Մայիսի 5-ին տեղի ունեցան ոչ թե Երևանի ավագանու ընտրություններ, այլ ընտրակռիվ: Այս կարծիքին է ընտրական և քաղաքական տեխնոլոգիաների փորձագետ Արմեն Բադալյանը:
«Այս ընտրակռվի մեջ պետք է պարզվեր, թե ո´վ էր ամենամրցունակը, և պարզվեց, որ ամենամրցունակը Հանրապետական կուսակցությունն է: Ինչպես և կանխատեսել էինք` ընտրությունները չէին լինելու ազատ, արդար և թափանցիկ, և այդպես էլ եղավ»,- «Մեդիալաբին» ասում է Արմեն Բադալյանը:
Նրա խոսքով` ՀՀԿ-ն իր նախընտրական քարոզչության հիմքում դրեց Տարոն Մարգարյանին ՀՀԿ-ական բացասական կերպար ունեցող գործիչներից տարանջատելու քաղաքականությունը, որն ինչ-որ չափով աշխատեց, քանի որ շատերը գնում էին քվեարկության, ասում, որ ՀՀԿ-ին դեմ են, բայց ընտրելու են Տարոնին:
«Այսինքն` ոչ իշխանական ուժերն այդպես էլ չկարողացան հասկացնել. սրանք քաղաքական ընտրություն են, և եթե գնում եք քվեարկելու Տարոն Մարգարյանին, նշանակում է` քվեարկում եք ՀՀԿ-ին: Ոչ իշխանական ուժերն այդպես էլ չկարողացան մինչև վերջ այդ մեսիջը հասցնել հասարակությանը: Ուստիև ՀՀԿ-ի նախընտրական քարոզարշավի ստրատեգիան բավականին լավ աշխատեց»,- ընդգծեց մասնագետը:
Ինչ վերաբերում է ԲՀԿ-ին, ապա, Արմեն Բադալյանի խոսքով, այդ ուժը նախընտրական արշավը սխալ տարավ` հիմնական շեշտադրումն անելով Հանրապետականի մենաշնորհի դեմ պայքարի վրա: Դա, ըստ նրա, սխալ է, քանի որ ԲՀԿ-ն պետք է պայքարեր ոչ թե ՀՀԿ-ի մենաշնորհի դեմ, այլ հասարակությանը պետք է ընտրելու հնարավորություն տրվեր: Այն է` պետք է համեմատություն տարվեր ՀՀԿ-ականների Երևանի և այն Երևանի միջև, որը կլիներ, եթե ԲՀԿ-ն հաղթեր:
«ԲՀԿ-ն ոչ թե Երևանի պատկերը տվեց, այլ որդեգրեց ՀՀԿ-ի դեմ պայքարելու կուրս: Դա սխալ է, քանի որ ես բազմիցս ասել էի, որ այս ընտրությունները լինելու են պայքար հանունի համար, ոչ թե պայքար ընդդեմի: ԲՀԿ-ն վերցրեց ընդդեմի պայքարը և հաջողողություն չունեցավ: Իհարկե, պահպանեց իր դիրքերն ավագանիում, բայց կարող էր շատ ավելիին հասնել, եթե կարողանար ճիշտ ընտրական քարոզարշավ իրականացնել»,- ասաց Արմեն Բադալյանը:
ՀԱԿ-ին անդրադառնալով` Արմեն Բադալյանը նշեց, որ այս կուսակցությունը ոչ գրագետ քարոզարշավ անցկացրեց, ինչի հետևանքով ստացավ այն, ինչ պետք է ստանար: Նրա խոսքով` միայն մեկ հանրահավաքով ու մեկանգամյա ելույթներով ՀԱԿ-ը չէր կարող հաջողության հասնել:
ՀՅԴ-ի առնչությամբ մասնագետը նշում է, որ այդ ուժը նույնպես որդեգրեց այն քաղաքականությունը, որ մենաշնորհը պետք է վերացվի: Սակայն ՀՅԴ-ն չունի այն քաղաքական կշիռը, ինչ ԲՀԿ-ն: «Եվ եթե ԲՀԿ-ի մոտ այդ մենաշնորհի դեմ պայքարն ինչ-որ չափով կարող էր աշխատել, ՀՅԴ-ի դեպքում այդ ինչ-որ չափովն էլ չէր կարող աշխատել, որովհետև ՀՅԴ-ն չի ընկալվում որպես ՀՀԿ-ի դեմ հիմնական մրցող ուժ: Իսկ եթե դու հիմնական մրցող ուժը չես, ապա չես կարող հաջողություն ունենալ: Եվ ՀՅԴ-ն, բնականաբար, պարտվեց, բայց միաժամանակ չպարտվեց, քանի որ նախկինում ավագանու կազմում չի եղել: Այսինքն` ՀՅԴ-ն միաժամանակ և´ պարտվեց, և´ չպարտվեց»,- «Մեդիալաբին» ասում է Բադալյանը:
