Քիչ առաջ ավարտվեցին Երեւանի ավագանու ընտրությունները, եւ մինչ հաշվարկի առաջին արդյունքները, ներկայացնում ենք մեր թղթակցի դիտարկումները երկու ընտրատեղամասերից:
Թաղային հեղինակությունները, խախտումներ, խոչընդոտներ: Այս եւ նմանատիպ բազում դեպքեր այսօր գրանցվեցին Մալաթիա-Սեբաստիա վարչական շրջանի թիվ 179 դպրոցում տեղակայված 8/08 և 8/09 ընտրատեղամասերում, ուր աշխատում էր «Մեդիալաբի» թղթակիցը:
Երևանի ավագանու ընտրություններն այս երկու ընտարտեղամասերում ամենաթեժերից էին, ինչի մասին պարբերաբար հաղորդումներ էին ստացվում թե դիտորդներից, թե լրագրողներից եւ թե ընտրություններին մասնակցող քաղաքական ուժերի ներկայացուցիչներից:
Ինչպես տեղեկացնում է «Մեդիալաբի» թղթակիցը, պատգամավոր օլիգարխ Սամվել Ալեքսանյանի հայրենի թաղամասում, թաղային հեղինակությունները պարբերաբար խմբով հավաքվում էին ընտրատեղամասերի բակում`ակնհայտ խոստովանելով, որ քարոզչություն են անում ՀՀԿ-ի օգտին:
Նույն անձինք բազմաթիվ անգամներ ելումուտ էին անում ընտրատեղամասում, ընտրողներից ոմանց մնում էին ընտատեղամասում:
Թաղային հեղինակություններից «Մոնղոլը», պարտականություն էր ստանձնել խոչընդոտել լրագրողների աշխատանքը:
Նա տեսանկարահանում էր լրագրողներին, սադրում ու կռիվ հրահրում: Այս ամենին համարժեք պատասխան չէին տալիս ոստիկանները, ովքեր ձևացնում էին, որ ոչ մի արտառոց դեպք էլ չեն արձանագրել այս ընտրատեղմասերում:
Ավելին, ոստիկանները թաղային հեղինակությունների հետ շատ համերաշխ էին ու միասին ելումուտ էին անում ընտրատեղամասեր:
ԱԺ ՀՀԿ-ական պատգամավոր Սամվել Ալեքսանյանն ակնհայտորեն խառնված էր ընտրական գործընթացներին, ինչի իրավունքը չուներ:
Ընտրախախտումների վերաբերյալ ահազանգերից հետո, որքան էլ տարօրինակ է, ընտարտեղամասեր այցելեց Սամվել Ալեքսանյանը: Դա դեռ բավական չէ, նա անգամ միջամտեց ընտրական գործընթացներին, ցուցումներ տվեց դիտորդներին ու հանձնաժողովի ադնամներին:
Ակնհայտ է, որ Մալաթիա-Սեբաստիա վարչական շրջանում ընտրական գործընթացները վերահսկում էր հենց Սամվել Ալեքսանյանը, դա հերթական անգամ փաստեց և նրա, և թաղային հեղինակությունների պահվածքը, ովքեր չէին թաքցնում, որ ՀՀԿ-ի օգտին են աշխատում: ՀՀԿ-ի ձայներն արհեստականորեն մեծացնելու ուղղությամբ այս տարածքում գործի դրվեցին բոլոր հնարավոր մեթոդները: Դիտորդները ֆիքսել են, որ որոշ մարդիկ ընտրողների ցուցակների են տիրապետում և դրսում ներկա-բացակա են արել ընտրողներին:
Նշված ընտրատեղամասեր այցելելով՝ Սամվել Ալեքսանյանն ասել է, որ ահազանգերի հետքով է եկել: ՀՀԿ-ական դիտորդներից մեկին Սամվել Ալեքսանյանն ասաց. «Ընենց արա, որ պրոբլեմ չըլնի:
Մի հատ եթե զգացի պրոբլեմ կա, պրծաք արդեն, ֆսյո: Եթե մի հատ էլ ըստից զանգ եկել ա, ինձնից չնեղանաք»:
Լրագրողները հետաքրքվեցին, թե ի՞նչ իրավունքով է Սամվել Ալեքսանյանը վերահսկում ընտրական գործընթացները, երբ դրա իրավունքը չունի: «Ցավդ տանեմ, ես չեմ վերահսկում, ես իմացել էի, որ խնդիր կա, դրա համար եկա»,- ասաց նա՝ միաժամանակ նշելով, որ վստահված անձի թուղթ ունի:
Նշենք, որ դիտորդներից ոմանք էլ ՀՀԿ-ի օգտին էին աշխատում: «Կյանք» մարդու իրավունքների միջազգային ասոցիացիայի Էդուրադ Մելքոնյանն, ով դիտորդ էր այս ընտրատեղամասում և ում հանձնարարական տվեց Սամվել Ալեքսանյանը, ակնհայտորեն ՀՀԿ-ի օգտին էր աշխատում:
Նշենք, որ Սամվել Ալեքսանյանի «հանձնարարականը» չկատարվեց: Նրա հեռանալուց հետո այս երկու ընտարտեղամասերում դարձյալ անվերահսկելի իրավիճակ էր՝ խմբերով մարդիկ էին ներս մտնում, կրկնակի քվեարկության փորձեր եղան, ընտրողները մի քանի անգամ էին մտնում ընտարտեղամաս: Ոստիկաններն ցուցաբերում էին կատարյալ անտարբերություն:
© Medialab.am
