան մանկավարժական համալսարանի ուսանող Տիգրան Մուրադյանը նշում է, որ առաջին իսկ օրվանից միացել է դասադուլին:
«Առաջին հերթին ուզում ենք, որ ընտրությունները չեղյալ հայտարարվեն և նոր ընտրություններ անցկացվեն, քանի որ ընտրությունները կեղծվել են, և կեղծ արդյունքներով ընտրվել է Սերժ Սարգսյանը: Մենք դեմ ենք դրան ու բարձրացնում ենք ևս մեկ խնդիր` կապված ուսխորհուրդների հետ, որտեղ հիմնականում Հանրապետականի անդամներ են և նպաստում են ընտրակաշառքների բաժանմանը, ստիպում են ուսանողներին, որ գնան- ընտրեն իշխող կուսակցության թեկնածուին»,- ասում է Տիգրանը:
Նա նշում է, որ ուսանողները ցանկանում են, որ ուսխորհուրդները դառնան բազմակուսակցական, որ հավասարություն լինի, և լինեն ինչպես անկուսակցականներ, այնպես էլ տարբեր կուսակցությունների անդամներ:
Այսօր առավոտյան նույնպես մի խումբ ուսանողներ «ազատ, անկախ ուսանող», «մի-ա-ցում» վանկարկումներով ԵՊՀ-ից շարժվեցին մայրաքաղաքի պետական բուհերի ուղղությամբ՝ շարունակելով հորդորել ուսանողներին միանալ դասադուլին:
Չնայած դասադուլավորների կոչերին՝ համալսարաններում ուսխորհուրդների անդամ այլ ուսանողներ ագրեսիվ ու մերժողական կոչերով են դիմավորում իրենց դասընկերներին:
«Հե-ռա-ցեք» վանկարկումներով այսօր ԵՊՀ, ինչպես նաև Երևանի պետական ագրարային համալսարանի մոտ մի խումբ ուսանողներ սկսեցին վիրավորել, անգամ հայհոյել դասադուլին մասնակցող ուսանող աղջիկներին և տղաներին ու պահանջել, որ նրանք «չխանգարեն և չխափանեն իրենց դասաժամը»:
«Հեռացեք» գոռացողները բոլորն ուսխորհրդից են, Հանրապետականի անդամներ: Մենք ոչ մի ագրեսիա չենք դրսևորում, իրենք են շատ ագրեսիվ: Վիրավորում են մեր աղջիկներին, տղաներին, խփում են, ինչ-որ բաներ նետում, իսկ ոստիկանությունն էլ ոչ մի կերպ չի միջամտում, երբ իրենց կողմից ագրեսիա է դրսևորվում»,- ասում է Տիգրանը:
Ավելին, ոստիկաններն իրենք փակում են պետական բուհերի մուտքերն ու դարպասները, շարք կազմած կանգնում դիմացը, որպեսզի ուսանողները դուրս չգան և չմիանան դասադուլի մասնակից մյուս ուսանողներին:
Դա ստիպում է շատ և շատ ուսանողների անգամ ցատկել ուսումնական հաստատությունների ցածր հարկերի պատուհաններից կամ դարպասներից` դասադուլին միանալու համար:
Ուսանողների հավաստմամբ՝ դասադուլին մասնակցող և չմասնակցող ուսանողներին անգամ սպառնում են բուհերի ռեկտորները, դասախոսներն ու ամբիոնի վարիչները, որպեսզի նրանք չմիանան դասադուլին:
ԵՊՀ ուսանողուհի Հերմինե Վիրաբյանը հորդորում է բոլոր ուսանողներին միանալ դասադուլներին, «որպեսզի վախի մթնոլորտը վերանա, որովհետև էդ սպառնալիքները, որ դուք լիկվիդ կմնաք, դուրս կմնաք համալսարանից, սադրանք են թե´ դեկանի, թե´ դասախոսների, թե´ ամբիոնի վարիչների կողմից»:
«Մեր հիմնական նպատակն է ռեժիմի դեմ դուրս գալ, պայքարել ընտրակեղծիքների դեմ, բայց այսօր ուսխորհուրդը հանում է լիկվիդ մնացած երեխեքին, կանգնեցում են մեր դեմ, նրանք հարձակվում են մեզ վրա ու չեն թողնում, որ մյուս ուսանողները, ովքեր ցանկանում են միանալ մեզ, միանան: Դարպասներն են փակում, բուհերը դարձել են բանտ»,- ասում է Հերմինեն:
Նա կարծում է, որ այդ ամենն այսօրվա իշխանական ռեժիմի բաղկացուցիչ մասն է:
«Ես ուզում եմ, որ մեր կառավարությունը փոխվեր, ինչպես ասում են` ձուկը գլխից է հոտում: Ուզում եմ, որ նոր մարդիկ գան, ու դրանք Սերժի թևի տակի մարդիկ չլինեն, այս երկրի մասին մտահոգ մարդիկ կլինեն, որոնց հուզում է այս ամեն ինչը: Ուզում եմ բարվոք երկրում ապրել, որ չմտածեմ երբևէ, թե այս երկրից գնալ եմ ուզում»,- հավելում է Հերմինեն:
Երևանի պետական ճարտարապետաշինարարական համալսարանի ուսանողուհի Հասմիկ Գասպարովան ասում է, որ մասնակցում է դասադուլին և պայքարում, որ երկրում սոցիալական արդարություն լինի:
«Մեզ բոլոր ձևերով ճնշում են: Մեր համալսարանում արդեն գրել են բոլորիս անունները, ովքեր մասնակցում են դասադուլին: Ընտրություններից է այս ամենը գալիս: Այստեղ գալու իմ նպատակն այն է, որ ես հասկացել եմ, որ իմ բոլոր ընկերները, բարեկամները թողնում-գնում են ուրիշ երկրներ, որովհետև չեն կարողանում այստեղ աշխատանք գտնել: Բարձրագույն կրթություն են ստանում, կարմիր դիպլոմով ավարտում, բայց գործի են անցնում այն մարդիկ, ովքեր այստեղ կանգնած են ու մեզ հիմա ասում են` հեռացե´ք»,- ասում է Հասմիկը:
Նա նշում է, որ երկրում բարեփոխումների համար ու կեղծիքների դեմ պայքարում շատ է կարևորում ուսանողների մասնակցությունը, բայց հիասթափված է, որ ուսանողների մեծ մասը վախենում է դասադուլներին մասնակցելուց:
«Մեզ բոլորիս են նկատողություններ անում, մեզ բոլորիս են վախեցնում, բայց մենք եկել ենք այստեղ դասադուլի ու գիտենք մեր իրավունքները, մենք Սահմանադրությունը չենք խախտում, դասադուլ անելն օրենքով արտոնված է»,- ասում է ճարտարապետաշինարարական համալսարանի ուսանողուհին:
Նշենք, որ դասադուլավորների երթն ավարտվեց Ազատության հրապարակում: Ուսանողները հայտարարեցին, որ այսուհետ Ազատության հրապարակում ձևավորվելու է ուսանողական հարթակ, որտեղ կարող են գալ Երևանի և Հայաստանի բոլոր ուսանողները, անցկացնել քննարկումներ, արտահայտել իրենց կարծիքներն ու դիրքորոշումները:
Ազատության հրապարակի ուսանողական հարթակում առաջին հանդիպումն անցկացվելու է վաղը` հինգշաբթի, ժամը 13:00-ին:
Լիլիթ Առաքելյան
Ֆոտոպատմություններն այստեղ եւ այստեղ:
© Medialab.am