Նրա կարծիքով` ՀՅԴ-ն պետք է ուշադրություն դարձնի իր կուսակցության ղեկավար անձնակազմին: Եթե այս ամենից հետո նրանք համապատասխան քայլերի չդիմեն, այսինքն` կուսակցության ղեկավարության մակարդակով առնվազն հրաժարական չներկայացնեն, ապա դա կլինի մեսիջ կուսակցության միջին և ցածր խավի գործիչներին առ այն, որ «եթե դուք ձեր առջև դրված խնդիրը չեք լուծում, ապա դրանից հետո պատասխանատվության չեք ենթարկվում»:
Ինչ վերաբերում է ՕԵԿ-ին, ապա, ըստ Բադալյանի, այդ ուժը չէր կարող Երևանի ավագանու ընտրություններում անցողիկ շեմը հաղթահարել, որովհետև 2008 թվականի մարտի 1-ից հետո ՕԵԿ-ը դադարեց գոյություն ունենալուց, երբ կուսակցության առաջնորդը ՕԵԿ-ի ստացած ձայները փոխեց Ազգային անվտանգության խորհրդի քարտուղարի պաշտոնի հետ:
Անդրադառնալով «Բարև, Երևան» դաշինքին` Արմեն Բադալյանն ասում է, որ դաշինքն ստացավ այնքան ձայն, որքան խորհրդարանական ընտրությունների ժամանակ համամասնորեն ստացել էր Երևանում: «Խորհրդարանական ընտրությունների ժամանակ նա մոտավորապես 70 հազար ձայն էր ստացել, իսկ Երևանի ավագանու ընտրություններում` մոտավորապես 35 հազար: Այսինքն` մոտ 50 տոկոսն է պահպանում և մտավ ավագանի»,- ասաց Բադալյանը:
«Առաքելություն կուսակցության մասին չենք խոսում, որովհետև այդպիսի կուսակցություն փաստորեն չկա»,- ասաց նա:
Այսպիսով, Արմեն Բադալյանի խոսքով, ոչ իշխանական ուժերի հիմնական սխալն այն էր, որ նրանք ապրիլի 5-ից մինչև մայիսի 3-ն ընկած ժամանակաշրջանում ոչ թե ընտրարշավ անցկացրեցին, այլ քարոզարշավ:
«Այսինքն` փոխանակ ընտրելու հնարավորություն տային քաղաքացիներին, ընդամենը քարոզում էին, ըստ իրենց, ճիշտ սխեման, ինչը սխալ դուրս եկավ: Սա նշանակում է, որ ԲՀԿ-ն, ՀԱԿ-ը և ՀՅԴ-ն կուսակցաշինության հետագա լուրջ անելիքներ ունեն: Եթե նրանք լուրջ գործով չզբաղվեն, խստորեն պարտվելու են հետագայում ևս»,- ընդգծեց մեր զրուցակիցը:
Հիշեցնենք, որ մայիսի 5-ին կայացած Երևանի ավագանու ընտրություններում, ըստ Կենտրոնական ընտրական հանձնաժողովի նախնական արդյունքների, ձայների 55,86 տոկոսով հաղթանակ է տարել իշխող ՀՀԿ-ն, ինչը նշանակում է, որ կուսակցության համամասնական ցուցակը գլխավորող գործող քաղաքապետ Տարոն Մարգարյանը կրկին կզբաղեցնի այդ պաշտոնը:
ԿԸՀ նախնական արդյունքների համաձայն` ՀՀԿ-ին ստացած ձայներով հաջորդում է ԲՀԿ-ն, երրորդը «Բարև, Երևան» դաշինքն է: Նվազագույն շեմը չհաղթահարած ՕԵԿ-ը, ընդդիմադիր ՀԱԿ-ը և ՀՅԴ-ն տեղ չեն ունենա քաղաքի իշխանություններում:
Չնայած ընտրությունների օրն արձանագրված ընտրախախտումների վերաբերյալ բազմաթիվ ահազանգերին` ԵԽ տեղական և տարածաշրջանային իշխանությունների կոնգրեսի դիտորդական առաքելության ղեկավար Ստյուարտ Դիքսոնն այսօր
Երևանում լրագրողների հետ հանդիպմանը հայտարարել է, որ Երևանի ավագանու ընտրություններն անցել են խաղաղ, օրինական և տեխնիկապես լավ կազմակերպված:
Օտարերկրյա դիտորդներն արձանագրել են, որ քվեարկության գաղտնիությունը զգալիորեն պահպանվել է, լավացել է անձնագրերում դրվող կնիքի թանաքի որակը, ընտրատեղամասերում կուտակումներ չեն եղել:
Որպես բացասական երևույթ` դիտորդները նշել են քվեաթերթիկների հաշվարկի ժամանակ բջջային հեռախոսների օգտագործումը: Դիտորդները միաժամանակ Հայաստանի իշխանություններին կոչ են արել այնպես անել, որ երկրում վախի ու փողի մթնոլորտ չստեղծվի:
© Medialab.am
